Ester 2 - Chol: I T’an Dios

Ester tsa' ochi ti' yijñam rey

¹ Che' ujtemix jini, tsa' lajmi i mich'ajel jini rey Asuero. C'ajal i cha'an chuqui tsi' cha'le Vasti yic'ot chuqui mi caj i tumben.

² I winicob tsa' caji' subeñob: La' tajlecob wen i t'ojol jax bʌ xch'ocob cha'an jini rey.

³ La' i wa'chocon winicob jini rey cha'an mi' tempañob tilel pejtel i t'ojol jax bʌ xch'oc ti jujump'ejl colem tejclum. La' i pʌyob ti' yotot x'ixicob i cha'an rey wʌ' ti Susa jini ñuc bʌ tejclum cha'an mi' cʌntañob Hegai, jini eunuco am bʌ ti' wenta cha'an mi' cʌntan x'ixicob. La' aq'uenticob xojocña bʌ i ts'ʌcal i pʌchʌlel.

⁴ Jini xch'oc mu' bʌ i yajcan jini rey la' i ch'ʌmben i ye'tel co'ʌl tsa' bʌ i cʌyʌ Vasti. Che' tsi' subeyob i winicob. Jini rey uts'atax tsi' yubi jini t'an. Che'ʌch tsi' mele bajche' tsi' yʌlʌyob.

⁵ Ya'an judío i c'aba' Mardoqueo ya' ti Susa, jini ñuc bʌ tejclum. Mardoqueo i yalobilʌch Jair, i yalobil bʌ Simei. Jini Simei i yalobilʌch Cis, i yalobil bʌ Benjamín.

⁶ Pʌybil loq'uel Mardoqueo ti Jerusalén yic'ot jini t'uchtʌbilo' bʌ ti guerra che' bʌ tsa' pʌjyi majlel Jeconías i rey judíojob. Cʌchʌl tsa' pʌjyiyob majlel cha'an Nabucodonosor, jini rey ti Babilonia.

⁷ Mardoqueo tsi' cosa jini xch'oc Hadasa, jiñʌch Ester, i yalobil i yumijel, come meba' alʌl. Chʌmenix i tat i ña'. I t'ojol jax jini xch'oc. Che' bʌ tsa' cʌle ti meba' Ester, Mardoqueo tsi' pʌyʌ ti' yalobil.

⁸ Che' bʌ tsa' pam pujqui i mandar jini rey, tsa' pʌjyiyob tilel cabʌl xch'oc ti jini tejclum Susa, ti' wenta Hegai. Tsa' pʌjyi ochel Ester ja'el ti' yotot x'ixicob i cha'an rey ti' wenta Hegai tsa' bʌ i cʌnta x'ixicob.

⁹ Uts'at tsi' q'uele jini xch'oc. Tsi' bʌc' aq'ue i ts'ʌcal i pʌchʌlel yic'ot i bʌl i ñʌc' yic'ot wuctiquil xch'oc bʌ i pi'ʌlob. Tsi' yʌc'ʌ ti chumtʌl ti c'ax uts'at bʌ i mal otot.

¹⁰ Ma'anic tsi' subu Ester mi judío i tat i ña' come tsi' tiq'ui Mardoqueo.

¹¹ Ti jujump'ejl q'uin Mardoqueo tsa' ñumi ti' tojel i yotot x'ixicob ya' ba'an i pam cha'an mi' ña'tan bajche' an Ester.

¹² I tilelobʌch xch'ocob mi' yajñelob ti' yotot x'ixicob, jinto mi' pʌjyelob ochel ti' tojlel jini rey Asuero. Lajchʌmp'ejl uw tsi' chajpayob i bʌ. Wʌcp'ejl uw tsi' c'ʌñʌyob aceite loq'uem bʌ ti mirra, yambʌ wʌcp'ejl uw tsi' c'ʌñʌyob jini xojocña bʌ ts'ac cha'an x'ixicob.

