Exodo 16 - Chol: I T’an Dios

Dios tsi' yʌq'ueyob jini maná

¹ Pejtelel jini israelob tempʌbilo' bʌ ti mojt ti mojt tsa' loq'uiyob ti Elim. Tsa' majliyob ti colem bʌ i tiquiñal lum i c'aba' Sin am bʌ ti ojlil ba'an Elim yic'ot Sinaí. Tsa' c'otiyob che' ti jo'lujump'ejlel tsic che' ti cha'p'ejlel uw che' loq'uemobix ti Egipto.

² Pejtelel jini israelob ti mojt ti mojt tsi' letsayob i t'an ti' contra Moisés yic'ot Aarón ya' ti colem bʌ i tiquiñal lum.

³ Tsi' subeyob: Uts'at tsa'ic i jisayonla lac Yum ya' ti' lumal egiptojob ba' tsa' buchleyonla ti we'el ba' jasʌl tsa' laj c'uxu waj, come tsa'ix a pʌyʌyon lojon tilel ba' tiquin lum cha'an ma' tsʌnsañon ti wi'ñal tic pejtelel lojon, che'ob.

⁴ Lac Yum tsi' sube Moisés: Awilan, mi caj c chocbeñetla tilel i bʌl la' ñʌc' tilem bʌ ti panchan. Jini winicob x'ixicob mi caj i loq'uelob cha'an mi' tempañob bajche' c'amel yom ti jujump'ejl q'uin. Che' jini mi caj j q'uelbeñob i pusic'al cha'an mi' tsictiyel mi mux caj i cha'leñob xʌmbal che' bajche' ts'ijbubil tic mandar.

⁵ Che' ti' wʌcp'ejlel q'uin yom mi' tempañob i bʌl i ñʌc' cha'an cha'p'ejl q'uin, che'en.

⁶ Jini cha'an Moisés yic'ot Aarón tsi' subeyob: Che' ti ic'ajel mi caj la' ña'tan jiñʌch lac Yum tsa' bʌ i pʌyʌyetla loq'uel ti Egipto.

⁷ Che' ti sʌc'ajel mi caj la' q'uel i ñuclel lac Yum, come tsi' yubi che' woliyetla ti wulwul t'an ti' contra. ¿Chuqui c mul lojon? ¿Chucoch woliyetla ti wulwul t'an tij contra lojon? che'en Moisés.

⁸ Moisés tsi' cha' alʌ: Lac Yum mi caj i yʌq'ueñetla la c'ux we'elʌl ti ic'ajel. Mi caj i yʌq'ueñetla waj che' ti sʌc'ajel che' bajche' c'amel la' wom. Che' jini mi caj la' ña'tan lac Yum tsi' yubi che' bʌ tsa' la' cha'le wulwul t'an ti' contra. Woli la' contrajin Dios che' mi la' contrajiñon lojon, che'en.

⁹ Moisés tsi' sube Aarón: Subeñob pejtel israelob che' tempʌbilob ti junmojt: “Ñochtanla lac Yum come tsi' yubi che' bʌ tsa' la' cha'le wulwul t'an”. Che' yom ma' subeñob, che'en.

¹⁰ Jini cha'an Aarón tsi' tempa tilel jini israelob. Che' woli to i pejcañob, tsi' q'ueleyob pañimil ya' ti' tojel colem bʌ i tiquiñal lum. Awilan, tsa' tsictiyi i ñuclel lac Yum ya' ti tocal.

^11-12 Lac Yum tsi' sube Moisés: Tsa'ix cubi che' bʌ tsi' cha'leyob wulwul t'an jini israelob. Subeñob: “Che' ti ic'ajel mi caj la' c'ux we'elʌl. Che' ti sʌc'ajel mi caj la' ñaj'an ti waj. Che' jini mi caj la' ña'tan joñon la' Yumon la' Dioson”. Che' yom ma' subeñob, che'en Dios.

¹³ Che' ti ic'ajel tsa' tili wen cabʌl xculucap ti pejtelel xchumtʌl. Che' ti sʌc'ajel an ye'eb ti lum ya' ti' joytilel.

¹⁴ Che' bʌ tsa' tiqui i ye'eb lum ya'an jini biq'uit tac bʌ ti lum che' bajche' i sujl chʌy, che' bajche' i ña'al tsʌñal.

¹⁵ Che' bʌ tsi' q'ueleyob jini israelob, tsi' c'ajtibeyob i bʌ: ¿Chuqui jini? che'ob. Come ma'anic tsi' cʌñʌyob. Moisés tsi' subeyob: Jiñʌch i bʌl la' ñʌc' tsa' bʌ i yʌq'ueyetla lac Yum cha'an mi la' c'ux.

¹⁶ Tsi' yʌlʌ lac Yum: “Tempanla ti jujuntiquiletla che' bajche' c'amel yom mi la' c'ux. Ch'ʌmʌla che' bajche' c'amel mi mejlel la' c'ux, u'uxp'is cha'an jujuntiquiletla ti jujump'ejl otot”. Che' tsi' yʌc'ʌ mandar lac Yum, che'en Moisés.

¹⁷ Che'ʌch tsi' meleyob jini israelob. Lamital on tsi' tempayob. Yaño' bʌ mach onic tsi' tempayob.

