Exodo 21 - Chol: I T’an Dios

Mandar cha'an mozojintel

^1-2 Jiñʌch mandar tac yom bʌ ma' sub: “Che' ma' mʌn winic cha'an mi' cha'len to'ol e'tel, mi hebreo, wʌcp'ejl jab mi caj i cha'len e'tel. Ti' wucp'ejlel jab mi caj i loq'uel ti libre.

³ Mi tsa' tili ti' bajñel, ti' bajñel mi cha' loq'uel. Mi tsa' tili yic'ot i yijñam temelob mi caj i loq'uelob.

⁴ Mi tsi' taja i yijñam che' an ti' tojlel i yum, mi tsi' yila pañimil i yalobil, mi ch'iton mi xch'oc, mi caj i cʌytʌlob ti' tojlel i yum come i yum tsi' yʌq'ue i yijñam. I bajñel jach mi' loq'uel jini winic.

⁵ Mi tsi' yʌlʌ jini x'e'tel: C'ux mi cubin c yum quic'ot quijñam quic'ot calobilob. Mach comic loq'uel, mi che'en,

⁶ i yum mi caj i pʌy majlel ba' mi' yujtel meloñel. Ya' ti poste ba'an i puertajlel o mi chumte', i yum mi caj i ch'uben i chiquin ti tsucul taq'uin. Mux i yochel ti to'ol e'tel ti' wenta i yum ti pejtelel ora.

⁷ Mi tsa' ochi ti to'ol e'tel juntiquil xch'oc cha'an tsi' choño i tat, ma'anic mi' caj ti loq'uel che' bajche' winicob.

⁸ Mi mach chʌn yomix i q'uel i yum, mach mejlic i chomben caxlañob mi tsa'ix i pi'le, come mach wenic chuqui tsi' melbe jini xch'oc. La' tilicob i pi'ʌlob cha'an mi' mʌñob loq'uel ti' wenta i yum.

⁹ Mi tsi' pʌyʌ cha'an ch'iton bʌ i yalobil, yom mi' cʌntan jini xch'oc che' bajche' i yalobil.

¹⁰ Mi tsi' pi'le, mi ti wi'il tsi' pʌyʌ yambʌ x'ixic cha'an i yijñam, ts'ʌcʌl yom mi' chʌn aq'uen i bʌl i ñʌc' yic'ot i pislel jini ñaxan bʌ i yijñam. Yom ja'el mi' chʌn ajñel yic'ot.

¹¹ Mi ma'anic mi' melben ili uxchajp mi mejlel ti loq'uel ti' tojlel. Che' jini ma'anic mi' tojbentel.

Mandar cha'an jontolil

¹² Mi an mu' bʌ i low i pi'ʌl, mi tsa' chʌmi, mux i tsʌnsʌntel jini stsʌnsa.

¹³ Pero mi ma'anic tsi' chijta i pi'ʌl, mi tsi' tsʌnsa che' mach ña'tʌbilic i cha'an, mi mejlel ti puts'el majlel ti jump'ejl ajñibʌl yajcʌbil bʌ c cha'an.

¹⁴ Pero mi tsi' tsʌnsa i pi'ʌl cha'an yom i tsʌnsan, cha'an woli' mich'len anquese mi' majlel ti puts'el ba'an jini pulʌntib, wersa mi caj i chujquel cha'an mi' tsʌnsʌntel.

¹⁵ Majqui jach mi' jats' i tat i ña' wersa mi' caj ti chʌmel.

¹⁶ Majqui jach mi' xujch'in winic cha'an mi' chon, mi tsa' tajle yic'ot jini xujch'ibil bʌ winic, mi caj i tsʌnsʌntel.

¹⁷ Majqui jach mi' p'aj i tat i ña' mi caj i tsʌnsʌntel.