¹³ Che' bʌ tsa' ochiyob ba'an rey, tsa' aq'uentiyob ti' majtan chuqui tac jach tsi' mulayob ti' yotot x'ixicob cha'an mi' ch'ʌmob majlel ti' yotot rey.

¹⁴ Che' ti ic'ajel tsa' majli juntiquil ti' yotot jini rey Asuero. Che' ti sʌc'ajel tsa' sujti ti' jini cha'p'ejlel bʌ i yotot x'ixicob am bʌ ti' wenta jini eunuco i c'aba' Saasgaz tsa' bʌ i cʌntʌbe i yixicob rey. Ma'anix tsa' chʌn ochi ba'an rey mi mach pʌybilic ti' c'aba'. Jini jach tsi' c'ajti tilel jini tsa' bʌ i mula. I tilel che'ʌch tsi' meleyob.

¹⁵ Che' i yorajlelix mi' yochel Ester ba'an rey, ma'anic chuqui tsi' c'ajti ti' majtan, jini jach chuqui tsi' sube Hegai cha'an mi' ch'ʌm majlel. Ester, i yalobilʌch Abihail. Abihail jiñʌch i yumijel Mardoqueo tsa' bʌ i pʌyʌ Ester ti' yalobil. C'uxbibil Ester ti pejtelel i cʌñʌyo' bʌ.

¹⁶ Che' ti enero, che' wucp'ejlix jab i yumʌntel jini rey Asuero, tsa' pʌjyi ochel Ester ti' yotot jini rey.

¹⁷ Ñumen tsi' c'uxbi Ester bajche' pejtelel yaño' bʌ x'ixicob. Ñumen tsi' pʌsbe i yutslel i pusic'al bajche' pejtel jini xch'oc bʌ i pi'ʌlob. Jini cha'an tsi' c'ʌcchoco ti' jol jini corona bʌ i ch'ʌjlib i yijñam rey. Tsi' yʌq'ue i ye'tel ti co'ʌl tsa' bʌ i cʌyʌ Vasti.

¹⁸ Jini rey tsi' mele colem bʌ quiñijel cha'an i yijñam. Tsi' pʌyʌ tilel pejtel jini ñuc bʌ yumʌlob yic'ot i winicob cha'an c'ux tsi' yubi Ester. Tsi' ju'sʌbeyob i tojoñel pejtelel colem tejclum. Tsi' yʌq'ueyob i majtan i winicob ti' tijicñʌyel i pusic'al.

Mardoqueo mi' tsictesʌben rey i mul i contrajob

¹⁹ Che' bʌ tsa' tempʌyiyob tilel xch'ocob che' ti' cha'yajlel, ya' buchul Mardoqueo ti' ti' i yotot rey.

²⁰ Maxto anic tsi' subu Ester mi judío i tat i ña' come che'ʌch tsi' yʌq'ue mandar Mardoqueo. Ester tsi' chʌn jac'be i t'an che' bajche' i tilel che' anto ti' wenta.

²¹ Che' ya' buchul Mardoqueo ti' ti' i yotot rey, tsa' caji' pejcañob i bʌ cha'tiquil eunucojob, Bigtán yic'ot Teres, woli bʌ i chʌcʌ q'uelob i pam otot. Wen mich'ob, woli' ña'tañob i tsʌnsan jini rey Asuero.

²² Tsi' yubi Mardoqueo. Tsi' sube jini co'ʌl Ester. Ester tsi' sube jini rey chuqui tsi' yʌlʌ Mardoqueo.

²³ Jini rey tsi' choco majlel i winicob cha'an mi' q'uelob mi isujm woli' chijtañob. Tsi' ña'ta isujmʌch. Jini eunucojob tsa' jijch'iyob ti cha'ticlel. Jini tsa' bʌ ujti ti' tojlel Mardoqueo tsa' otsʌnti ti jun ti' tojlel rey. I c'aba' jini jun i yistoriajlel reyob.