Exodo 5 - Chol: I T’an Dios

Moisés yic'ot Aarón ti' tojlel Faraón

¹ Moisés yic'ot Aarón tsa' majliyob ba'an Faraón. Tsi' subeyob: Lac Yum i Dios Israel tsi' pejcayon lojon. Tsi' yʌlʌ: “La' majlicob c tejclumob cha'an mi' melbeñoñob q'uin ya' ti colem bʌ i tiquiñal pañimil”. Che' woli' yʌl lac Yum, i Dios Israel, che'ob.

² Faraón tsi' c'ajtibeyob: ¿Majqui la' Yum? ¿Chucoch mic lon ñopben i t'an cha'an mic chocob majlel? Mach cʌmbilic c cha'an la' Yum. Ma'anic mi caj c choc majlel jini israelob, che'en.

³ Tsi' yʌlʌyob: I Dios hebreojob tsi' pejcayon lojon. Jini cha'an wersa mic majlel lojon uxp'ejl q'uin xʌmbal ya' ti colem bʌ i tiquiñal lum. Mi caj cʌq'uen lojon tsʌnsʌbil bʌ i majtan c Yum Dios, ame i tsʌnsañon lojon ti c'amʌjel yic'ot ti guerra, che'ob.

⁴ I rey egiptojob tsi' mich'leyob Moisés yic'ot Aarón. Tsi' subeyob: ¿Chucoch mi la' mʌctʌbeñob i ye'tel winicob? Cucula ti la' we'tel.

⁵ Cabʌlʌchix la' pi'ʌlob tic lumal. La' womix la' tic'ob cha'an ma'anix mi' chʌn melob i ye'tel, che'en Faraón.

⁶ Ti jini jach bʌ q'uin Faraón tsi' yʌq'ueyob mandar jini mayordomojob yic'ot caporalob:

⁷ Ma'anix mi caj la' wʌq'ueñob jam jini x'e'telob woli bʌ i melob ladrillo. La' i bajñel tempañob tilel jam.

⁸ Pero wersa lajal mi' caj i melob i yonlel i tsicol ladrillo che' bajche' ti yambʌ ora. Mach mi' cʌyob i mel ti ts'ʌcʌl. Cha'an ts'ubob jini cha'an woli' yʌlob: “La' majlicon lojon cha'an mi cʌq'uen lojon tsʌnsʌbil bʌ i majtan Dios”, che'ob.

⁹ Aq'ueñob tsʌts bʌ e'tel jini winicob cha'an mi' bʌx'añob ti' ye'tel cha'an ma'anic mi' jac'ob lot, che'en.

¹⁰ Che' jini, jini mayordomojob yic'ot caporalob tsa' majli i subeñob x'e'telob: Faraón tsi' yʌlʌ: “Ma'anix mi caj la' wʌq'uentel jam.

¹¹ Cucula. Bajñel sʌclanla jam baqui jach mi la' taje', pero ts'ʌcʌl mi caj la' mel ladrillo che' bajche' ti yambʌ ora”, che'ob.

¹² Jini cha'an tsa' pam pujquiyob majlel winicob ti pejtelel i lumal Egipto cha'an mi' tempañob tilel tiquin jam.

¹³ Tsʌts tsi' pejcayob jini mayordomojob: Ts'ʌcʌl yom mi la' mel ladrillo tac ti jujump'ejl q'uin che' bajche' ti yambʌ ora anquese ma'anic jam, che'ob.

¹⁴ Jini mayordomojob i cha'an bʌ Faraón tsi' bajbeyob jini caporalob año' bʌ i ye'tel ti' tojlel israelob. Tsi' c'ajtibeyob: ¿Chucoch mach ts'ʌcʌlic mi la' mel ladrillo che' bajche' ti yambʌ ora? che'ob.

¹⁵ Jini caporalob tsa' majli i pejcañob Faraón ti wocol t'an. Tsi' yʌlʌyob: ¿Chucoch tsʌts ma' tic'lan a winicob?

¹⁶ Ma'anix woli' yʌq'uentelob jam jini x'e'telob. Pero jini mayordomojob mi' chʌn subeñob cha'an mi' chʌn melob. Awilan woli' jats'ob jini x'e'telob, pero mach i mulic. Jontolob jini mayordomojob. Che' tsi' yʌlʌyob jini caporalob.

¹⁷ Faraón tsi' subeyob: Wen ts'ubetla. Jini cha'an woli la' wersa ña'tan majlel cha'an mi la' tsʌnsʌben i majtan la' Yum.

¹⁸ Cucula ti la' we'tel come ma'anic mi caj la' wʌq'uentel jam, pero wersa mi caj la' mel ti ts'ʌcʌl jini ladrillo, che'en Faraón.

¹⁹ Jini caporalob cha'an israelob tsi' p'isiyob ti wenta cabʌl jax i wocol cha'an tsa' subentiyob wersa mi caj i melob i yonlel i tsicol ladrillo che' bajche' ti yambʌ ora.

²⁰ Che' bʌ tsa' loq'uiyob ba'an Faraón, tsi' tajayob Moisés yic'ot Aarón woli bʌ i pijtañob.

²¹ Mich'ob jini caporalob. Tsi' yʌlʌyob: La' i meletla lac Yum come tsa'ix la' wʌc'ʌyon lojon ti ts'a'lentel ti' tojlel Faraón yic'ot ti' tojlel c pi'ʌlob lojon. Tsa'ix a techbe i mich'ajel Faraón cha'an mi' tsʌnsañon lojon, che'ob.

Lac Yum tsi' yʌq'ue i ye'tel Moisés yic'ot Aarón

²² Jini cha'an Moisés tsa' caji' pejcan lac Yum: C Yum, C Yum, ¿chucoch tsa' wʌc'ʌ ti tic'lʌntel a winicob? ¿Chucoch tsa' chocoyon tilel?

²³ C'ʌlʌl che' bʌ tsa' caji c pejcan Faraón c'ʌlʌl wʌle, ma'anic tsa' coltayob che' bajche' tsa' subeyon, che'en Moisés.