¹⁸ Che' mi' cajelob ti leto cha'tiquil winicob, mi tsa' lojwi juntiquil ti xajlel mi ti' c'ʌb, mi ma'anic tsa chʌmi, mi ñolol jach ti' wʌyib,

¹⁹ mi tsa' mejli ti loq'uel yic'ot i te', ma'anic mi caj i tsʌnsʌntel jini tsa' bʌ i lowo. Mu' jach caj i tojben i q'uin tsa' bʌ i sʌtʌ. Mi caj i ts'ʌcan ja'el.

²⁰ Mi an majqui tsi' jats'ʌ xmajtan e'tel, mi winic, mi x'ixic, mi tsa' chʌmi, wersa mi caj i toj i mul.

²¹ Mi cuxul to cha'p'ejl uxp'ejl q'uin, ma'anic mi' toj come i winicʌch.

²² Che' woliyob ti leto winicob, mi tsi' taja i jats' x'ixic cʌntʌbil bʌ i cha'an alʌl, mi tsa' puts'i i yalobil, pero ma'anic yambʌ wocol, mi caj i toj multa jini tsa' bʌ i jats'ʌ che' bajche' c'amel mi' yʌl i ñoxi'al yic'ot jini juez.

^23-25 Pero mi an yambʌ i wocol jini x'ixic cha'an tsa' jajts'i, yom mi' cha' q'uextʌbentel, mi i cuxtʌlel, mi i wut, mi i bʌquel i yej, mi i c'ʌb, mi i yoc, mi tsa' puli, mi tsa' lojwi, mi tsa' jajts'i.

²⁶ Mi an majqui mi' jats'ben i wut jini xmajtan e'tel, mi tsa' tojmi jump'ejl i wut, mux i colel cha'an ti' caj i wut.

²⁷ Mi tsi' c'ocbe loq'uel i bʌquel i yej mi' loq'uel ti libre jini xmajtan e'tel.

Mandar tac am bʌ ti' wenta jini yumʌlob

²⁸ Mi an tat wacax mu' bʌ i lujchin juntiquil i pi'ʌl, mi tsa' chʌmi, wersa mi' tsʌnsʌntel jini wacax ti xajlel. Mach mejlic ti c'uxtʌl i bʌc'tal jini wacax. Ma'anic i mul i yum wacax.

²⁹ Pero mi i tilelʌch mi' cha'len lujchiya jini wacax, mi tsa' subenti i yum, pero ma'anic tsi' jac'ʌ i mʌc, mi tsi' tsʌnsa winic, wersa mi' jujlel ti xajlel jini wacax. Mi caj i tsʌnsʌntel i yum ja'el.

³⁰ Mi tsi' c'ajti multa i pi'ʌlob jini chʌmen bʌ, wersa mi' toj. Che' jini ma'anic mi' chʌmel.

³¹ Che' ja'el mi tsi' lujchi ch'iton mi xch'oc, i yum jini wacax mi caj i toj.

³² Mi tsi' lujchi xmajtan e'tel, i yum wacax mi caj i tojben i yum xmajtan e'tel lujump'ejl i cha'c'al sʌsʌc taq'uin. Jini wacax mi caj i jujlel ti xajlel.

³³ Che' an majqui mi' jam cʌytʌl pozo, mi tsa' ochi wacax mi burro ya' ba' tocol,

³⁴ i yum pozo mi caj i tojben i yum alʌc'ʌl. Che' jini i cha'anix i bʌc'tal alʌc'ʌl come tsi' tojo.

³⁵ Mi an tat wacax mu' bʌ i lowben i tat wacax yambʌ winic, mi caj i choñob jini cuxul to bʌ wacax. Mi caj i t'oxbeñob i bʌ i tojol. Mi caj i t'oxob ja'el jini chʌmen bʌ wacax.

³⁶ Mi tsi' ña'ta i yum mi jontol i tat wacax, pero ma'anic tsi' mʌcʌ, wersa mi caj i yʌq'uen i q'uexol wacax, pero mi' ch'ʌm jini chʌmen bʌ.