Exodo 4 - Chol: I T’an Dios

¹ Moisés tsi' yʌlʌ: Ma'anic mi caj i ñopoñob. Mi caj i yʌlob: “Mach isujmic. Ma'anic tsi' pʌsʌ i bʌ lac Yum ba' añet”. Che' mi caj i yʌlob, che'en Moisés.

² Lac Yum tsi' sube: ¿Chuqui chucul a cha'an? che'en. Tsi' yʌlʌ: Barate', che'en.

³ Lac Yum tsi' sube: Choco ti lum, che'en. Tsi' choco ti lum. Tsa' sujti ti lucum. Moisés tsi' puts'ta jini lucum.

⁴ Lac Yum tsi' sube: Sʌts'ʌ a c'ʌb. Chucben i ñej, che'en. Moisés tsi' sʌts'ʌ i c'ʌb cha'an mi' chuc jini lucum. Tsa' cha' sujti ti barate'.

⁵ Lac Yum tsi' yʌlʌ: Che' jini mi caj i ña'tañob tsac pʌsʌ c bʌ ba' añet. A Yumon, i Dioson a tatob, Abraham yic'ot Isaac yic'ot Jacob, che'en.

⁶ Lac Yum tsi' cha' sube: Otsan a c'ʌb ti a tajn, che'en. Moisés tsi' yotsa i c'ʌb ti' tajn. Che' bʌ tsi' loc'sa, sʌquix che' bajche' sʌsʌc bʌ tocal.

⁷ Dios tsi' yʌlʌ: Cha' otsan a c'ʌb ti a tajn, che'en. Tsi' cha' otsa i c'ʌb ti' tajn. Che' bʌ tsi' loc'sa, cha' lajalix che' bajche' i bʌc'tal.

⁸ Lac Yum tsi' yʌlʌ: Mi ma'anic mi' ñopob a t'an, mi ma'anic mi' ñopob jini ñaxan bʌ i yejtal c p'ʌtʌlel, tic'ʌl mi caj i ñopob jini wi'il bʌ.

⁹ Mi ma'anic mi' ñopob a t'an che' ma' pʌsbeñob jini cha'p'ejl i yejtal c p'ʌtʌlel, mi caj a luch ja' ya' ti colem ja' i c'aba' Nilo. Mi caj a bec' ya' ti lum. Jini ja' mu' bʌ a luch loq'uel ti Nilo mi caj i sujtel ti ch'ich' ya' ti tiquin bʌ lum, che'en.

¹⁰ Moisés tsi' sube lac Yum: A winicon. C'ʌlʌl che' ch'itoñon to mach wen cujilic t'an anquese wola' pejcañon. C'unte' mic cha'len t'an. Wocol mi' loq'uel c t'an, che'en.

¹¹ Jini cha'an lac Yum tsi' sube: ¿Majqui tsi' melbe i yej winic? ¿Majqui mi' melben i yej x'uma' yic'ot i chiquin xcojc yic'ot i wut xpots'? ¿Mach ba joñonic a Yum?

¹² Cucu, che' jini. Mi caj cajñel yic'ot a wej. Mi caj cʌntesañet chuqui mi caj a sub, che'en.

¹³ Pero tsi' yʌlʌ: Awocolic c Yum, choco majlel yambʌ, che'en.

¹⁴ Che' jini lac Yum tsi' mich'le Moisés. Tsi' yʌlʌ: ¿Mach ba a wʌscunic Aarón jini leví? Wen yujil t'an Aarón. Awilan tal i tajet. Che' mi' q'uelet mi caj i yubin i tijicñʌyel i pusic'al.

¹⁵ Mi caj a pejcan Aarón. Mi caj a wʌq'uen c t'an cha'an mi' sub. Mi caj cajñel quic'otetla ti la' cha'ticlel. Mi caj j coltañetla ti t'an. Mi caj cʌntesañetla chuqui yom mi la' mel.

¹⁶ Aarón mi caj i pejcan winicob x'ixicob. Mi caj i cha' sub chuqui tac ma' suben. I wentajet Dios ti' tojlel Aarón.

