Exodo 17 - Chol: I T’an Dios

Tsa' loq'ui ja' ti xajlel

¹ Pejtel jini tejclum tsa' majli ti colem bʌ i tiquiñal lum i c'aba' Sin, che' bajche' tsi' subeyob lac Yum. Tsa' jijliyob ya' ti Refidim ba' ma'anic ja' cha'an mi' japob.

² Jini cha'an jini israelob tsi' yʌ'leyob Moisés. Tsi' yʌlʌyob: Aq'ueñon lojon c ja'al, che'ob. Moisés tsi' subeyob: ¿Chucoch mi la' wʌ'leñon? ¿Chucoch mi la' wilʌben i pusic'al lac Yum? che'en.

³ Tiquiñob i ti'. Jini cha'an tsi' yʌ'leyob Moisés. Tsi' yʌlʌyob: ¿Chucoch tsa' pʌyʌyon lojon loq'uel ti Egipto cha'an ma' tsʌnsañon lojon ti tiquin ti' yic'ot calobil lojon yic'ot cʌlac' lojon? che'ob.

⁴ Jini cha'an Moisés c'am tsi' pejca lac Yum: ¿Chuqui yom mic melbeñob ili winicob x'ixicob? Yomob i julon ti xajlel, che'en.

⁵ Lac Yum tsi' sube Moisés: Cucu ti' tojlel winicob x'ixicob. Pʌyʌ majlel lamital jini xñoxob año' bʌ ti Israel. Ch'ʌmʌ a barate' tsa' bʌ a c'ʌñʌ che' bʌ tsa' jats'ʌ jini Nilo. Cucu ba' añob.

⁶ Awilan, mi caj c wa'tʌl ti a tojlel ya' ti xajlel am bʌ ti Horeb. Mi caj a jats' jini xajlel. Mi caj i loq'uel ja' cha'an mi' japob, che'en. Che'ʌch tsi' mele Moisés ba' tsi' q'ueleyob jini xñoxob año' bʌ ti Israel.

⁷ Tsi' yotsʌbe i c'aba' Masah: “I yilʌbentel i pusic'al”, yic'ot Meriba, “Tsi' letsayob i t'an”, jini ajñibʌl ba' tsi' cha'leyob a'leya jini israelob. Tsi' yilʌbeyob i pusic'al lac Yum che' bʌ tsi' yʌlʌyob: ¿Am ba lac Yum ti lac tojlel o tsa' ba cʌleyonla? che'ob.

Tsi' cha'leyob guerra yic'ot amalecob

⁸ Tsa' tiliyob amalecob. Tsi' cha'leyob guerra ti' contra israelob ya' ti Refidim.

⁹ Moisés tsi' sube Josué: Yajcan winicob cha'an ma' pʌyob majlel ti guerra ti' contra jini amalecob. Ijc'ʌl mi caj c wa'tʌl ti' jol wits, chucul c cha'an i te' Dios, che'en.

¹⁰ Josué tsi' cha'le che' bajche' tsi' sube Moisés. Tsa' tili i contrajinob ti guerra i winicob Amalec. Moisés yic'ot Aarón yic'ot Hur tsa' letsiyob ti' jol wits.

¹¹ Che' bʌ tsi' letsa i c'ʌb Moisés tsa' mʌjli i cha'an Israel. Che' bʌ tsi' cha' ju'sa i c'ʌb, tsa' mʌjli i cha'an Amalec.

¹² Tsa' lujba i c'ʌb Moisés. Jini cha'an tsi' yʌc'ʌyob xajlel cha'an mi' buchtan. Aarón yic'ot Hur tsi' ch'uybeyob i c'ʌb Moisés, jujuntiquil ti jujunwejl. Che' jini chʌn sʌts'ʌl tsa' cʌle i c'ʌb c'ʌlʌl tsa' bʌjli q'uin.

¹³ Josué tsi' jisa jini amalecob ti espada.

¹⁴ Lac Yum tsi' sube Moisés: Ts'ijban ti jun chuqui tsa' ujti cha'an mi' chʌn ñatʌntel. Suben Josué cha'an mi caj c lu' jisan amalecob ti pañimil cha'an ma'anic mi' chʌn ña'tʌntelob, che'en.

¹⁵ Moisés tsi' mele pulʌntib. Tsi' yotsʌbe i c'aba': Lac Yum jiñʌch lac bandera. Anʌch i sujmlel come mi' coltañonla lac Yum cha'an mi' mʌjlel lac cha'an.

¹⁶ Tsi' yʌlʌ: La' lac letsan laj c'ʌb ti' tojel i buchlib lac Yum. Lac Yum mi caj i cha'len guerra ti' contra amalecob ti pejtelelel ora, che'en.