Exodo 9 - Chol: I T’an Dios

I tic'lʌntel wacax

¹ Lac Yum tsi' sube Moisés: Cucu ba'an Faraón. Suben ili t'an: “C Yum lojon i Dios hebreojob woli' yʌl: La' majlicob c cha'año' bʌ cha'an mi' ch'ujutesañoñob.

² Mi ma'anic ma' wʌc' a t'an cha'an mi' majlelob, mi mux a chʌn mʌctañob,

³ tsajaletme come lac Yum mi caj i yʌq'uen leco bʌ i c'amʌjel jini alʌc'ʌl am bʌ ti potrero, yic'ot caballo, yic'ot burro, yic'ot camello, yic'ot wacax, yic'ot tiñʌme'.

⁴ Pero ma'anic mi caj i yʌq'uen i c'amʌjel i yʌlac'ob israelob. Ma'anic mi caj i chʌmelob i cha'año' bʌ israelob mi juncojtic”. Che' yom ma' suben Faraón, che'en lac Yum.

⁵ Lac Yum tsi' sube baqui ora mi caj i yujtel. Tsi' yʌlʌ: Ijc'ʌl mi caj c mel iliyi ti ili lum, che'en.

⁶ Che' ti yijc'ʌlal lac Yum tsi' mele. Tsa' chʌmi pejtel i wacax egiptojob. Pero ma'anic tsa' chʌmi i wacax israelob.

⁷ Faraón tsi' choco majlel i winic cha'an mi' c'ajtin bajche' yilal i wacax israelob. Awilan, ma'anic tsa' chʌmi mi juncojtic. Pero tsa' chʌn tsʌts'a i pusic'al Faraón. Ma'anic tsi' choco majlel jini israelob.

I tic'lʌntelob ti tsoy tac

⁸ Lac Yum tsi' sube Moisés yic'ot Aarón: Ch'ʌmʌla cha'jojp tan am bʌ ti horno. Jatet Moisés yom ma' wejtun letsel ya' ti' tojel Faraón.

⁹ Mi caj i pam mujlʌben i lumal egiptojob che' bajche' tʌñʌcña bʌ ts'ubejn. Mi caj i pasel tsoy ti' cuctal winicob yic'ot alʌc'ʌl tac ti pejtelel Egipto.

¹⁰ Che' jini tsi' ch'ʌmʌyob tan. Tsi' pʌsʌyob i bʌ ti' tojlel Faraón. Tsi' wejtu letsel jini tan Moisés. Tsi' yʌc'ʌ ti pasel tsoy ti' cuctal winicob yic'ot alʌc'ʌl tac.

¹¹ Jini xwujtob ma'anic tsa' mejli ti wa'tʌlob ti' tojlel Moisés cha'an i tsoy, come cabʌlob i tsoy xwujtob yic'ot pejtel egiptojob.

¹² Pero lac Yum tsi' tsʌts'esʌbe i pusic'al Faraón. Ma'anic tsi' choco majlel jini israelob. Tsa' ujti che' bajche' lac Yum tsi' sube Moisés.

I tic'lʌntelob ti tuñija'

¹³ Lac Yum tsi' sube Moisés: Ch'ojyen ti wen sʌc'ajel. Cucu suben Faraón: “C Yum lojon i Dios hebreojob woli' yʌl: La' majlicob c cha'año' bʌ cha'an mi' ch'ujutesañoñob.

¹⁴ Wʌle mi caj c wen tic'lañet yic'ot a winicob ti pejtelel a lumal cha'an mi la' cha'len tsic pusic'al, cha'an ma' ña'tan ma'anic yambʌ bajche'on ti pejtelel pañimil.

^15-16 Come an c p'ʌtʌlel cha'an mic tsʌnsañetla ti pejteletla, pero mach che'ic tsac cha'le, come wolic pʌs c p'ʌtʌlel ti a tojlel cha'an mi cʌc' c bʌ ti cʌjñel ti pejtelel pañimil.

¹⁷ Ch'ejl ma' chʌn pʌs a bʌ tic tojlel. Wola' ts'a'leñon che' ma'anic ma' choc majlel c cha'año' bʌ.

