Ezequiel 13 - Chol: I T’an Dios

T'an ti' contra jini payxo x'alt'añob

¹ Tsa' tili i t'an lac Yum ba' añon:

² I yalobil winic, subeñob ili t'an jini payxo x'alt'añob mu' bʌ i lon subeñob israelob chuqui tilem ti' bajñel pusic'al. Subeñob: “Ubinla i t'an lac Yum.

³ Lac Yum Dios woli' yʌl: Mi caj i tajob wocol jini tonto bʌ x'alt'añob, mu' bʌ i lon subob t'an tilem bʌ ti' bajñel pusic'al che' ma'anic chuqui tsac subeyob.

⁴ Ubinla, israelob, lajalob jini x'alt'añob la' cha'an bajche' wax am bʌ ti mate'el.

⁵ Ma'anic chuqui tsi' wis meleyob cha'an mi' coltañetla. Ma'anic tsi' cha' meleyob ts'ajc ba' jejmen. Ma'anic tsi' cha' wen meleyob ts'ajc am bʌ ti la' joytʌlel cha'an mi' mʌctan la' contrajob ti' yorajlel i mich'lel lac Yum.

⁶ Mi' lon q'uelob chuqui mach isujmic. Mi' ñopob lot. Mi' lon alob: Che'ʌch tsi' yʌlʌ lac Yum, che'ob, pero mach chocbilic majlel c cha'an. Woli' lon ña'tañob che'ʌch mi caj i yujtel che' bajche' woli' yʌlob.

⁷ ¿Mach ba wolic la' sub lot? Anquese ma'anic chuqui mi la' q'uel, ma'anic chuqui mi la' wubin, mi la' lon al: Che'ʌch tsi' yʌlʌ lac Yum, che'etla, anquese ma'anic chuqui tsac subeyetla.

⁸ Jini cha'an lac Yum Dios woli' yʌl: Ti' caj la' lot mi caj c jisañetla, come tsa' la' lon cha'le t'an che' bʌ tsa' la' wʌlʌ chuqui mach isujmic.

⁹ Mi caj j contrajin jini payxo x'alt'añob mu' bʌ i lon q'uelob chuqui ma'anic tsac pʌsbeyob. Mi' yʌlob jini mach bʌ isujmic. Ma'anix mi caj i yajñelob yic'ot c cha'año' bʌ ti Israel mu' bʌ i tempañob i bʌ. Ma'anix mi caj i ch'ʌjmelob ti tsic. Ma'anix mi' mejlelob ti ochel ti' lumal Israel. Che' jini mi caj la' ña'tan la' Yumon la' Dioson.

¹⁰ Mi caj la' toj la' mul cha'an tsa' la' loti c tejclumob. Tsa' la' wʌlʌ: La' ajniquetla ti ñʌch'ʌl, che'etla che' ma'anic ba' ñʌch'ʌl pañimil. Ya' ba' mach wen melbilic ts'ajc, jini x'alt'añob woli' boñob ti tan.

¹¹ Yom ma' subeñob jini woli bʌ i boñob ti tan, mi' caj ti yajlel che' mi' tilel p'ʌtʌl bʌ ja'al. Muq'uix c choc jubel tuñija' ti panchan yic'ot ñuqui ic' cha'an mic jem.

¹² Che' yajlemix jini ts'ajc, mi caj i yʌlob israelob: ¿Chucoch ma'anic tsa' la' subeyon lojon che' mach wen melbilic ts'ajc? ¿Chucoch tsa' la' boño ti tan cha'an ma'anic mic wen q'uel lojon? che'ob.

¹³ Jini cha'an lac Yum Dios woli' yʌl: Cabʌl c mich'lel, mi caj c choc tilel ñuqui ic' yic'ot c'am bʌ ja'al, yic'ot tuñija' mu' bʌ caj i jisan jini ts'ajc.

¹⁴ Mi caj c bic'ti jisan jini ts'ajc tsa' bʌ la' boño ti tan. P'ulul mi caj i yajlel ti lum. Cojach i yebal mi caj i cʌytʌl. Che' mi' yajlel jini ts'ajc mi caj i teñetla cha'an mi la' ña'tan la' Yumon.

¹⁵ Mi caj c tem jisan jini ts'ajc yic'ot jini winicob tsa' bʌ i boñoyob. Mi caj c subeñetla: Jilemix jini ts'ajc yic'ot jini winicob tsa' bʌ i boñoyob.

¹⁶ Jini payxo x'alt'añob woli' contrajiñob jini chumulo' bʌ ti Jerusalén, che' mi' lon alob ñʌch'ʌcña pañimil. Ma'anic i ñʌch'tʌlel, che'en lac Yum Dios.

¹⁷ I yalobil winic, subeñob i mul jini x'ixic bʌ x'alt'añob ya' ti tejclum, mu' bʌ i bajñel alob chuqui mi' ña'tañob ti' pusic'al.

¹⁸ Subeñob: Lac Yum Dios woli' yʌl: ¡Obolob i bʌ jini mu' bʌ i cʌchbeñob i bic' i c'ʌb c tejclumob cha'an ma'añic mi' c'am'añob! ¡Obolob i bʌ jini mu' bʌ i jalbeñob i jol yic'ot pisil cha'an mi' lotiñob winicob x'ixicob! Cha'an mi la' mulan ganar woli la' lotiñob cha'an mi la' bajñel coltan la' bʌ.

¹⁹ Mi la' p'ajon ti' tojlel c tejclumob cha'an mi la' wʌq'uentel junmujch' cebada yic'ot ts'ita' waj. Che' jini mi la' wʌc' ti chʌmel jini mach bʌ añobic i mul. Mi la' lon coltan jini año' bʌ i mul ame chʌmicob. Mi la' subeñob lot pejtel mu' bʌ i ñich'tañob.

²⁰ Jini cha'an lac Yum Dios woli' yʌl: Mach uts'atic mij q'ueletla yic'ot i yejtal la' cʌntʌntel cha'an xibajob. Mi caj c chilbeñetla. Joñon mi caj cʌc' ti colel c tejclumob ba' chucbilob ti la' yac.

²¹ Mi caj c lu' tsilbeñob i pislel i jol tsa' bʌ la' melbeyob cha'an mi la' lotiñob. Mi caj cʌc'ob ti colel ti la' p'ʌtʌlel. Ma'anix mi caj i chʌn ubiñob wocol ti la' tojlel. Ti jim bʌ ora mi caj la' ña'tan la' Yumon.

²² Tsa' la' wotsʌbeyob i ch'ijiyemlel i pusic'al jini tojo' bʌ yic'ot la' lot. Ma'anic tsa cotsʌbeyob i ch'ijiyemlel joñon. Tsa' la' xiq'uiyob ti mulil jini xjontolilob. Ma'anic tsa' la' subeyob cha'an mi' cʌyob i jontolil, cha'an mi' tajob i cuxtʌlel.

²³ Jini cha'an ma'anix mi caj la' chʌn cha'len wujt cha'an mi la' lotiñob. Ma'anix mi caj la' chʌn cha'len tic'laya. Mi caj j coltan loq'uel c cha'año' bʌ ti la' p'ʌtʌlel. Mi caj la' ña'tan la' Yumon, Diosoñʌch”. Che' yom ma' subeñob, che'en.