Exodo 25 - Chol: I T’an Dios

Jini majtañʌl cha'an Tabernáculo

^1-2 Lac Yum tsi' sube Moisés: Subeñob jini israelob cha'an mi' yʌq'ueñoñob c majtan. La' i yʌc'ob ti' yutslel i pusic'al majqui jach yom. Ch'ʌmbeñon tilel c majtan tac am bʌ ti ili lista:

^3-7 oro, plata, bronce, yʌjyʌx bʌ pisil, chʌccojan bʌ pisil, chʌchʌc pisil, lino pisil, chʌchʌc bʌ i pʌchʌlel i tat tiñʌme', i pʌchʌlel chivo, te' i c'aba' acacia, i ya'lel olivo cha'an c'ajc, pom, xajlel i c'aba' ónice, yic'ot ujʌl cha'an mi' ts'istʌl ochel ti' bujc motomajob i c'aba' efod yic'ot ti' majquil i bujc.

⁸ Com mi' mel israelob jump'ejl Tabernáculo, jiñʌch ch'ujul bʌ otot cha'an mi cajñel yic'otob.

⁹ Yom mi' melbeñoñob jini Tabernáculo ti pisil che' bajche' mi caj c tsictesan. Jiñʌch i planojlel jini pisil bʌ otot yic'ot i planojlel chuqui tac yom c'ʌñol cha'an jini Tabernáculo.

Jini Arca ba' mi' lojtel i T'an Dios

¹⁰ Yom mi la' c'ʌn acaciate' ti' melol Arca. Yom i tamlel jump'ejl metro yic'ot junc'al centímetro, yic'ot 75 centímetro ti' xujc, yic'ot 75 centímetro i chanlel.

¹¹ Yom mi la' tep' ti puro oro ya' ti' mal yic'ot ti' pat. Yom mi la' wʌc' ti' joytʌlel i ti' ti'il i xujc tac, melbil bʌ ti puro oro ja'el.

¹² Yom mi la' mel ja'el chʌmp'ejl xotol tac bʌ oro cha'an ma' wʌc' ya' ti jujunwejl i xujc. Yom cha'p'ejl ti junwejl yic'ot yambʌ cha'p'ejl ti yambʌ junwejl i xujc.

¹³ Yom mi la' mel bara tac ja'el melbil bʌ ti te' i c'aba' acacia. Yom mi la' tep' ti oro.

¹⁴ Yom mi la' juc ochel jini bara tac ti jujunwejl i xujc jini Arca ba' an xotol tac melbil bʌ ti oro, cha'an mi la' q'uech majlel jini Arca baqui jach yom.

¹⁵ Yom mi' cʌytʌl jini bara tac ya' ti jini xotol tac bʌ tsucu taq'uin. Mach yomic mi' loc'sʌntel.

¹⁶ Jini T'an mu' bʌ caj cʌq'ueñet yom ma' wotsan ya' ti' mal jini Arca.

¹⁷ Yom mi la' melben i majc jini Arca ya' ti' pam ba' mic ñusʌben i mul winicob x'ixicob. Yom i tamlel jump'ejl metro yic'ot junc'al centímetro. Yom i xujc 75 centímetro. Yom i chanlel 75 centímetro ja'el.

¹⁸ Yom mi la' mel cha'tiquil i yejtal ángelob ti puro oro, melbil yom ti martillo.

¹⁹ Yom mi la' wʌc' ti jujunwejl ya' ba' mi caj c ñusʌbeñob i mul jini winicob x'ixicob.

²⁰ Jini i yejtal jini ángelob tich'bil yom i wich' ya' ti' pam jini Arca. Jini i wutob yom mi' q'uelob ya' ba' mi caj c ñusʌbeñob i mul jini winicob x'ixicob.

²¹ Yom ma' wʌq'uen i majc jini Arca ya' ti' pam. Mi caj a wotsan ti' mal jini Arca jini T'an mu' bʌ caj cʌq'ueñet.

²² Mi caj lac taj lac bʌ ya'i. Mi caj lac tem cha'len t'an ya' ti' pam jini Ajñibʌl ba' mic ñusan mulil ya' ti' yojlil jini cha'tiquil i yejtal ángelob. Pejtelel jini t'an mu' bʌ caj c subeñet mi caj i yajñel ya' ti' mal Arca. Mi caj c subeñet pejtelel jini mandar tac yom bʌ mi' jac'ob jini israelob.