¹⁸ Che' bʌ tsi' laj p'isiyob jasʌl cha'an pejtelelob. Ma'anic i colojbal. Jini tsa' bʌ i tempa ts'ita' jaxacña tsa' jili. Ti jujuntiquilob tsi' tempayob che' bajche' c'amel tsa' mejli i c'uxob.

¹⁹ Moisés tsi' subeyob: Mach yomic mi' la' lot mi ts'ita'ic cha'an ijc'ʌl, che'en.

²⁰ Pero ma'anic tsi' jac'beyob. Cha'tiquil uxtiquil tsi' lotoyob lamital cha'an i yijc'ʌlal. Tsa' p'ojli i motso'lel. Tujwix tsa' majli. Moisés tsi' mich'leyob.

²¹ Ti jujump'ejl sʌc'ajel tsi' tempayob i bʌl i ñʌc' ti jujuntiquil che' bajche' c'amel tsa' mejli i c'uxob. Pero che' c'uxix q'uin tsa' ulmi.

²² Che' ti wʌcp'ejlel q'uin on tsi' tempayob cha'an cha'p'ejl q'uin, wʌwʌcp'is ti jujuntiquil. Pejtel año' bʌ i ye'tel ti' tojlel jini tejclum Israel tsa' tili i subeñob Moisés.

²³ Moisés tsi' subeyob: Lac Yum tsi' yʌlʌ: “Ijc'ʌl mi caj la' c'aj la' wo. Jiñʌch ch'ujul bʌ c'aj o cha'an mi la' ch'ujutesan lac Yum. Pojponla chuqui yom. Ch'ʌxʌla chuqui yom. Lotola i colojbal cha'an ijc'ʌl”. Che' tsi' yʌlʌ lac Yum, che'en Moisés.

²⁴ Che' jini tsi' lotoyob lamital cha'an mi' c'uxob ti yijc'ʌlal che' bajche' tsi' yʌlʌ Moisés. Ma'anic tsa' paj'a. Ma'anic i motso'lel.

²⁵ Moisés tsi' yʌlʌ: C'uxula wʌle jini tsa' bʌ la' loto ac'bi, come i yorajlelix c'aj o cha'an lac Yum. Ma'anic ti lum wʌle.

²⁶ Wʌcp'ejl q'uin mi caj la' tempan i bʌl la' ñʌc', pero mach talic che' ti' wucp'ejlel q'uin, come jiñʌch i yorajlel c'aj o, che'en.

²⁷ Che' ti wucp'ejlel q'uin lamital winicob x'ixicob tsa' majli i tempañob, pero ma'anic chuqui tsi' tajayob.

²⁸ Lac Yum tsi' sube Moisés: ¿Jayp'ejl to ora mi caj i chʌn ñusʌbenoñob c mandar ili winicob x'ixicob?

²⁹ Ña'tanla, tsa'ix cʌq'ueyetla jump'ejl q'uin cha'an mi la' c'aj la' wo. Che' ti' wʌcp'ejlel q'uin on mi cʌq'ueñetla waj cha'an cha'p'ejl q'uin. Yom mi la' cʌytʌl ti la' chumlib ti jujuntiquiletla che' ti wucp'ejlel q'uin. Mach yomic mi la' loq'uel cha'an mi la' sʌclan i bʌl la' ñʌc' mi juntiquileticla, che'en lac Yum.

³⁰ Jini cha'an jini winicob x'ixcob tsi' c'ajayob i yo che' ti' wucp'ejlel q'uin.

³¹ Jini israelob tsi' yotsʌbeyob i c'aba' maná jini i bʌl i ñʌc'. Lajalʌch bajche' pac' i c'aba' xculanta, sʌsʌc. Lajalʌch i tsajel bajche' waj melbil bʌ yic'ot chab.

³² Moisés tsi' yʌlʌ: Lac Yum tsi' yʌlʌ ja'el: “Yom mi la' ch'ʌm tilel jump'ejl p'isonib but'ul ti maná cha'an mi la' lot ti pejtelel ora, cha'an mi' chʌn q'uejlel bajche' yilal jini waj tsa' bʌ cʌq'ueyetla ti colem bʌ i tiquiñal lum che' bʌ tsac pʌyʌyetla loq'uel ti Egipto”, che'en lac Yum. Che' tsi' yʌlʌ Moisés.

³³ Moisés tsi' sube Aarón: Ch'ʌmʌ tilel p'isonib. Otsan uxp'ejl litro maná. Mi caj a lot ti' tojlel lac Yum ti pejtelel ora, che'en.

³⁴ Aarón tsi' mele che' bajche' lac Yum tsi' yʌq'ue mandar Moisés. Tsi' yʌc'ʌ jini maná ya' ti' t'ejl jini cha'q'uejl xajlel ba' ts'ijbubil i mandar lac Yum.

³⁵ Jini israelob tsi' c'uxuyob maná cha'c'al jab jinto tsa' c'otiyob ti' lumal ba' tsi' pʌc'ʌyob i bʌl i ñʌc'. Tsi' c'uxuyob maná jinto tsa' c'otiyob ti' lumal Canaán.

³⁶ Tsa' ochi uxp'ejl litro ti p'isonib i c'aba' gomer. Jo'lujunyajl ti p'isol i wenta juncujch.