Esdras 3 - Chol: I T’an Dios

Tsa' wa'choconti jini pulʌntib cha'an mi' ch'ujutesʌntel lac Yum

^1-2 Che' ti septiembre tsi' tempayob i bʌ ti Jerusalén jini israelob chumulo' bʌ ti pejtelel tejclum tac. Tsa' tejchiyob ti e'tel Jesúa i yalobil Josadac, motomaj yic'ot i pi'ʌlob ti motomajil yic'ot Zorobabel, i yalobil Salatiel yic'ot i yijts'iñob. Tsi' cha' melbeyob i pulʌntib i majtan i Dios Israel. Tsi' pulbeyob i majtan tac che' bajche' ts'ijbubil ti' mandar Moisés i winic lac Yum.

³ Tsi' c'ʌcchocoyob jini pulʌntib ti' pam i c'ʌc'lib. Che' jini tsa' bʌc' caji' pulbeñob i majtan lac Yum ti ic'ajel yic'ot ti sʌc'ajel, come añob i bʌq'uen ame tilic i contrajiñob jini ch'oyolo' bʌ ti yan tac bʌ tejclum.

⁴ Tsi' meleyob jini ñuc bʌ q'uin che' bajche' ts'ijbubil. Tsi' lich'iyob lejchempat tac. Tsi' puluyob majtañʌl che'ʌch bajche' c'amel yom ti jujump'ejl q'uin.

⁵ Tsi' yʌc'ʌyob ja'el jini pulbil tac bʌ majtañʌl che' bajche' yom che' ti' yorajlel c'aj o, yic'ot ti tsijib uw tac, yic'ot ti ñuc tac bʌ q'uin cha'an lac Yum. Parte an i yofrenda tac tsa' bʌ i yʌc'ʌyob ti' pusic'al jach.

⁶ Che' ti 15 de septiembre tsa' caji' pulbeñob i majtan tac lac Yum jini motomajob. Pero maxto melbilic i c'ʌclib i Templo lac Yum.

⁷ Tsi' pʌyʌyob ti e'tel jini xjuc' te'ob yic'ot jini xmel ts'ajcob. Tsi' mʌñʌyob ch'ujte' am bʌ ti Líbano. Tsi' tojoyob yic'ot i bʌl ñʌc'ʌl yic'ot aceite yic'ot vino cha'an mi' ch'ʌmob tilel jini sidoñojob yic'ot tirojob. Tsi' ñijcayob tilel jini te' ti' ti' colem ñajb c'ʌlʌl tsa' c'otiyob ti Jope am bʌ ti' ti' ñajb. Tsa' lu' mejli che' bajche' tsi' yʌc'ʌ mandar Ciro yumʌl bʌ ti Persia.

Tsa' caji ti mejlel i c'ʌclib Templo

⁸ Che' ti junio che' ti' cha'p'ejlel jab che' c'otemix ti Jerusalén, tsa' caji i cha' melob jini Templo Zorobabel (i yalobil Salatiel), yic'ot Jesúa (i yalobil Josadac), yic'ot pejtelel jini motomajob yic'ot levíjob yic'ot pejtelel i pi'ʌlob tsa' bʌ sujtiyob tilel ti Jerusalén. Pejtelel levíjob añobix bʌ junc'al i jabilel yic'ot i ñumel tsa' wa'chocontiyob cha'an mi' q'uelob ti cha' melol i yotot lac Yum.

⁹ Xq'uel e'telob ja'el, cha'tiquil i p'olbal Judá jiñobʌch Jesúa yic'ot Cadmiel, yic'ot winic bʌ i yalobilob yic'ot i pi'ʌlob comol tsa' caji' q'uelob jini e'tel ti' Templo lac Yum yic'ot jini leví Henadad yic'ot i pi'ʌlob.

¹⁰ Che' melbilix i c'ʌclib i Templo lac Yum, tsi' meleyob q'uin. Jini motomajob tsi' lʌpʌyob i pislel i motomajil. Tsi' wusuyob jini trompeta tac. I p'olbal Asaf tsi' ñijcayob jini címbalo tac. Tsi' ñuq'uesʌbeyob i c'aba' lac Yum che' bajche' tsi' yʌc'ʌ mandar jini rey David.

¹¹ Tsi' jeleyob i bʌ ti c'ay. Tsi' subeyob wocolix i yʌlʌ lac Yum. Tsi' ñuq'uesʌbeyob i c'aba'. Tsi' yʌlʌyob: Wen uts lac Yum. Ti pejtelel ora an i c'uxbiya yic'ot i yutslel i pusic'al ti' tojlel Israel, che'ob. Pejtelel winicob tsi' subuyob i ñuclel lac Yum ti c'am bʌ t'an cha'an tijicñayob i pusic'al che' melbilix i c'ʌclib i yotot lac Yum.

¹² Jini ñoxobix bʌ motomajob yic'ot levíjob tsi' cha'leyob c'am bʌ uq'uel, come c'ajal to i cha'añob i t'ojol jax bʌ Templo tsa' bʌ i mele Salomón. Yaño' bʌ tsi' cha'leyob oñel cha'an i tijicñʌyelob i pusic'al.

¹³ Ma'anic tsa' mejli i ña'tʌntel mi oñel o mi uq'uel woliyob, mi ch'ijiyem i pusic'al o mi tijicñayob, come pejtelel winicob tsi' cha'leyob c'am bʌ t'an. Ñajtʌ tsiquil i yoñelob.