Eclesiastes 12 - Chol: I T’an Dios

¹ Ña'tan Dios che' ch'itoñet to. C'uxbin wʌle che' jalto mi' tilel i yorajlel wocol.

² Mi caj a ñox'an. Che' jini ma'anix i tijicñʌyel a pusic'al. Muq'uix a yʌxña q'uel jini q'uin yic'ot uw yic'ot ec' yic'ot jini tocal mu' bʌ i tijicñesañonla che' ti' yorajlel jajmel.

³ Come tal i yorajlel che' tsiltsilña a bʌc'tal cha'an cabʌlix a jabilel. Mi' cajel ti c'uñ'an a woc am bʌ cabʌl i p'ʌtʌlel wʌle. Che' jini mi' caj ti c'ojquel i bʌquel a wej. Wocol mi caj a c'ux waj. Mach c'otix a wut ja'el.

⁴ Che' ma'anic i bʌquel a wej yom tsʌts ñup'ul i pʌchilel a wej ti c'ux waj. Mi caj a seb can a wut che' mi' cajel ti c'ay mut che' ti sʌc'an. Mux caj i mʌjquel a chiquin. Mach wen tsiquilix a t'an.

⁵ Che' ñoxetix bʌbʌq'uen ma' yajlel che' an ba' ma' letsel yic'ot ma' jubel. Sʌquix a jol, tiquinix a bʌc'tal. Wocol ma' cha'len xʌmbal. Mach a womix a chʌn ajñel yic'ot a wijñam. Wolix a pijtan i yorajlel chʌmel. Mero lʌc'ʌl a wotot ti chan mach bʌ yujilic jilel. Wolix i chajpañob i bʌ x'uq'uelob.

⁶ Jini cha'an che' ch'itoñet to, yom ma' ña'tan Dios tsa' bʌ i meleyet. I yorajlelix ma' ña'tan che' maxto ts'ojquem ba' chucul i puyil a cuxtʌlel melbil bʌ ti tsucu taq'uin. Ña'tan Dios wʌle che' maxto tojp'emic jini latu melbil bʌ ti oro, come muq'uix caj ti tojp'el jini lucho' ja' ya' ba' mi' loq'uel ja'.

⁷ Jini ts'ubejn mi' caj ti sujtel ti lum baqui tilem. Jini espíritu mi' sujtel ti Dios tsa' bʌ i yʌc'ʌ.

⁸ Lolom jach pejtel jini, che'en jini subt'an. To'ol ic' jach.

Pejtelel am bʌ ti' wenta winic

⁹ Mach jinic jach an i ña'tibal jini subt'an, pero wen yujil cʌntesa. Tsi' chʌn cʌntesa winicob pejtel tsa' bʌ i ñopo. Tsi' chucu ti jun i subal winicob año' bʌ i ña'tibal. Tsi' wen ña'ta bajche' yom subol cha'an mi' cʌytʌl ti' pusic'al winicob.

¹⁰ Uts'atax tsi' yubiyob winicob x'ixicob. Jini subt'an tsi' wen tsictesa pejtel chuqui tac isujm. Isujm pejtel chuqui tsi' ts'ijba.

¹¹ Lajal i t'an jini am bʌ i ña'tibal bajche' acuxan mu' bʌ i jec'onla. Mi' xic'onla ti wen bʌ lac melbal. Añobʌch i pusic'al mu' bʌ i ñopbeñob i t'an. Lajalob bajche' tiñʌme' mu' bʌ i jac'ben i t'an xcʌntaya.

¹² Tsajalet me, calobil. Mach a ñajti sajcan a cʌntesʌntel. Jasʌl jini. Mach ujtic laj cʌn pejtel i cʌntesʌbal winicob. Cabʌl woli' p'ojlel jun ti pañimil. Mi' c'ojyel laj q'uel.

¹³ Cojach jini mic sub. Bʌc'ñan Dios, jac'ben i mandar, come jiñʌch mu' bʌ i wersa c'ajtibeñet.

¹⁴ Come Dios mi caj i melonla yic'ot pejtel mu' bʌ lac mel yic'ot pejtel jini mucul tac bʌ mi wen o mi jontol.