Exodo 14 - Chol: I T’an Dios

Jini israelob tsa' c'axiyob ti Chʌchʌc bʌ Ñajb

^1-2 Lac Yum tsi' sube Moisés: Subeñob israelob cha'an mi' cha'leñob joyojb cha'an mi' majlelob ya' ti' tojel Pihahirot, ya' ti' yojlil Migdol yic'ot colem ñajb, ya' ti' tojel Baalzefón. Ya' yom mi la' jijlel ti' tojel colem ñajb ya' ti' ti'.

³ Come Faraón mi caj i yʌl: “Jini israelob woliyob ti to'ol xʌmbal ñumel ti colem bʌ i tiquiñal lum. Mach mejlic i tajob i bijlel”. Che' mi caj i yʌl.

⁴ Mi caj c tsʌts'esʌben i pusic'al Faraón cha'an mi' yajñesañob. Mi caj c tsictesan c ñuclel ti' tojlel Faraón yic'ot ti' tojlel pejtel soldadojob. Jini egiptojob mi caj i ña'tañob joñon Yumʌlon. Che' tsi' yʌlʌ lac Yum. Jini israelob tsi' meleyob che' bajche' subebilob.

⁵ Che bʌ tsa' subenti jini rey ti Egipto cha'an ma'anix mi caj i chʌn sujtelob jini israelob, tsa' q'uextʌyi i pusic'al Faraón yic'ot i winicob. Tsi' yʌlʌyob: ¿Chucoch tsa' la cʌc'ʌyob ti loq'uel ti la que'tel? che'ob.

⁶ Jini cha'an tsi' chajpa i carreta tujc'ʌbil bʌ majlel ti caballo. Tsi' pʌyʌ majlel jini soldadojob.

⁷ Tsi' subeyob majlel capitañob yic'ot lujunc'al i cha'bajc' yajcʌbil bʌ carreta tac yic'ot pejtel yambʌ carreta tac am bʌ ti Egipto.

⁸ Lac Yum tsi' tsʌts'esʌbe i pusic'al Faraón, rey bʌ ti Egipto. Tsi' yajñesayob majlel israelob, pero woli' loq'uelob jini israelob cha'an ti' p'ʌtʌlel Dios.

⁹ Lamital egiptojob tsa' majliyob ti carreta yic'ot jini c'ʌchʌlo' bʌ ti caballo. Yaño' bʌ soldadojob tsa' majliyob ti' yoc. Tsi' yajñesayob jini israelob. Tsa' c'oti i tajob ba' jijlemob ti' ti' colem ñajb, ya' ba'an Pihahirot, ti' tojel Baalzefón.

¹⁰ Che' lʌc'ʌlix i tilel Faraón, jini israelob tsa' caji' q'uelob, ya'ix tilel egiptojob. Tsa' toj sajtiyob i pusic'al. Tsi' pejcayob lac Yum ti c'am bʌ t'an.

¹¹ Tsi' subeyob Moisés: ¿Chucoch tsa' pʌyʌyon lojon tilel ti chʌmel ilayi ti colem bʌ i tiquiñal lum? ¿Mach ba anic muconibʌl ti Egipto? ¿Chucoch tsa' pʌyʌyon lojon loq'uel ti Egipto?

¹² ¿Mach ba anic tsac subeyet lojon ya' ti Egipto cha'an ma' cʌyon lojon ti wocol e'tel ti' wenta egiptojob? Come uts'at muq'uic c melben lojon i ye'tel egiptojob, pero mach uts'atic mic chʌmel lojon ti tiquin bʌ lum, che'ob.

¹³ Moisés tsi' subeyob: Mach la' cha'len bʌq'uen. Ch'ejl'esan la' bʌ. Q'uelela bajche' mi caj i coltañet lac Yum wʌle. Come ma'anix mi caj la' chʌn q'uel jini egiptojob woli bʌ la' q'uel wʌle.

¹⁴ Lac Yum mi caj i cha'len guerra yic'otob. Yom jach ñʌch'ʌletla, che'en.

¹⁵ Lac Yum tsi' sube Moisés: ¿Chucoch wola' chʌn pejcañon? Subeñob majlel jini israelob.

¹⁶ Letsan a barate'. Sʌts'ʌ a c'ʌb ti pam ñajb cha'an mi' cal i bʌ jini ja', cha'an mi' c'axelob ti tiquin bʌ lum jini israelob ya' ti' yojlil ñajb.

