Exodo 26 - Chol: I T’an Dios

Jini Tabernáculo

^1-2 Woli' chʌn al lac Yum: Che' mi la' mel jini Tabernáculo, jini pisil bʌ otot, yom mi la' c'ʌn lujumpajc lino bʌ pisil, wen uts'at bʌ jalbil, yʌjyʌx bʌ yic'ot chʌccojan bʌ yic'ot chʌchʌc bʌ. Yom jalbil ja'el i yejtal ángelob. Wen melbil yom. Chʌnlujump'ejl (14) metro yom i tamlel jini cortina. Cha'p'ejl metro yom ti' xujc. Yom lajal i ñuclel ti jujump'ejl jini cortina.

³ Jini jujumpajc cortina yom ñuqui tʌc'bil ti jo'pajc, yic'ot jini yambʌ jo'pajc yom ñuqui tʌc'bil ja'el.

⁴ Yom mi la' wʌc' xotol tac bʌ pisil che' bajche' argolla ya' ti' ti'il jini ñaxan bʌ ñuqui tʌc'bil bʌ pisil, yic'ot jini yambʌ ñuqui tʌc'bil yom ja'el.

⁵ Yom lujump'ejl i yuxc'al jini xotol tac bʌ pisil cha'an jini ñaxan bʌ ñuqui tʌc'bil bʌ jini pisil. Jini yambʌ ñuqui tʌc'bil bʌ ja'el ti jo'pajc, yom lujump'ejl i yuxc'al jini xotol tac bʌ ja'el, cha'an mi' mejlel ti tʌjq'uel.

⁶ Che' jini yom mi la' mel lujump'ejl i yuxc'al joc'lib ti puro oro cha'an mi la' c'ʌn la' tʌc' ti' pejtelel jini pisil tac, jinto mi' yujtel la' mel jini Tabernáculo.

^7-8 Yom mi la' mel ja'el pisil melbil bʌ ti' pʌchʌlel chivo cha'an i jol jini Tabernáculo. Yom junlujumpajc che' ti' pejtelel. Jo'lujump'ejl metro yom i tamlel jujump'ejl cortina. Cha'p'ejl metro yom i xujc.

⁹ Yom mi la' laj bʌ ts'is jini jo'pajc cortina. Parte yom mi la' ts'is jini yambʌ wʌcpajc cortina. Yom mi la' pʌc i wʌcp'ejlel cortina ti' tojel jini Tabernáculo.

^10-11 Yom mi la' wʌq'uen lujump'ejl i yuxc'al xotol tac bʌ tsucu taq'uin ya' ti' ti' tac jini cha'pajc cortina. Che' jini yom mi la' mel lujump'ejl i yuxc'al i joc'lib melbil bʌ ti bronce cha'an mi la' wotsan ya' baqui xotol tac jini tsucu taq'uin. Che' mi la' laj bʌ ac' jini tsucu taq'uin tac ya' ti' xujc tac jini cortina jinto mi' yujtel la' mel jump'ejl otot.

¹² Ya' ti' lejch' jini otot, che' tich'bilix jini cortina, i sobrajlel tac jini cortina mu' to bʌ i sobrajʌyel, yom mi' licchocontel ti' pat jini Tabernáculo.

¹³ Jini ojlil metro i colojbal i tamlel jini cortina yom mi la' pʌc jubel ti jujunwejl jini Tabernáculo cha'an mi' mʌctan.

¹⁴ Che' ja'el yom mi la' melben i jol jini Tabernáculo. Melbil yom ti' pʌchʌlel i tat chivo, ts'ajbil bʌ ti chʌchʌc bʌ pintura. Yom i pʌchʌlel chivo ja'el ya' ti' pam.

¹⁵ Yom mi la' wʌq'uen i bojte'lel jini Tabernáculo ti acaciate'. Yom jini wen toj tac bʌ.

¹⁶ Yom jo'p'ejl metro i tamlel, yic'ot ojlil i cha'p'ejl metro i xujc tac.

¹⁷ Ti jujunq'uejl jini tabla yom mi' melbentel i ti', ti' cha'wejlel cha'an ni't'il mi' cʌytʌl. Che'ʌch yom ti' pejtelel jini tabla.

¹⁸ Yom mi la' c'ʌn junc'al tabla cha'an i mʌjquil jini Tabernáculo ya' ti' xujc am bʌ ti sur.

