Ezequiel 11 - Chol: I T’an Dios

I tic'ol jini jontolo' bʌ yumʌlob

¹ Awilan i yEspíritu lac Yum tsi' ch'uyuyon letsel. Tsi' c'axtesayon ya' ti' ti' Templo am bʌ ti' tojel i pasibal q'uin ba' tsaj q'uele jo'tiquil i cha'c'al winicob wa'alo' bʌ ti' ti' Templo yic'ot cha'tiquil yumʌlob: Jaazanías (i yalobil Azur) yic'ot Pelatías (i yalobil Benaía).

² Jini Espíritu tsi' subeyon: I yalobil winic, an ti' wenta ili winicob pejtel i jontolil ili tejclum. Mi' socbeñob i pensar pejtelel winicob.

³ Come mi' lon alob: “I yorajlelix mi lac cha' wa'chocon Jerusalén, come p'ʌtʌl lac tejclum che' bajche' mʌctijibʌl melbil bʌ ti tsucu taq'uin. Mi caj i coltañonla che' mi' tilelob laj contrajob”, lon che'ob.

⁴ Jini cha'an i yalobil winic, subeñob ili t'an, che'en.

⁵ Awilan i yEspíritu lac Yum tsi' subeyon: Subeñob jini winicob: “Jatetla israelob tsa' la' lon bajñel ña'ta chuqui la' wom la' mel, pero mi la' wʌl: Che'ʌch woli' yʌl lac Yum, che'etla. Cujil che'ʌch woli la' mel. Cujil pejtel chuqui mi la' ña'tan ti la' pusic'al.

⁶ Cabʌl mi la' cha'len tsʌnsa. Tsa'ix la' laj but'u ti ch'ujlelʌl jini calle tac.

⁷ Woli la' lon ña'tan lajal ili tejclum che' bajche' mʌctijibʌl mu' bʌ caj i coltañetla, pero mach isujmic. Ma'anic mi caj i mʌctan la' contrajob. Wʌ' ti mal tejclum sʌts'ʌlob mi caj i yajñelob jini tsʌnsʌbilo' bʌ la' pi'ʌlob, pero jatetla mi caj la' wersa chojquel loq'uel ti jumpat cha'an mi la' tsʌnsʌntel.

⁸ Jini espada mu' bʌ la' bʌc'ñan mi caj i tsʌnsañetla.

⁹ Mi caj c choquetla loq'uel ti la' tejclum cha'an mi cʌq'uetla ti' c'ʌb jini ñajt bʌ chumulob cha'an mi la' toj la' mul.

¹⁰ Wersa mi caj la' tsʌnsʌntel ti espada. C'ʌlʌl ba' jaxʌl i lumal Israel mi caj c jisañetla. Che' jini mi caj la' ña'tan la' Yumon.

¹¹ Ma'anix mi caj la' chʌn pejcan ti la' mʌctijib jini tejclum. Ma'anic mi caj la' colel ti mal. C'ʌlʌl ba' jaxʌl la' lumal mi caj cʌq'ueñetla la' toj la' mul

¹² cha'an mi la' ña'tan la' Yumon. Come ma'anic tsa' la' jac'beyon c t'an cha'an mi la' mel chuqui com. Tsa' jach la' jac'be i t'an winicob ti pañimil”. Che'ʌch yom ma' subeñob, che'en i yEspíritu lac Yum.

¹³ Che' bʌ tsac subeyob jini t'an, tsa' chʌmi Pelatías (i yalobil Benaía). Che' jini tsac pʌcchoco c bʌ. Tsac cha'le c'am bʌ t'an: ¡C Yum Dios! ¿Mu' ba caj a laj jisan pejtelel i colojbal israelob? cho'on.

Mi caj i cha' coltʌntelob

¹⁴ Lac Yum tsi' subeyon:

¹⁵ I yalobil winic, jini chumulo' bʌ ti Jerusalén tsa' bʌ cʌleyob che' bʌ tsa' cʌjchiyob majlel i pi'ʌlob woli' yʌlob: “Lac Yum tsi' chocoyob loq'uel come wen jontolob. Wʌle lac cha'añʌch i lum”, che'ob.

¹⁶ Jini cha'an yom ma' subeñob jini cʌchʌlo' bʌ: “Tsa'ix i yʌlʌ lac Yum Dios: Anquese tsac chocoyetla majlel ti ñajt bʌ pañimil ti yan tac bʌ colem tejclum, mi caj c pʌs c bʌ ti la' tojlel che' bajche' la' puts'ib.

¹⁷ Mi caj c cha' pʌyetla loq'uel ti pejtelel lum ba' pam pujquemetla cha'an mic cha' aq'uetla ti' lumal Israel”. Che'ʌch yom ma' subeñob.

¹⁸ Ba' ora mi' cha' sujtelob ti' lumal, mi caj i chocob loq'uel pejtelel chuqui mi' bib'esan yic'ot pejtel chuqui leco.

¹⁹ Joñon mi caj cʌq'ueñob tsiji' bʌ i pusic'al yic'ot tsiji' bʌ Espíritu. Mi caj c loc'sʌbeñob jini tsucul bʌ i pusic'al. Mi caj cʌq'ueñob wen bʌ i pusic'al ti' q'uexol jini tsʌts bʌ xajlel yilal am bʌ ti' bʌc'tal,

²⁰ cha'an mi' jac'beñoñob c t'an yic'ot c mandar ti pejtelel ora. Che' jini mi caj i yochelob tic tejclum. Mi caj la' Diosiñon.

²¹ Pero pejtelel mu' bʌ i chʌn mulañob i mel jini dios tac ts'a'lebil bʌ c cha'an yic'ot chuqui tac mach wenic, mi caj cʌq'ueñob wocol cha'an i mul, che'en lac Yum Dios.

²² Jini querubiñob tsi' cha' letsayob i wich' yic'ot jini selel bʌ tsucu taq'uin ya' ti' t'ejl. Tsa' c'oti i ñuclel lac Yum i Dios Israel ti' pam jini querubiñob.

²³ Tsa' letsi i ñuclel lac Yum ya' ti pam jini tejclum. Tsa' c'oti ti c'ʌctʌl ya' ti' pam wits am bʌ ti' tojel tejclum ba' mi' pasel q'uin.

²⁴ Jini Espíritu tsi' ch'uyuyon letsel. Tsi' pʌyʌyon majlel c'ʌlʌl ti Babilonia ba' cʌchʌlob c pi'ʌlob. Che' jach tsa' sʌc jili jini tsa' bʌ j q'uele.

²⁵ Che' jini tsac subeyob jini cʌchʌlo' bʌ pejtelel chuqui tsi' subeyon lac Yum.