¹⁷ Mi caj a chuc ili barate' ti a c'ʌb cha'an ma' pʌs i yejtal c p'ʌtʌlel, che'en Dios.

Moisés tsa' cha' sujti majlel ti Egipto

¹⁸ Moisés tsa' cha' majli ba'an Jetro i nij'al. Tsi' sube: La' majlicon ba'an c pi'ʌlob año' bʌ ti Egipto cha'an mij q'uel mi cuxulob to, che'en. Jetro tsi' sube: Cucu ti' ñʌch'tilel a pusic'al, che'en.

¹⁹ Lac Yum tsi' sube Moisés ya' ti Madián: Sujten ya' ti Egipto, come tsa'ix chʌmiyob pejtel winicob yomo' bʌ i tsʌnsañet, che'en.

²⁰ Che' jini Moisés tsi' pʌyʌ majlel i yijñam yic'ot i yalobilob. Tsi' yʌq'ueyob i c'ʌchtan burro tac. Tsa' majliyob ti' lumal egiptojob. Chucul i cha'an Moisés i barate' Dios.

²¹ Lac Yum tsi' sube Moisés: Che' ma' c'otel ti Egipto, yom ma' pʌsben Faraón pejtel i yejtal tac c p'ʌtʌlel tsa' bʌ c pʌsbeyet, pero mi caj c tsʌts'esan i pusic'al. Ma'anic mi caj i choc majlel jini israelob.

²² Mi caj a suben Faraón: “Lac Yum woli' yʌl: Israel jiñʌch ascuñʌl bʌ calobil.

²³ Mic subeñet: La' majlic calobil cha'an mi' ch'ujutesañon. Mi ma'anic ma' choc majlel jini calobil, mi caj c tsʌnsan jini ascuñʌl bʌ a walobil. Che' tsi' yʌlʌ lac Yum”. Che' yom ma' suben Faraón, che'en lac Yum.

²⁴ Ya' ba' tsa' jijliyob ti bij, lac Yum tsi' taja Moisés cha'an mi' tsʌnsan, come an ch'iton bʌ i yalobil mach bʌ tsepbilic i pʌchʌlel.

²⁵ Pero Séfora tsi' ch'ʌmʌ jay bʌ xajlel. Tsi' bʌc' tsepbe i pʌchʌlel jini ch'iton bʌ i yalobil. Tsi' choco ya' ti' yoc Moisés. Tsi' yʌlʌ: Jontol c ñoxi'al cha'an tsa' bejq'ui i ch'ich'el calobil, che'en.

²⁶ Jini cha'an Dios tsi' cʌyʌ che' bʌ tsi' yʌlʌ i yijñam Moisés: Jontol c ñoxi'al cha'an tsa' bejq'ui i ch'ich'el calobil. Wersa tsac tsepbe i pʌchilel, che'en.

²⁷ Lac Yum tsi' sube Aarón: Cucu taja Moisés ya' ti colem bʌ i tiquiñal lum, che'en. Jini cha'an tsa' majli i taj ya' ti' wits Dios. Tsi' ts'ujts'u.

²⁸ Moisés tsi' sube chuqui tsi' yʌlʌ lac Yum yic'ot bajche' yom melol jini ñuc tac bʌ i yejtal i p'ʌtʌlel che' bajche' cʌntesʌbil ti Dios.

²⁹ Temel tsa' majliyob Moisés yic'ot Aarón cha'an mi' tempañob pejtelel jini ñoxo' bʌ ti Israel.

³⁰ Aarón tsi' laj subeyob che' bajche' lac Yum tsi sube Moisés. Moisés tsi' pʌsbeyob i yejtal tac i p'ʌtʌlel.

³¹ Jini ñoxo' bʌ tsi' ñopoyob che' bʌ tsi' yubiyob mux caj i coltañob lac Yum come q'uelel i cha'an pejtel i wocol jini israelob. Tsi' lijiyob i bʌ cha'an mi' ch'ujutesañob Dios.