Ester 4 - Chol: I T’an Dios

Ester mi caj i ñop i coltan i pi'ʌlob

¹ Che' yujilix Mardoqueo melbilix jini ley, tsi' tsili i pislel. Tsi' lʌpʌ coxtal. Tsi' boño i bʌ ti' tʌñil c'ajc. We'ecña ti uq'uel tsa' majli ti ojlil tejclum. Ch'ijiyem i pusic'al

² tsa' letsi majlel ti' ti' i yotot rey. Ma'anic majch tsa' mejli ti ochel ti' yotot rey che' lʌpʌl i cha'an coxtal.

³ Ti jujump'ejl colem tejclum baqui jach tsa' c'oti i mandar rey, tsa' ochi i ch'ijiyemlel i pusic'al judíojob che' bʌ tsi' yubiyob. Tsa' cajiyob ti ch'ajb, we'ecñayob ti uq'uel. Lamital tsa' ñoleyob ti' tʌñil c'ajc lʌpʌlob i cha'an coxtal.

⁴ Che' bʌ tsa' tili i mozojob Ester yic'ot eunucojob cha'an mi' subeñob i co' chuqui woli' yujtel, cabʌl tsi' mele i pusic'al. Tsi' chocbe majlel wen bʌ i bujc Mardoqueo cha'an mi' xoj, pero ma'anic tsi' ch'ʌmʌ. Ma'anic tsi' jocho jini coxtal.

⁵ Jini cha'an Ester tsi' pʌyʌ tilel Hatac jini eunuco i cha'an rey am bʌ ti' wenta cha'an mi' coltan Ester. Tsi' sube majlel ba'an Mardoqueo cha'an mi' c'ajtiben chucoch woli' mel i pusic'al.

⁶ Hatac tsa' majli i pejcan Mardoqueo ti jini parque am bʌ ti tejclum ti' tojel i yotot rey.

⁷ Mardoqueo tsi' sube chuqui tsa' ujti. Tsi' sube jayp'ejl mil sʌsʌc taq'uin woli' yʌc' Amán ti' wenta xlot taq'uiñob ti' yotot rey cha'an mi' laj jisʌntelob judíojob.

⁸ Mardoqueo tsi' yʌq'ue ja'el i copiajlel jini mandar melbil bʌ ti Susa, cha'an mi' ña'tan Ester bajche' mi caj i jisʌntelob judíojob. Mardoqueo tsi' sube Hatac cha'an wersa mi' majlel Ester i pejcan rey cha'an mi' c'ajtiben ti wocol t'an i coltʌntel i pi'ʌlob.

⁹ Tsa' sujti Hatac ba'an Ester. Tsi' sube chuqui tsi' yʌlʌ Mardoqueo.

¹⁰ Ester tsi' sube Hatac: Yom ma' suben Mardoqueo:

¹¹ “Yujilob pejtelel x'e'telob i cha'an rey ti pejtelel pañimil, tic'bil mi la cochel ba' buchul rey ti mal i yotot che' mach pʌybilonicla tilel. Mi tsa' ochi juntiquil che' mach pʌybilic, woli' ñusan ley. Wersa mi' chʌmel majqui jach mi' ñusan jini ley. Cojach jini p'untʌbil bʌ ti rey mi' caj ti cuxtiyel mi tsi' sʌts'ʌ i c'ʌb jini rey che' chucul i cha'an jini te' melbil bʌ ti oro, i yejtal bʌ i p'ʌtʌlel. Che' jini cuxul mi' yajñel”. Che'ʌch yom ma' suben. Jixcu joñon, lujump'ejl i cha'c'alix q'uin mach pʌybilonic ochel ba'an jini rey, che'en Ester.

¹² Tsa' cha' majli Hatac i suben Mardoqueo chuqui tsi' yʌlʌ Ester.

¹³ Mardoqueo tsi' cha' chocbe majlel jini t'an: Anquese ya' añet ti' yotot rey, mach a lon ña'tan mi mux a bajñel colel ba' ora mi' chujquelob pejtel a pi'ʌlob judíojob.

¹⁴ Mi mach a womic a pejcan jini rey ti ili ora che' bʌbʌq'uen mi' chʌmel a pi'ʌlob, mi caj i tejchel i coltʌntel ti yambʌ parte, pero mi caj a chʌmel jatet yic'ot i pi'ʌlob a tat a ña'. ¿Chucoch tsa' aq'uentiyet a we'tel ti co'ʌl ti ili ora ti' tojlel jini rey? ¿Mach ba cha'anic ma' coltan a pi'ʌlob che' an i wocol? Che' tsi' sube Mardoqueo.

¹⁵ Ester tsi' chocbe majlel jini t'an:

¹⁶ Cucu subeñob pejtel judíojob año' bʌ ti Susa cha'an mi' tempañob i bʌ cha'an mi' cha'leñob ch'ajb uxp'ejl q'uin yic'ot uxp'ejl ac'ʌlel cha'an mi' p'untañon Dios. Joñon quic'ot xch'oc bʌ c pi'ʌlob mi caj c cha'len lojon ch'ajb ja'el lajal bajche'etla. Che' mi cujtel ti ch'ajb mi caj c majlel ba'an rey anquese wolic ñusʌben i mandar. Mi tsi' yʌc'ʌyon ti chʌmel la'ix chʌmicon, che'en.

¹⁷ Tsa' majli Mardoqueo. Tsi' lu' mele che' bajche' tsi' sube Ester.