Eclesiastes 8 - Chol: I T’an Dios

La' lac jac' jini rey

¹ Tijicña jini am bʌ cabʌl i pusic'al. Jiñʌch yom bʌ cha'an mi lac ch'ʌmben isujm yic'ot cha'an mi lac cha'len cʌntesa. Añʌch i c'ʌc'al i wut jini p'ip' bʌ i pusic'al. Mi' tsictiyel i yutslel i pusic'al ti' wut.

² Jac'ben i t'an jini rey, come wa'chocobil ti Dios. Mele che' bajche' tsa' wʌlʌ che' bʌ tsa' wa'choco a t'an.

³ Mach a se' cʌy a we'tel, anquese wocol ma' wubin a we'tel ti' tojlel rey. Jini rey mi' yʌc' ti melol chuqui tac yom.

⁴ Wersa ma' jac'ben i t'an. Ma'anic majqui mi mejlel i ñusan.

⁵ Jini mu' bʌ i jac'ob mi' q'uejlelob ti uts'at. Ma'anic i mul. Jini am bʌ i pusic'al mi caj i wen ña'tan bajche' yom melol jini e'tel. Mi caj i tajben i yorajlel.

Mach laj cʌmbilic i ña'tibal Dios

⁶ Ti pejtelel chuqui tac yom melol an i yorajlel. Wersa mi laj cuch wocol.

⁷ Come mach la cujilic chuqui mi caj i yujtel ti lac tojlel. Mach la cujilic bajche' mi caj laj coltan lac bʌ.

⁸ Ma'anic majqui mi mejlel i tic' jini ic'. Che' ja'el mach mejlic lac suben cʌytʌl lac ch'ujlel che' i yorajlelix mi lac chʌmel. Wersa mi lac jac' lac pʌyol. Mach mejlicob ti puts'el jini mu' bʌ i cha'leñob jontolil.

⁹ Tsac wen p'isi tic pusic'al i melbalob pejtel winicob ti yebal panchan yic'ot ja'el jini mu' bʌ i c'ʌñob i p'ʌtʌlel cha'an mi' jisañob i pi'ʌlob.

¹⁰ Tsaj q'uele che' bʌ tsa' mujqui xjontolil. Che' wolix ti sujtelob i pi'ʌlob ti tejclum, ti jini jach bʌ tejclum ba' tsi' cha'le jontolil jini xmulil, woli' subob ti ñuc jini xchʌmel. Mach chʌn c'ajalix i cha'añob mi jontol i melbal che' cuxul to. Wen leco jini.

¹¹ Dios ma'anic mi' bʌc' aq'ueñob i toj i mul xmulilob. Jini cha'an winicob mi' lon ña'tañob uts'at mi' chʌn cha'leñob jontolil, come ma'anic i tojol mulil, lon che'ob.

¹² An xmulilob c'ʌlʌl cuxulob to anquese jo'c'al ti yajl tsi' cha'leyob jontolil. Pero cujil uts'at mi' cajelob ti ajñel jini mu' bʌ i bʌc'ñañob Dios, mu' bʌ i jac'ob.

¹³ Pero mach uts'atic mi' yajñel jini xjontolil. Mi' caj ti sʌc jilel che' bajche' axñal, come ma'anic mi' bʌc'ñan Dios.

¹⁴ Wolic ña'tan junchajp wocol mu' bʌ i yujtel ti pañimil. An tojo' bʌ mu' bʌ i yubiñob wocol lajal bajche' xjontolilob. An ja'el xjontolilob mu' bʌ i tajob i wenlel che' bajche' jini tojo' bʌ. ¿Chucoch tsa'? Wocol jax jini. Lolom jach ja'el.

¹⁵ Tsa' caji c ñusan q'uin ti alas cha'an mi' ñuc'an c pusic'al, come tsa cʌlʌ ma'anic yambʌ lac wenlel ti yebal panchan, jini jach che' mi lac cha'len we'el yic'ot uch'el ti' tijicñʌyel lac pusic'al. Che'ʌch yom ti pejtelel ora che' woliyonla ti e'tel, come jiñʌch lac majtan ti Dios che' cuxulon tola ti yebal panchan.

¹⁶ Che' bʌ tsa cʌc'ʌ c pusic'al ti' ñopol pejtel chuqui woli' yujtel ti pañimil ti q'uiñil yic'ot ti ac'ʌlel, tsa' caji c ña'tan mach lac ñopoyic ti pejtelel, come wersa la com laj c'aj la co.

¹⁷ Jini jach Dios mi' q'uel pejtel chuqui mi' yujtel ti yebal panchan. Mach laj cʌmbilic i cha'an winicob anquese mi' lon cha'leñob wersa i ñopob. Jini año' bʌ cabʌl i pusic'al mi' lon ña'tañob i taj.