¹⁸ Ijc'ʌl che' ti ili ora mi caj c choc tilel colem tac bʌ tuñija', ñumen colem che' bajche' jini cʌñʌl bʌ la' cha'an ti Egipto c'ʌlʌl ti' cajibal.

¹⁹ Wʌle yom ma' choc majlel t'an cha'an mi' pʌyob ochel a wʌlac' yic'ot pejtel a chubʌ'an am bʌ ti lum, come mux i yajlel tuñija' ti pam pejtel winicob yic'ot pejtel alʌc'ʌl am bʌ ti jamil. Mi caj i chʌmelob pejtel mach bʌ ochemic ti' yotot”. Che' yom ma' suben Faraón, che'en lac Yum.

²⁰ I winicob Faraón tsa' bʌ i bʌc'ñayob i t'an lac Yum tsi' pʌyʌyob ochel i mozojob yic'ot i yʌlac'ob.

²¹ Pero jini mach bʌ anic tsi' p'isiyob ti wenta i t'an lac Yum tsi' cʌyʌyob i mozojob yic'ot i yʌlac' ya' ti jamil.

²² Lac Yum tsi' sube Moisés: Letsan a c'ʌb ti panchan cha'an mi' tilel tuñija' ti pejtelel i lumal Egipto, ti pam winicob yic'ot alʌc'ʌl tac, yic'ot ti pejtelel i pʌc'ʌbob egiptojob, che'en.

²³ Moisés tsi' letsa i te'. Lac Yum tsi' choco tilel chajc yic'ot tuñija'. Tsi' cha'le t'an chajc ti pejtelel Egipto. Lac Yum tsi' choco tilel tuñija' ti' lumal egiptojob.

²⁴ An tuñija' temel yic'ot i c'ʌc'al chajc woli bʌ ti tojmel. Ma'anic ba' ora an ti Egipto lajal bajche' iliyi c'ʌlʌl ti' cajibal ili colem tejclum.

²⁵ Jini tuñija' tsi' jisa pejtel winicob yic'ot alʌc'ʌl tac am bʌ ti jamil ti pejtelel Egipto. Tsi' jisa ja'el pejtel i pʌc'ʌbob egiptojob yic'ot te'.

²⁶ Pero ma'anic tuñija' ti Gosén ya' ba'an israelob.

²⁷ Faraón tsi' pʌyʌ Moisés yic'ot Aarón. Tsi' subeyob: Wolix c ña'tan c mul wʌle. Tojʌch la' Yum. Joñon quic'ot c pi'ʌlob an lojon c mul.

²⁸ C'ajtiben la' Yum, come jasʌlix i t'an chajc yic'ot tuñija'. Mi caj c choquetla majlel. Ma'anix mi caj c mʌctañetla, che'en.

²⁹ Moisés tsi' sube: Che' mic loq'uel ti tejclum, mi caj c sʌts' j c'ʌb ba'an lac Yum. Mi caj i lajmel i t'an chajc yic'ot tuñija' cha'an ma' ña'tan i cha'añʌch lac Yum jini pañimil.

³⁰ Pero jatet yic'ot a pi'ʌlob ti e'tel, cujil maxto anic mi la' bʌc'ñan c Yum lojon, che'en.

³¹ Tsa' jili jini lino yic'ot cebada come c'ʌnix jini cebada, wolix ti nich jini lino.

³² Pero ma'anic tsa' jili jini trigo yic'ot centeno come maxto i yorajlelic i wut.

³³ Moisés tsa' loq'ui ti tejclum ti' tojlel Faraón. Tsi' sʌts'ʌ i c'ʌb ba'an lac Yum. Tsa' lajmi i t'an chajc yic'ot tuñija'. Tsa' lajmi ja'al ja'el.

³⁴ Che' bʌ tsi' q'uele Faraón lajmenix jini ja'al yic'ot tuñija' yic'ot i t'an chajc, mach yomic i cʌy i mul. Tsi' chʌn tsʌts'esayob i pusic'al Faraón yic'ot winicob.

³⁵ Cha'an tsʌts to i pusic'al Faraón, jini cha'an ma'anic tsi' choco majlel jini israelob. Tsa' ujti che' bajche' tsi' sube Moisés lac Yum.