¹⁷ Mi caj c wen tsʌts'esʌbeñob i pusic'al egiptojob cha'an mi' yajñesañetla majlel. Mi caj c tsictesan c ñuclel ti' tojlel Faraón, ti' tojlel i soldadojob yic'ot jini c'ʌchʌlo' bʌ ti carreta tac yic'ot ti caballo.

¹⁸ Jini egiptojob mi caj i ña'tañob Yumʌlon che' mi' tsictiyel c ñuclel ti' tojlel Faraón ti' tojlel jini c'ʌchʌlo' bʌ ti carreta tac yic'ot ti caballo.

¹⁹ I yAngel Dios woli bʌ i pʌsbeñob majlel i bijlel israelob tsa' loq'ui ti' tojelob. Tsa' majli ti wa'tʌl ti' pat israelob. Jini wa'al bʌ Tocal tsa' loq'ui ti' tojelob. Tsa' majli ti' pat.

²⁰ Ya'an jini wa'al bʌ Tocal ti xinlʌpʌl cha'an mi' mʌctan egiptojob. Jini Tocal tsi' pʌsbeyob ic'yoch'an bʌ pañimil jini egiptojob, pero tsi' pʌsbeyob i c'ʌc'al jini israelob. Che' jini ma'anic tsa' mejliyob ti c'axel jini egiptojob che' ti ac'ʌlel.

²¹ Moisés tsi' sʌts'ʌ i c'ʌb ti' pam ñajb. Lac Yum tsi' wets'e majlel jini ñajb jump'ejl ac'ʌlel ti p'ʌtʌl bʌ ic' loq'uem bʌ ba' mi' pasel q'uin. Tsa' cajli jini ja'. Tiquin tsa' cʌle lum ba' tsa' cajli ñajb.

²² Jini israelob tsa' c'axiyob ti' yojlil ñajb ba' tiquin lum. Ya' wa'al jini ja' ti' ñoj yic'ot ti' ts'ej che' bajche' bojte' ti jujunwejl.

²³ Jini egiptojob woli bʌ i yajñesañob majlel yic'ot pejtel caballo tac yic'ot carreta tac yic'ot c'ʌchʌlo' bʌ tsa' ochiyob ti yojlil colem ñajb ba' wa'al ja'.

²⁴ Che' ti wen sʌc'ajel lac Yum am bʌ ti wa'al bʌ C'ajc yic'ot Tocal tsi' q'uele jini soldadojob ch'oyolo' bʌ ti Egipto. Tsi' bʌc'tesa egiptojob. Tsa' toj sajtiyob i pusic'al.

²⁵ Lac Yum tsi' jembe i yoc tac carreta i cha'an egiptojob. Che' jini ma'anix tsa' mejli i chʌn xʌñob majlel. Jini egiptojob tsi' yʌlʌyob: La' puts'iconla loq'uel ti' tojlel israelob, come i Yum woli' contrajiñonla. Woli' coltañob, che'ob.

²⁶ Lac Yum tsi' sube Moisés: Sʌts'ʌ a c'ʌb ti pam colem ñajb. La' ñujp'ic ja' ti' tojlel egiptojob año' bʌ ti carreta tac yic'ot jini c'ʌchʌlo' bʌ, che'en.

²⁷ Jini cha'an Moisés tsi' sʌts'ʌ i c'ʌb ti pam colem ñajb. Che' ti sʌc'ajel jini ñajb tsi' cha' pam'a i bʌ. Che' woli' ñopob puts'el egiptojob lac Yum tsi' jisayob ya' ti' yojlil ñajb.

²⁸ Tsa' cha' ñujp'i jini wʌlʌcña bʌ ja'. Jini carreta tac yic'ot c'ʌchʌlo' bʌ yic'ot pejtel i soldadojob Faraón tsa' bʌ tiliyob ti' pat israelob tsa' chʌmiyob ti yebal ñajb. Ma'anic tsa' cʌle mi juntiquilic.

²⁹ Pero jini israelob tsi' cha'leyob xʌmbal ya' ti tiquin lum ti yojlil colem ñajb che' wa'al jini ja' ti' ñoj yic'ot ti' ts'ej.

³⁰ Ti jini jach bʌ q'uin lac Yum tsi' colta loq'uel israelob ti' p'ʌtʌlel egiptojob. Jini israelob tsi' q'ueleyob chʌmeñobix egiptojob ya' ti' ti' colem ñajb.

³¹ Che' bʌ tsi' q'ueleyob jini ñuc bʌ i melbal Dios ti' tojlelob, tsi' ch'ujtesayob lac Yum. Tsi' ñopoyob lac Yum. Tsi' ñopoyob i winicʌch lac Yum jini Moisés.