Esdras 6 - Chol: I T’an Dios

¹ Jini cha'an jini rey Darío tsi' yʌc'ʌ mandar cha'an mi' q'uelob mi ya'an ti' yotlel jun tac ya' ti Babilonia.

² Tsi' tajayob jini jun ti colem otot am bʌ ti tejclum i c'aba' Acmeta am bʌ ti Media. Tsi' tajayob ba' ts'ijbubil i mandar Ciro:

³ Che' ti' tejchibal i yumʌntel jini rey Ciro tsi' yʌc'ʌ mandar cha'an mi' cha' melbentel i Templo Dios ya' ti Jerusalén: Ya' yom mi' pulbentel i majtan Dios. Xuc'ul yom mi' cha' mejlel i c'ʌclib i Templo. Yom wucp'ejl i cha'c'al (27) metro i tamlel. Che'ʌch yom i p'isol i xujc ja'el.

⁴ Yom mi' ts'ajquintel i yebal yic'ot uxñumel colem xajlel. Ya' ti' pam yom junñumel tsiji' bʌ cucujl tac. La' aq'uenticob taq'uin ti' wenta rey cha'an mi' joloñel ili e'tel.

⁵ La' i ch'ʌmob majlel pejtelel jini uch'ijibʌl melbil bʌ ti oro yic'ot ti plata tsa' bʌ i ch'ʌmʌ tilel Nabucodonosor che' bʌ tsi' loc'sayob ti' Templo Dios ya' ti Jerusalén. La' i cha' ac'ob ti' Templo Dios ya' ba' lotol ti ñaxan. Che'ʌch ts'ijbubil ti jun.

⁶ Jini cha'an Darío tsi' chocbe majlel mandar jini gobernador i c'aba' Tatnai, yic'ot Setar Boznai yic'ot yaño' bʌ año' bʌ i ye'tel ti junwejl jini Eufrates ja' ba' mi' bʌjlel q'uin: Yom mi la' tʌts' loq'uel la' bʌ ya' ba' woliyob ti e'tel judíojob.

⁷ Cʌyʌ la' mʌctan jini xñoxob año' bʌ i ye'tel yic'ot jini gobernador ti Judá. La' i chʌn melob i Templo Dios ya' ti' yajñib.

⁸ Jiñʌch c mandar cha'an mi la' coltan jini judíojob ti' melol i yotot Dios. Aq'ueñob pejtelel chuqui anto yom i cha'añob. La' aq'uenticob taq'uin loc'sʌbil bʌ ti jini tojoñel mu' bʌ la' wʌq'ueñon ya' ti junwejl ja' ba' mi' bʌjlel q'uin. La' ujtic ti uts'at ili e'tel.

⁹ Aq'uenla jini motomajob ti Jerusalén ti jujump'ejl q'uin pejtelel chuqui anto yom i cha'añob, alʌ tat wacax, yic'ot tat tiñʌme', yic'ot alʌ tiñʌme', cha'an mi' pulbeñob i majtan jini Dios am bʌ ti panchan. Jac'ʌla ti uts'at ti pejtelel chuqui mi' c'ajtiñob jini motomajob año' bʌ ti Jerusalén. Mi ats'am, mi trigo, mi vino, mi aceite, yom mi la' wʌq'ueñob.

¹⁰ Che' jini mi mejlel i pulbeñob i majtan jini Dios am bʌ ti panchan che' bajche' mi' mulan, cha'an uts'at mi' q'uelon. Com mi' tajoñob ti oración quic'ot calobilob.

¹¹ Jac'ʌla yambʌ c mandar: Mi an majqui yom i q'uex ili t'an, la' loc'sʌbentic i cucujlel i yotot. La' jijch'ic ti' ñi' i cucujlel i yotot. Jembenla i yotot cha'an ti' caj i mul cha'an ma'anic tsi' jac'ʌ c mandar.

¹² Jixcu jini Dios tsa' bʌ i tsictesa i c'aba' ti Jerusalén, la' i jisan pejtelel reyob yic'ot tejclumob mu' bʌ i lon ña'tañob i jemob ili c t'an, cha'an mi' mʌctañob i Templo Dios am bʌ ti Jerusalén. Joñon Darío tsa cʌc'ʌ jini mandar. La' mejlic che' bajche' tsac subu, che'en.

¹³ Jini cha'an Tatnai jini gobernador, yic'ot Setar Boznai, temel yic'ot i pi'ʌlob, tsa' caji' bʌc' melob che' bajche' tsi' subeyob jini rey Darío.

¹⁴ Che' jini, jini judíojob año' bʌ i ye'tel tsi' chʌn cha'leyob e'tel ti Templo. Tsi' cha'leyob subt'an jini x'alt'añob Hageo yic'ot Zacarías (i yalobil Iddo). Che' jini tsi' wen coltayob. Jini cha'an tsa' mejli i yujtesañob jini Templo cha'an ti' mandar i Dios israelob, yic'ot i mandar tac jini reyob ti Persia, Ciro yic'ot Darío yic'ot Artajerjes.

¹⁵ Ili otot tsa' ujti ti melol che' ti 18 de febrero che' i wʌcp'ejlelix jab woli ti yumʌntel Darío.

¹⁶ Jini israelob yic'ot motomajob yic'ot levíjob yic'ot pejtelel yaño' bʌ tsa' bʌ cha' sujtiyob tilel ti' lumal tsi' melbeyob i q'uiñilel Templo, wen tijicñayob i pusic'al.

¹⁷ Che' bʌ tsi' melbeyob i q'uiñilel Templo cha'an mi' yʌc'ob ti' wenta Dios, tsi' pulbeyob i majtan Dios, joc'al alʌ tat wacax yic'ot lujunc'al i tat tiñʌme', yic'ot jumbajc' alʌ tiñʌme'. Tsi' yʌc'ʌyob lajchʌncojt tat chivo cha'an mi' ñusʌbentelob i mul jini lajchʌnmojt israelob.

¹⁸ Che' bajche' ts'ijbubil ti' jun Moisés, tsa' t'oxleyob jini motomajob yic'ot levíjob ti mojt ti mojt cha'an mi' jelob i bʌ ti e'tel cha'an pejtel chuqui yom melol ti' Templo Dios ya' ti Jerusalén.

¹⁹ Tsi' melbeyob i q'uiñilel Pascua che' ti ñaxan bʌ q'uin ti abril.

²⁰ Ti jim bʌ ora sʌq'uesʌbilobix pejtel jini motomajob yic'ot levíjob. Tsi' tsʌnsayob jini alʌ tiñʌme' cha'an mi' ñusʌntel i mul pejtelel jini xcʌjchelob tsa' bʌ sujtiyob, yic'ot pejtelel jini motomajob.

²¹ Tsi' c'uxuyob tiñʌme' jini israelob tsa' bʌ cha' sujtiyob tilel ti' lumal, temel yic'ot jini chumulo' bʌ ti lum tsa' bʌ i tʌts'ʌyob i bʌ ti' tojlel i pi'ʌlob, cha'an mi' tem ch'ujutesañob lac Yum, i Dios Israel, yic'ot jini israelob.

²² Ti' tijicñʌyel i pusic'al tsi' meleyob jini q'uin che' mi' c'uxob caxlan waj mach bʌ anic i levadurajlel. Wucp'ejl q'uin tsi' cha'leyob q'uiñijel come tsi' wen coltayob lac Yum. Jiñʌch lac Yum tsa' bʌ i nijcʌbe i pusic'al jini rey ti Asiria cha'an mi' coltañob, cha'an mi' wen mejlel i Templo Dios, i Dios Israel.