Jini mesa cha'an waj

²³ Yom mi la' mel jump'ejl mesa ti acaciate'. I tamlel yom jump'ejl metro. Yom ojlil metro i xujc. Yom 75 centímetro i chanlel.

²⁴ Yom mi la' tep' ti puro oro. Tep'bil yom ja'el ti' joytʌlel i xujc tac i ti' ti'il ti puro oro.

²⁵ Yom mi la' melben che' bajche' ojlil pach' c'ʌb i ñuclel i ch'ʌjlil i xujc tac jini mesa ti' joytʌlel. Mele ja'el yambʌ i ch'ʌjlil i ti' ti'il i xujc tac pero mero ch'o'ch'oc yom i ti'il ti oro.

²⁶ Yom mi la' mel chʌnxojt oro cha'an mi la' wʌc' ya' ti jujunwejl i xujc jini mesa. Yom junxojt ya' ti jujunts'ijt i yoc jini mesa am bʌ ti chan, mach ya'ic ti' yebal i yoc jini mesa.

²⁷ Jini xotol tac bʌ mi caj i yajñel ya' ti' xujc tac cha'an mi' mejlel ti ochel jini bara tac, cha'an ja'el mi' mejlel ti ch'ujyel majlel jini mesa.

²⁸ Yom mi la' c'ʌn acaciate' ti' melol jini bara tac. Tep'ela ti oro.

²⁹ Yom mi la' mel ti oro jini plato tac, yic'ot cuchara tac, yic'ot jara tac, yic'ot colem taza tac. Iliyi mi caj i c'ʌjñel cha'an lʌmʌl tac bʌ majtañʌl.

³⁰ Yom mi la' wʌc' jini pan ya' ti mesa cha'an mi' yajñel tic tojlel ti pejtelel ora.

Lámpara melbil bʌ ti oro

³¹ Yom mi la' mel ja'el jump'ejl lámpara ba' mi' ts'ʌjbel c'ajc, yom melol ti puro oro. Yom mi la' mel ti martillo i c'ʌclib yic'ot i te'el. Melbil yom ti martillo ja'el i copa tac yic'ot i ch'ʌjlil tac. Junxojt jach jini oro mi caj i mejlel ti' pejtelel.

^32-33 Yom wʌcts'ijt i c'ʌb i te'el jini c'ajc tac, uxts'ijt i c'ʌb ti jujunwejl i te'el. Yom uxp'ejl i ch'ʌjlil lajal bajche' i nich jini almendro ti jujunts'ijt i c'ʌb. Ti jujump'ejl i ch'ʌjlil yom an che' bajche' i yutbal i nich pimel.

^34-35 Ya' ti' te'el i buchlib c'ajc yom ch'ʌmp'ejl copa che' lajal bajche' i nich almendro, ya' ti' xʌc' tac. Che' ja'el yom jump'ejl che' bajche' i nich pimel ya' ti' ni' tac i c'ʌb yic'ot ya' ti yebal tac i c'ʌb.

³⁶ Pejtelel i yutbal tac yic'ot i c'ʌb tac, yic'ot i te'el, yom melol ti junq'uejl jach oro jats'bil ti martillo.

³⁷ Che' ja'el yom mi la' mel wucp'ejl ba' mi' tsujq'uel jini c'ajc, cha'an mi la' tsuc' cha'an mi' pʌs i c'ʌc'al ti' tojlel la' wut.

³⁸ Jini mu' bʌ la' c'ʌn cha'an mi la' yʌp jini c'ajc yic'ot i yajñib i tʌñʌl jini c'ajc melbil yom ti puro oro.

³⁹ Yom mi la' c'ʌn lujump'ejl i yuxc'al (50) kilo puro oro cha'an pejtelel mu' bʌ i c'ʌjñel cha'an ba' mi' ts'ʌjbel jini c'ajc.

⁴⁰ Wen q'uele bajche' yilal wolic pʌsbeñet cha'an che'i mi la' mel pejtelel che' bajche' wolic pʌsbeñet ila ti wits. Che' tsi' yʌlʌ lac Yum.