Eclesiastes 4 - Chol: I T’an Dios

¹ Tsa' caji j q'uel, an cabʌl ch'ijiyem bʌ ti yebal panchan. Jini tic'lʌbilo' bʌ woliyo' bʌ ti uq'uel, ma'anic mi' tajob i coltʌntel. Jini año' bʌ ti' wenta xtic'layajob ma'anic mi' p'untʌntelob.

² Tsa cʌlʌ tijicñayob jini chʌmeñobix bʌ, come ma'anix woli' yubiñob wocol bajche' jini cuxulob to bʌ.

³ Pero ñumen tijicñayob jini mach bʌ anic mi' yilañob pañimil, mach bʌ i cʌñʌyobic pejtel jini jontolil mu' bʌ i cha'leñob winicob ti yebal panchan.

⁴ Tsa' caji j q'uel tsʌytsʌyña jax i pusic'alob winicob. Chuqui tac jach mi' ganarin jini bʌx bʌ ti e'tel mi' mulʌbeñob i pi'ʌlob. Yom mi' lolon tajob ja'el. Pero lolom jach mi' tsʌjyubeñob i chubʌ'an i pi'ʌl. To'ol ic' jach woli' yajñesañob.

⁵ Jini tonto bʌ mi' mec' i c'ʌb. Mach yomic e'tel. Mux i bajñel tsʌnsan i bʌ ti wi'ñal.

⁶ Uts'at mi lac ts'ita' c'aj la co che' jasʌlonla. Mach uts'atic mi lac chʌn bajben e'tel cha'an jach lac wo'lel ti chubʌ'añʌl. To'ol ic' jach woli la cʌsin che' jini.

⁷ Tsa' caji j q'uel yambʌ lac tontojlel ti yebal panchan.

⁸ Wʌ'an winic am bʌ ti' bajñel. Ma'anic i pi'ʌlob, ma'anic i yalobil. Pero cabʌl mi' cha'len e'tel cha'an mi' tempan taq'uin. Mach jasʌlic mi' yubin. Che' chʌmenix, ¿majqui mi caj i ch'ʌm? ¿Chucoch wen p'ump'un mi' tic'lan i bʌ? Lolom jach jini.

⁹ Che' ti lac bajñel, ts'ita' jach mi mejlel lac mel. Che' cha'tiquilonla cabʌl mi mejlel.

¹⁰ Mi tsa' yajli juntiquil mi' tech letsel i pi'ʌl. Pero mi tsa' yajli che' i bajñel, ¿majqui mi caj i tech? Ma'anic majch mi' coltan. P'ump'un jax.

¹¹ Mi temel mi' cha'leñob wʌyel, mi' q'uixñesañob i bʌ. Pero mi' yubiñob tsʌñal che' i bajñelob.

¹² Che' ja'el che' an majch mi' contrajintel ti leto, mi an i pi'ʌl mi caj i coltan. Che' jini mi' mʌjlel i cha'añob che' cha'tiquilob. Ñumen uts'at che' an uxtiquil. Wocol mi' ts'ojquel lazo jalbil bʌ ti uxt'ujm.

¹³ Tijicña jini ch'iton cabʌl bʌ i pusic'al anquese ma'anic i chubʌ'an. Pero tonto jini ñoxix bʌ yumʌl mach bʌ yomix i jac'ben i t'an jini yujilo' bʌ.

¹⁴ Jini ch'iton mi' loq'uel ba' ñup'ul cha'an mi' yajñel ti' yum winicob anquese p'ump'un che' anto ti' wenta jini yumʌl ñuc bʌ mi' mel i bʌ.

¹⁵ Tsaj q'uele woli' yumañob jini ch'iton pejtel cuxulo' bʌ ti yebal panchan. Tijicñayob mi' q'uextañob i yum.

¹⁶ Cabʌl mi' taj i ñuclel ti' tojlel bajc'ʌl winicob c'ux bʌ mi' yubiñob. Pero mi' caj ti ñox'an ja'el. Jini maxto bʌ añobic i pusic'al mi' cajelob ti colel. Che' jini mux caj i tsajcañob yambʌ i yum. Lolom jach i ñuclel winicob. To'ol ic' jach.