Exodo 13 - Chol: I T’an Dios

Tsa' aq'uenti Dios jini ascuñʌlo' bʌ

^1-2 Lac Yum tsi' sube Moisés: Aq'ueñon pejtel jini yʌx alʌlo' bʌ ti' tojlel israelob. C cha'añob yic'ot i yʌx'al la' wʌlac', che'en.

³ Moisés tsi' sube winicob x'ixicob: Ña'tanla jini q'uin che' bʌ tsa' loq'uiyetla ti Egipto ba' chucbiletla ti to'ol e'tel, come cha'an ti' p'ʌtʌlel lac Yum tsi' pʌyʌyetla loq'uel. Jini cha'an mach yomic mi la' c'ux waj am bʌ i levadurajlel che' ti jini q'uin.

⁴ Jiñʌch jini q'uin ti marzo che' bʌ tsa' pʌjyiyetla loq'uel.

⁵ Lac Yum tsa'ix i yʌq'ueyob i t'an la' tat cha'an mi' yʌq'ueñetla i lumal cananeojob yic'ot heteojob yic'ot amorreojob yic'ot heveojob yic'ot jebuseojob. Ti jini lum an cabʌl lech yic'ot chab. Ya'i mi caj la' chʌn mel jini q'uiñijel ti jini uw ti marzo.

⁶ Wucp'ejl q'uin wersa mi la' c'ux waj mach bʌ anic i levadurajlel. Che' ti' wucp'ejlel q'uin mi caj i mejlel ñuc bʌ q'uiñijel ti' tojlel lac Yum.

⁷ Wucp'ejl q'uin mi caj la' c'ux waj mach bʌ anic i levadurajlel. Mach yomic an levadura mi ts'ita'ic ti la' wotot ti pejtelel la' lumal.

⁸ Mi caj la' subeñob la' walobilob ti jini q'uin: “Che'ʌch mi lac mel cha'an i ña'tintel jini tsa' bʌ i melbeyonla lac Yum che' bʌ tsi' loc'sayonla ti Egipto”. Che'ʌch mi caj la' subeñob.

⁹ Jiñʌch i yejtal cha'an i cha'añetixla lac Yum che' bajche' jump'ejl ejtalʌl am bʌ ti la' c'ʌb mi ti la' pam, cha'an mi la' chʌn ña'tan i cʌntesʌbal lac Yum, come ti' p'ʌtʌlel lac Yum tsi' pʌyʌyetla loq'uel ti Egipto.

¹⁰ Jini cha'an mi caj la' mel jini q'uiñijel ti jujump'ejl jab che' ti' yorajlel.

¹¹ Lac Yum mi caj i pʌyetla ochel ti' lumal cananeojob che' bajche' tsi' subeyetla yic'ot la' tat. Che' mi' yʌq'ueñetla jini lum,

¹² mi caj la' wʌq'uen lac Yum jini ascuñʌl bʌ la' walobil yic'ot pejtelel ch'iton bʌ i yʌx'al la' walac'. I cha'añʌch lac Yum ti pejtelel.

¹³ Mi mejlel la' q'uex jini ñaxan bʌ burro yic'ot juncojt alʌ tiñʌme' mi alʌ chivo. Mi mach la' womic la' q'uex, wersa mi la' c'ʌsben i bic'. Wersa mi la' q'uex jini ascuñʌl bʌ la' walobil yic'ot juncojt tiñʌme' o mi chivo.

¹⁴ Tal i yorajlel che' mi caj i c'ajtibeñetla la' walobilob: “¿Chuqui i sujmlel jini?” Mi che'ob, mi caj la' jac': “Ti' p'ʌtʌlel lac Yum tsi' pʌyʌyonla loq'uel ti Egipto, ya' ba chuculonla ti wocol e'tel.

¹⁵ Come ba' ora Faraón mach yomic i yʌc'onla ti loq'uel, lac Yum tsi' tsʌnsa pejtel yʌx alʌlob ti Egipto yic'ot i yʌx'al pejtel i yʌlac'. Jini cha'an mi la cʌq'uen lac Yum pejtel i yʌx'al la cʌlac' cha'an tsʌnsʌbil bʌ i majtan, pero mi laj q'uex pejtel yʌx alʌlob lac cha'an ti tiñʌme'.

¹⁶ Jiñʌch i yejtal cha'an i cha'anetla lac Yum, che' bajche' jump'ejl ejtalʌl am bʌ ti la' c'ʌb o ti la' pam cha'an mi la' chʌn ña'tan tsi' pʌyʌyetla loq'uel ti Egipto lac Yum”. Che'i mi caj la' jac'ben la' wa'lobilob, che'en Moisés.

Jini wa'al bʌ Tocal yic'ot C'ajc

¹⁷ Che' bʌ Faraón tsi' choco loq'uel jini israelob, Dios ma'anic tsi' pʌyʌyob ñumel ti' lumal filisteojob ba' toj jini bij come tsi' ña'ta: Ame mi' cajelob ti bʌq'uen jini israelob che' mi' tejchel guerra, ame cha' sujticob ti Egipto, che'en Dios.

¹⁸ Jini cha'an Dios tsi' pʌyʌyob majlel ti xoyol bʌ bij ya' ti colem bʌ i tiquiñal lum ba'an jini Chʌchʌc bʌ Ñajb. Jini israelob tsa' loq'uiyob ti Egipto chajpʌbilob cha'an guerra.

¹⁹ Moisés tsi' ch'ʌmʌ loq'uel ti Egipto i bʌquel José, come José tsi' yʌq'ueyob mandar israelob. Tsi' yʌlʌ: “Dios mi caj i cha' ña'tañetla. Che' mi' loc'sañetla yom mi la' q'uech majlel c bʌquel la' wic'ot”, che'en José.

²⁰ Tsa' loq'uiyob majlel ti Sucot. Tsa' jijliyob ya' ti Etam, ya' ti' ti' colem bʌ i tiquiñal lum.

²¹ Che' ti q'uiñil lac Yum tsa' majli ti ñaxan ti wa'al bʌ tocal cha'an mi' pʌyob majlel. Ti ac'ʌlel tsi' pʌyʌyob majlel ti wa'al bʌ c'ajc cha'an mi' pʌsbeñob i sʌclel. Che' jini tsa' mejliyob ti xʌmbal ti q'uiñil ti ac'ʌlel.

²² Jini wa'al bʌ tocal ma'anic tsi' cʌyʌyob ti q'uiñil. Jini wa'al bʌ c'ajc ma'anic tsi' cʌyʌyob ti ac'ʌlel. Pejtelel ora ya'an.