Exodo 6 - Chol: I T’an Dios

¹ Lac Yum tsi' sube Moisés: Wʌle mi caj a q'uel chuqui mi caj c mel ti' tojlel Faraón. Wersa mi caj i chocob loq'uel. Mi caj i wets'ob loq'uel ti' lumal, che'en.

² Dios tsi' sube ja'el: Joñon a Yumon.

³ Tsac pʌsʌ c bʌ ti' tojlelob Abraham, yic'ot Isaac yic'ot Jacob. Tsac tsictesʌbeyob j C'aba' cha'an Dioson Mach bʌ anic i P'isol c P'ʌtʌlel. Ma'anic tsac tsictesʌbeyob mi i Yumon. Jiñʌch yambʌ j C'aba', Yumʌlon.

⁴ Tsa cʌq'ueyob xuc'ul bʌ c t'an cha'an mi caj cʌq'ueñob i lumal Canaán ba' tsa' poj ajniyob yic'ot Jacob.

⁵ Tsa cubibeyob i yajcʌn israelob cha'an woliyob ti wocol e'tel ti' tojlel egiptojob. Tsa'ix c ña'ta jini xuc'ul bʌ t'an tsa' bʌ cʌq'ueyob.

⁶ Subeñob jini israelob: “La' Yumon. Mi caj c ju'sʌbeñetla la' cuch tsa' bʌ i yʌq'ueyetla jini egiptojob. Mi caj c loc'sañetla ti majtan e'tel ti' tojlelob. Mi caj j coltañetla ti cabʌl c p'ʌtʌlel yic'ot bʌbʌq'uen tac bʌ c melbal.

⁷ Mi caj cotsañetla tic cha'año' bʌ. Mi caj cochel ti la' Dios. Mi caj la' ña'tan la' Yumon la' Dioson tsa' bʌ c pʌyʌyetla loq'uel ti wocol e'tel ti' tojlel egiptojob.

⁸ Mi caj c pʌyetla ochel ti jini lum tsa' bʌ cʌq'ueyob Abraham yic'ot Isaac yic'ot Jacob che' bajche' tsac subeyob. Mi caj cʌq'ueñetla come la' Yumon”. Che' yom ma' subeñob, che'en lac Yum.

⁹ Moisés tsi' laj subeyob israelob, pero ma'anic tsi' jac'ʌyob come wen wocol jax woli yubiñob jini tsʌts bʌ e'tel.

^10-11 Lac Yum tsi' sube Moisés: Cucu ba'an Faraón, jini rey ti Egipto. Suben wersa yom mi' yʌc' i t'an cha'an mi' loq'uelob ti Egipto jini israelob, che'en.

¹² Pero Moisés tsi' sube lac Yum: Ma'anic tsi' jac'beyoñob jini israelob. ¿Bajche' mi' caj i jac'on Faraón? Mach wen cujilic t'an, che'en.

¹³ Lac Yum tsi' pejca Moisés yic'ot Aarón. Tsi' subeyob bajche' yom mi' cha' subeñob israelob yic'ot Faraón jini rey ti Egipto cha'an mi' yʌc'ob ti loq'uel israelob ya' ti Egipto.

I ñojte'elob yic'ot i p'olbal Moisés yic'ot Aarón

¹⁴ Jiñobʌch yumʌlob ti jujump'ejl otot: Jini winic bʌ i yalobilob Rubén, jini ascuñʌl bʌ i yalobil Israel: Hanoc, Falú, Hezrón yic'ot Carmi. Jiñobʌch i p'olbal Rubén ti jujump'ejl i yotot tac.

¹⁵ Jiñobʌch i yalobilob Simeón: Jemuel, Jamín, Ohad, Jaquín, Zohar yic'ot Saúl i yalobil x'ixic ch'oyol bʌ ti Canaán. Jiñobʌch i p'olbal Simeón ti jujump'ejl i yotot tac.

¹⁶ Jiñobʌch i c'aba' ch'iton bʌ i yalobilob Leví ti jujump'ejl i yotot tac: Gersón, Coat, Merari. Tsa' jal'a ti pañimil Leví jo'c'al yic'ot wuclujump'ejl i cha'c'al jab.

¹⁷ I yalobilob Gersón ti jujump'ejl i yotot: Libni yic'ot Simei.

¹⁸ I yalobilob Coat: Amram, Izhar, Hebrón, Uziel. Tsa' jal'a ti pañimil Coat jo'c'al yic'ot uxlujump'ejl i cha'c'al jab.

¹⁹ I yalobilob Merari: Mahli yic'ot Musi. Jiñobʌch i p'olbal Leví ti jujump'ejl i yotot.

²⁰ Amram tsi' pʌyʌ Jocabed. Tsi' yʌc'ʌ ti pañimil Aarón yic'ot Moisés. Tsa' jal'a ti pañimil Amram jo'c'al yic'ot wuclujump'ejl i cha'c'al (137) jab.

^21-22 I yalobilob Izhar: Coré, Nefeg yic'ot Zicri. I yalobilob Iziel: Misael, Elzafán yic'ot Sitri.

²³ Aarón tsi' pʌyʌ Elisabet i yalobil Aminadab, i yijts'in Naasón. Tsi' yʌc'ʌ ti pañimil Nadab, Abiú, Eleazar yic'ot Itamar.

²⁴ I yalobilob Coré: Asir, Elcana yic'ot Abiasaf. Jiñobʌch i p'olbal Coré ti jujump'ejl i yotot tac.

²⁵ Eleazar i yalobil Aarón tsi' pʌyʌ ti' yijnam i yalobil Futiel. Tsi' yʌc'ʌ ti pañimil Finees. Jiñobʌch yumʌlob ti jujump'ejl otot tac cha'an levíjob.

²⁶ Jiñobʌch Aarón yic'ot Moisés tsa' bʌ subentiyob cha'an lac Yum: Pʌyʌla loq'uel israelob ti Egipto, che'en.

²⁷ Jiñobʌch tsa' bʌ i pejcayob Faraón, rey bʌ ti Egipto, cha'an mi' choc loq'uel israelob ti Egipto. Jiñʌch Aarón yic'ot Moisés.

Lac Yum tsi' yʌq'ue i ye'tel Moisés yic'ot Aarón

²⁸ Che' bʌ tsi' pejca Moisés lac Yum ya' ti' lumal Egipto,

²⁹ tsi' yʌlʌ: Joñon a Yumon. Suben Faraón, rey bʌ ti Egipto, pejtel mu' bʌ c subeñet, che'en.

³⁰ Moisés tsi' jac'ʌ lac Yum: Mach wen cujilic t'an. ¿Bajche' mi' caj i ñich'tañon Faraón? che'en.