Exodo 37 - Chol: I T’an Dios

I melol chuqui mi' c'ʌjñel ti Tabernáculo

¹ Bezaleel tsi' c'ʌñʌ acaciate' i mel jini Arca. An jump'ejl metro yic'ot junc'al centímetro i tamlel, yic'ot 75 centímetro i xujc, yic'ot 75 centímetro chanlel.

² Tsi' tep'e' ti puro oro ti' pat yic'ot ti' mal, yic'ot ti' pam. Tsi' mele ti oro ja'el i ti'il i xujc ti' joytʌlel.

³ Tsi' mele ja'el chʌnxojt tsucu taq'uin melbil bʌ ti oro tsa' bʌ i yʌc'ʌ ti jujunwejl i yoc. An cha'p'ejl ti junwejl yic'ot yambʌ cha'p'ejl ti yambʌ junwejl i xujc.

⁴ Tsi' mele bara tac ja'el melbil bʌ ti te' i c'aba' acacia. Tsi' tep'e ti oro.

⁵ Tsi' jucu tac ochel jini bara ti jujunwejl i xujc Arca ba' xotol tac jini tsucu taq'uin melbil bʌ ti oro cha'an mi mejlel i q'uechob majlel jini Arca.

⁶ Tsi' mele ti oro jini ba' mi' ñusʌbentelob i mul ya' ti' pam jini Arca. I tamlel jiñʌch jump'ejl metro yic'ot 25 centímetro. I xujc jiñʌch 75 centímetro.

⁷ Ti' jujunwejl ba' mi' ñusʌbentelob i mul tsi' yʌc'ʌ i yejtal ángelob, melbil bʌ ti puro oro. Jats'bil ti martillo.

⁸ Tsi' yʌc'ʌ i yejtal ángelob ti jujunwejl. Jini i yejtal ángelob ya' jach tem tsuyul ya' ti' majc jini Arca ba' mi' ñusʌntel mulil.

⁹ Jini ángelob tich'bil i wich' ya' ti' pam jini Arca. Jini i wutob mi' laja q'uelob i bʌ. Che' ja'el lajal mi' q'uelob ya' ba' mi' ñusʌntel mulil.

¹⁰ Tsi' mele jump'ejl mesa ti te' i c'aba' acacia. Jump'ejl metro i tamlel. Ojlil metro i xujc. I chanlel 75 centímetro.

¹¹ Tsi' tep'e ti puro oro. Tsi' melbe i ch'ʌjlil ti oro ti' joytʌlel i ti'il i xujc tac.

¹² Tsi' mele ja'el i ch'ʌjlil ti oro ti' joytʌlel i xujc tac. I weltʌlel jiñʌch che' bajche' jump'ejl pach'c'ʌb. Ya' ti' ti'il tsi' cha' aq'ue yambʌ i ch'ʌjlil ts'ita' ch'och'oquix bʌ ti puro oro ja'el. Bulu tselel tsi' melbe i ch'ʌjlil i ti'il jini i xujc.

¹³ Tsi' mele ja'el chʌnxojt tsucu taq'uin ti oro. Tsi' yʌc'ʌ ya' ti jujunwejl i xujc jini mesa. An jujump'ejl ti jujunts'ijt i yoc jini mesa.

¹⁴ Jini xotol bʌ mi' yajñel ti' ti'il cha'an mi' mejlel ti ochel jini bara tac. Che' jini mi' mejlel ti ch'uyol majlel jini mesa.

¹⁵ Tsi' mele jini bara ti acaciate'. Tsi' tep'e ti puro oro. Jiñʌch cha'an mi' c'ʌñob i ch'uyob majlel jini mesa.

¹⁶ Tsi' c'ʌñʌ puro oro ti' melol jini plato tac yic'ot jini ñuc tac bʌ plato yic'ot jini jara tac cha'an lʌmʌl bʌ majtañʌl tac.

¹⁷ Tsi' mele i ts'ʌjbib c'ajc ti puro oro. Melbil i c'ʌclib yic'ot i te'el ti martillo. Melbil ti martillo ja'el ba' mi' lejmel jini c'ajc tac yic'ot i ch'ʌjlil tac. Jump'ejl jach oro tsa' mejli ti' pejtelel.

¹⁸ An wʌcts'ijt i c'ʌb i yajñib ba' mi' lejmel c'ajc, uxts'ijt i c'ʌb ti jujunwejl.

¹⁹ An uxp'ejl i ch'ʌjlil lajal bʌ che' bajche' i nich te' i c'aba' almendro ti jujunwejl. Ti jujump'ejl i ch'ʌjlil an che' bajche' i yutbal i nich pimel. An i nich ja'el. Che' lajal ti' wʌcts'ijtlel i c'ʌb i ts'ʌjbib c'ajc.

²⁰ Ya' ti' t'ejl ba' mi' lejmel jini c'ajc an chʌmp'ejl i ch'ʌjlil melbil bʌ che' bajche' i nich almendro, am bʌ i yutbal yic'ot i nich ti jujump'ejl.

²¹ Che' ja'el an cha'p'ejl i yutbal ti yebal jini cha'ts'ijt i c'ʌb yic'ot yambʌ cha'p'ejl i yutbal ya' ti yebal jini yambʌ cha'ts'ijt i c'ʌb, yic'ot yambʌ cha'p'ejl i yutbal ti yebal jini yambʌ cha'ts'ijt i c'ʌb. Che' lajal an ti jini wʌcts'ijt i c'ʌb i te'el ba' mi' lejmel jini c'ajc.

²² Pejtelel i yutbal tac yic'ot i c'ʌb tac tsa' mejli ti jump'ejl jach oro. Melbil yic'ot martillo.

²³ Ti puro oro tsi' mele jini wucp'ejl vaso ba' mi' cha'len lejmel jini c'ajc, yic'ot mu' bʌ i c'ʌn i yʌp jini c'ajc. Tsi' melbe i yajñib i tʌñʌl jini c'ajc ja'el.

²⁴ Tsi' c'ʌñʌ lujump'ejl i yuxc'al (50) kilo puro oro ti' melol pejtelel iliyi. Tsi' mele pejtelel chuqui tac yom cha'an mi' c'ʌjñel.

²⁵ Che' ja'el tsi' mele i pulʌntib pom. Tsi' c'ʌñʌ acaciate'. I tamlel jiñʌch ojlil metro ti jujunwejl i xujc. Jump'ejl metro i chanlel. Tsi' melbe i xulub tac, ya' jach tem loq'uem i xulub tac ya' ti' xujc tac jini pulʌntib.

²⁶ Tsi' tep'e ti puro oro, pejtelel ti' joyol, yic'ot i xujc, yic'ot ti' joytʌlel.

²⁷ Ya' ti' yebal i ti' ti' cha'wejlel i xujc tsi' yʌc'ʌ cha'p'ejl xotol tac bʌ tsucu taq'uin melbil bʌ ti oro. Jiñʌch cha'an mi' juc ochel jini bara cha'an mi mejlel i q'uechob.

²⁸ Tsi' c'ʌñʌ acaciate' ti' melol jini bara tac. Tsi' tep'e ti oro ja'el.

²⁹ Che' ja'el tsi' c'ʌñʌ i ña'tʌbal cha'an mi' chajpan ch'ujul bʌ aceite cha'an bojñibʌl. Tsi' mele uts'at bʌ xojocña bʌ pom ja'el.