¹⁹ Yom mi la' melben cha'c'al i c'ʌclib ti plata, cha'p'ejl cha'an jujunq'uejl jini tabla.

²⁰ Yom junc'al tabla ja'el ya' ti' junwejlel jini Tabernáculo am bʌ ti norte.

²¹ Yom cha'c'al i c'ʌclib ti plata ja'el, cha'p'ejl cha'an jujunq'uejl tabla.

²² Yom wʌcq'uejl tabla cha'an i pat jini Tabernáculo ya' ti' xujc ba' mi' bʌjlel q'uin.

²³ Yom cha'q'uejl tabla ya' ti xujc tac ya' ti' pat jini Tabernáculo.

²⁴ Yom junlajal mi' c'otel yic'ot jini yambʌ i tablajlel tac, yic'ot wen ni't'il yom mi' c'otel ti' chañelal yic'ot ti yebal.

²⁵ Che' jini yom waxʌq'uejl tabla yic'ot i c'ʌclib melbil bʌ ti plata. Ti' pejtelel jiñʌch wʌclujump'ejl i c'ʌclib, cha'p'ejl i c'ʌclib ti jujunq'uejl tabla.

²⁶ Che' ja'el yom mi la' mel jo'ts'ijt bara cha'an mi' yajñel ti junwejl jini Tabernáculo.

²⁷ Yic'ot yambʌ jo'ts'ijt cha'an mi' yajñel ya' ti yambʌ junwejl jini Tabernáculo, yic'ot yambʌ jo'ts'ijt cha'an mi' yajñel ya' ti' pat ba' mi' bʌjlel q'uin.

²⁸ Jini yambʌ bara yom mi' ñumel ti' yojlil jini tabla ti jujunwejl ya' ti' yojlil jini Tabernáculo.

²⁹ Yom mi la' tep' ti oro jini tabla tac. Yom xotol tac bʌ melbil bʌ ti oro cha'an ya'i mi' ñumel jini bara. Yom mi la' tep' jini bara tac ti oro ja'el.

³⁰ Yom mi la' wa'chocon jini Tabernáculo che' bajche' tsac pʌsbeyet ya' ti wits.

Jini cortina am bʌ ti mal

³¹ Yom mi la' mel colem pisil cha'an mi' joc'tʌl ti mal, yom yʌjyʌx bʌ yic'ot chʌccojan bʌ yic'ot chʌchʌc bʌ, wen jalbil bʌ ti lino, yic'ot i yejtal tac ángelob.

³² Joc'chocon jini cortina ti chʌmp'ejl i joc'lib melbil bʌ ti oro am bʌ ti chʌnts'ijt te' melbil bʌ ti acaciate', tep'bil bʌ ti oro. Yom i c'ʌclib jini te' tac ti plata.

³³ Joc'chocon jini pisil ti joc'lib tac. Yom mi la' wotsan jini Arca cha'an i ña'tʌntel jini T'an ya' ti' yojlil jini cortina. Jiñʌch mu' bʌ i t'ox jini Ch'ujul bʌ Ajñibʌl yic'ot jini C'ax Ch'ujul bʌ Ajñibʌl.

³⁴ Yom mi la' wʌc' ya' ti C'ax Ch'ujul bʌ Ajñibʌl i majc jini Arca melbil bʌ ti oro. Jiñʌch ba' mi' ñusʌntel mulil.

³⁵ Jini mesa yom mi la' wʌc' ti' tojel jini jo'c'ol bʌ pisil. Yom jini ba' mi' ts'ʌjbel c'ajc ti' tojel jini mesa ti sur cha'an jini Ch'ujul bʌ Ajñibʌl. Jini mesa yom ma' wʌc' ti norte.

³⁶ Yom mi la' mel jump'ejl cortina cha'an i majc i ti' Tabernáculo. Yom wen jalbil bʌ lino. Yom wen joch'bil ti yʌjyʌx bʌ ti chʌccojan bʌ yic'ot ti chʌchʌc bʌ.

³⁷ Yom mi la' mel jo'ts'ijt te' ti acacia cha'an mi la' joc'chocon jini cortina. Yom mi la' tep' ti oro. Yom i joc'lib melbil ti oro. Yom jini jo'p'ejl i c'ʌclib melbil ti bronce.