Ezequiel 10 - Chol: I T’an Dios

Tsa' loq'ui i ñuclel lac Yum ya' ti Templo

¹ Ti wi'il tsaj q'uele ya' ti panchan ti' chañelal i jol jini querubiñob tsa' bʌc' tsictiyi che' bajche' jump'ejl zafiro bʌ xajlel, lajal bʌ bajche' i buchlib rey.

² Lac Yum tsi' sube jini lʌpbil bʌ i cha'an lino bʌ i pislel: Ochen ti' tojlel jini xotol tac bʌ woli bʌ ti wijlel ya' ti' yebal jini querubiñob. Yom ma' much'ye' i nich c'ajc am bʌ ti yojlilob cha'an ma' pam puc ya' ti tejclum, che'en. Tsaj q'uele che' bʌ tsa' majli.

³ Che' bʌ tsa' ochi jini winic, ya' añob jini querubiñob ti' tojel Templo ti sur. Jini patio am bʌ ti mal tsa' bujt'i ti' ñuclel lac Yum.

⁴ I ñuclel lac Yum tsa' letsi ya' ti' pam jini querubiñob. Tsa' majli ti' ti' Templo. Tsa' bujt'i jini Templo yic'ot i patiojlel ti' ñuclel lac Yum. Sʌcjaman tsa' majli cha'an ti' ñuclel lac Yum.

⁵ Ñajtʌ tsiquil ya' ti patio ti jumpat, leslesña i wich' jini querubiñob. Lajalʌch yubil i t'an che' bajche' i t'an jini Ñuc bʌ Dios che' mi' cha'len t'an.

⁶ Che' bʌ tsa' subenti jini lʌpbil bʌ i cha'an lino bʌ i pislel: Ch'ʌmʌ tilel i nich c'ajc am bʌ ti' tojlel jini selel tac bʌ woli bʌ ti wijlel ya' ti' yojlil jini querubiñob, che'en, tsa' ochi majlel. Tsa' wa'le ya' ba'an junsejl.

⁷ Juntiquil querubín tsi' sʌts'choco i c'ʌb ba'an jini c'ajc am bʌ ti ojlil. Tsi' yʌc'ʌ ti' c'ʌb jini lʌpbil bʌ i cha'an lino bʌ i pislel. Che' bʌ tsi' ch'ʌmʌ, tsa' loq'ui majlel.

⁸ Lajal yilal i c'ʌb jini querubiñob ti' yebal i wich' che' bajche' i c'ʌb winic.

⁹ Che' jini tsaj q'uele ya'an chʌnsejl jini tsucu taq'uin ti' t'ejl jini querubiñob, junsejl ti jujunwejlob. Yʌxxowan jini selel bʌ tsucu taq'uin.

¹⁰ Junlajal jach ti q'uelol jini selel bʌ tsucu taq'uin, xinlʌpʌl yic'ot jini yambʌ.

¹¹ Che' bʌ tsi' cha'leyob xʌmbal, junlajal tsoltsolñayob tsa' majliyob. Ma'anic tsi' sutq'uiyob i bʌ che' bʌ tsi' cha'leyob xʌmbal. Ya' ba' tsa' majli jini ñaxan bʌ, ya' tsa' laj majliyob ti' tojel i wut. Ma'anic tsi' ts'ejeyob i bʌ che' bʌ tsa' majliyob yic'ot che' bʌ tsa' sujtiyob.

¹² Ti pejtelel i cuctal, jini i pat, i c'ʌb, i wich', yic'ot jini selel tac bʌ tsa' bʌ i pi'leyob majlel, laj an i wut.

¹³ Che' bʌ ya' añon tsa cubi tsa' pejcʌnti jini selel tac bʌ ti P'ʌtʌl bʌ Ic'.

¹⁴ Ti jujuntiquil jelchojc tacob i wut jini querubiñob. Jini ñaxan bʌ lajal che' bajche' i wut querubín, i cha'p'ejlel bʌ lajalʌch bajche' i wut winic, i yuxp'ejlel bʌ lajalʌch bajche' i wut bajlum, i chʌmp'ejlel bʌ lajalʌch bajche' i wut xiye'.

¹⁵ Tsaj q'uele jini querubiñob. Jiñobʌch tsa' bʌ j q'uele ya' ti' ti' jini ñoja' i c'aba' Quebar.

¹⁶ Che' bʌ tsi' cha'leyob xʌmbal tsi' cha'leyob xʌmbal ja'el jini selel tac bʌ tsucu taq'uin. Che' bʌ tsi' letsayob i wich' jini querubiñob cha'an mi' wejlelob letsel, ya' ts'uyucña tsa' majliyob jini selel tac bʌ tsucu taq'uin.

¹⁷ Che' bʌ tsa' wa'leyob jini querubiñob, jini selel bʌ tsucu taq'uin tsa' wa'le ja'el. Che' bʌ tsi' ch'uyuyob i bʌ jini querubiñob, tsi' ch'uyuyob i bʌ ja'el jini selel tac bʌ tsucu taq'uin, come ya'an i ch'ujlel jini querubiñob ti jini selel tac bʌ.

¹⁸ I ñuclel lac Yum tsi' cʌyʌ i ti' Templo. Tsa' c'oti ti' pam jini querubiñob.

¹⁹ Che' bʌ tsaj q'ueleyob, tsi' tich'iyob i wich'. Tsa' wejliyob letsel yic'ot jini selel bʌ tsucu taq'uin ya' ti' t'ejl. Tsa' c'otiyob ti wa'tʌl ya' ti' ti' Templo ti' tojel i pasibal q'uin. Ya'an i ñuclel lac Yum i Dios Israel ti' pam jini querubiñob.

²⁰ Jiñʌch tsa' bʌ j q'uele ti' yebal i Dios Israel, ya' ti' ti' ñoja' i c'aba' Quebar. Tsac ña'ta jiñob jach bʌ.

²¹ Ti jujuntiquil an chʌnchʌmp'ejl i wut yic'ot chʌnchʌnq'uejl i wich'. Ya' ti' yebal i wich' an che' bajche' i c'ʌb winicob.

²² Lajalob i wut bajche' jini tsa' bʌ j q'uele ya' ti' ti' ñoja' i c'aba' Quebar. Toj jach ja'el tsi' cha'leyob xʌmbal ti' tojel i wut.