Exodo 19 - Chol: I T’an Dios

Jini israelob ya' ti Sinaí

¹ Che' loq'uemobix israelob ti Egipto, che' ti' yuxp'ejlel uw ti jini naxan bʌ tsic, tsa' c'otiyob ya' ti colem bʌ i tiquiñal lum i c'aba' Sinaí.

² Tsa' loq'uiyob ti Refidim, tsa' majliyob ti colem bʌ i tiquiñal lum i c'aba' Sinaí. Tsa' jijliyob ti tiquin bʌ lum ya' ti' tojel wits.

³ Moisés tsa' letsi ti wits cha'an mi' taj Dios. Lac Yum tsi' pejca ya' ti wits. Tsi' yʌlʌ: Subeñob i p'olbal Jacob, jini israelob:

⁴ “Tsa'ix la' q'uele chuqui tsac tumbeyob egiptojob. Tsac pʌyʌyetla tilel che' bajche' ti' wich' xiye' cha'an mi la' ñochtañon.

⁵ Mi xuc'ul mi la ñich'tʌbeñon c t'an, mi uts'at mi la' jac' jini xuc'ul bʌ c t'an, mi caj la' wochel tic cha'an ti' tojlel pejtelel colem tejclum tac, come c cha'añʌch pejtelel pañimil.

⁶ Mi caj la' wochel ti motomaj yic'ot ti ch'ujul. Mi caj la' yumʌntel”. Jiñʌch mu' bʌ caj a cha' subeñob israelob, che'en lac Yum.

⁷ Jini cha'an tsa' tili Moisés i pʌy ñoxobix bʌ israelob. Tsa' caji i tsictesʌbeñob pejtel ili t'an tsa' bʌ i yʌlʌ lac Yum ti mandar.

⁸ Comol tsi' jac'ʌyob pejtel winicob x'ixicob: Mi caj c mel lojon che' bajche' tsi' yʌlʌ lac Yum, che'ob. Moisés tsi' cha' sube lac Yum chuqui tsi' yʌlʌyob.

⁹ Lac Yum tsi' sube: Awilan, talon ba' añet ti i'ic' bʌ tocal, cha'an mi' yubiñob jini israelob che' mic pejcañet, cha'an mi' q'ueletob ti ñuc ti pejtelel ora.

¹⁰ Cucu subeñob, la' i wʌn chajpañob i bʌ wʌle yic'ot ijc'ʌl. La' i wuts'ob i pislel.

¹¹ Yom chajpʌbilobix chabi. Come chabi lac Yum mi caj i jubel ya' ti Sinaí ti' tojel pejtelel winicob x'ixicob.

¹² Mi caj a mel mojon tac ya' ti' joytilel jini wits cha'an mach mi' ñumelob. Subeñob: “Chʌcʌ q'uele la' bʌ cha'an ma'anic mi la' letsel ti wits. Mach yomic ja'el mi la' tʌl jini wits. Majqui jach mi' tʌl jini wits wersa mi caj i chʌmel.

¹³ Mi caj la' jul ti xajlel jini am bʌ i mul, pero mach yomic mi la' tʌl. Mi tsa' letsi ti wits i bʌte'el mi caj la' jul ti jalʌjb. Mach mejlix i chʌn cuxtiyel”. Che' yom ma' subeñob. Che' mi' yubintel c'am bʌ i t'an trompeta, mi caj i ñochtañob ili wits, che'en lac Yum.

¹⁴ Moisés tsa' jubi ti wits cha'an mi' subeñob. Tsi' yʌc'ʌyob ti' wenta Dios. Tsi' wuts'uyob i pislel.

¹⁵ Moisés tsi' subeyob: Yom chajpʌbiletix la chabi. Mach yomic mi la' ñochtan x'ixicob, che'en.

¹⁶ Che' ti sʌc'ajel ti' yuxp'ejlel q'uin tsa' caji ti tojmel tac chajc. An i xu'il tac chajc yic'ot i'ic' bʌ tocal ya' ti wits, yic'ot c'am bʌ i t'an trompeta. Tsiltsilñayob ti bʌq'uen pejtelel winicob x'ixicob ya' ti xchumtʌl.

¹⁷ Moisés tsi' pʌyʌyob loq'uel ba' jijlemob cha'an mi' tajob Dios. Ya' tsa' cʌleyob ti yebal wits.

¹⁸ Tsa' joy ic'a ti buts' jini Sinaí wits, come lac Yum tsa' jubi tilel ti pam wits ti c'ajc. Jini buts' tomocña tsa' letsi che' bajche' i buts'il horno. Tsiltsilñayob ti bʌq'uen pejtelel winicob x'ixicob.

¹⁹ Tsa' bej caji ti c'am bʌ t'an trompeta. Moisés tsi' cha'le t'an. Dios tsi' jac'ʌ yic'ot i t'an chajc.

²⁰ Tsa' jubi tilel lac Yum ti' pam Sinaí wits. Lac Yum tsi' pʌyʌ letsel Moisés ya' ti pam wits. Che' bʌ tsa' letsi Moisés, lac Yum tsi' sube:

²¹ Yom ma' cha' jubel cha'an ma' wʌq'ueñob mandar a pi'ʌlob, cha'an mach mi' ñumelob ba'an mojon tac cha'an mi' q'ueloñob, ame chʌmicob cabʌlob.

²² La' ajnicob ti ch'ujul jini motomajob mu' bʌ caj i lʌc'tesañob ame mij contrajiñob.

²³ Moisés tsi' sube lac Yum: Mach mejlicob ti letsel ti Sinaí wits come tic'bilob. Tsa' subeyon cha'an mi cʌq'uen i mojonlel tac ili wits, cha'an mi' q'uejlel ti ch'ujul, che'en Moisés.

²⁴ Lac Yum tsi' sube: Yom ma' cha' jubel. Pʌyʌ letsel Aarón awic'ot. Pero subeñob jini motomajob yic'ot winicob x'ixicob mach yomic mi' c'axelob ba'an mojon tac cha'an mi' tilelob ba' añon, ame mij contrajiñob, che'en lac Yum.

²⁵ Jini cha'an Moisés tsa' majli i subeñob winicob x'ixicob che' bajche' tsi' yʌlʌ Dios.