Eclesiastes 11 - Chol: I T’an Dios

I melbal jini winic am bʌ i na'tʌbal

¹ Aq'uen i majtan jini mach bʌ anic i cha'an. Muq'uix a cha' aq'uentel anquese jal ma' pijtan.

² T'oxbeñob ñumel wuctiquil. Mach a to'ol q'uel jach jini waxʌcticlel, come ti wi'il bʌ ora tic'ʌl muq'uix a c'ajtin a coltʌntel ja'el.

³ Che' wen mʌcʌl pañimil tal ja'al. Ya' ba' mi' yajlel te' ya' jach mi caj i chʌn ajñel, mi tsa' majli ti' tojel norte o mi tsa' majli ti' tojel sur.

⁴ Mux caj i to'ol ñumel i yorajlel pac' mi woli jach a chʌcʌ q'uel jini ic'. Mi wola' chʌcʌ q'uel tocal, mach muq'uic a cha'len c'ajbal.

⁵ Mach cʌmbilic lac cha'an i melbal Dios come mucul jach che' bajche' i bijlel ic'. Ti mucul jach mi' yʌq'uen i yespíritu alʌl che' cʌntʌbil to i cha'an i ña'.

⁶ Yom ma' chʌn cha'len pac' c'ʌlʌl ti sʌc'an c'ʌlʌl ti ic'an, come mach a wujilic baqui bʌ mi' cajel ti colel. Tic'ʌl muq'uix i laj colel. Muq'uix i yʌq'ueñet i wut.

⁷ Tijicñayonla cha'an cuxulonla. Uts'atax mi laj q'uix q'uin.

⁸ Mi jal ma' wajñel ti pañimil c'ʌlʌl wen ñoxetix, la' ñuc'ac a pusic'al jujump'ej q'uin, pero ña'tan ja'el wen tam jini tal to bʌ ora che' ma' cʌy pañimil. Mi' caj ti lon jilel jini am bʌ wʌle. Mach jilic jini tal to bʌ.

I cʌntesʌntel ch'itoñob yic'ot xch'ocob

⁹ Che' ch'itoñet to, la' ñuc'ac a pusic'al. Yom belel ora tijicñayet. Sʌclan majlel pejtel chuqui yom a pusic'al yic'ot pejtel chuqui ma' q'uel. Pero ña'tan ja'el, Dios mi caj i melet cha'an pejtel a melbal. Wersa mi caj a mel a bʌ yic'ot Dios.

¹⁰ Jini cha'an mach a cha'len tsic pusic'al. Cʌntan a bʌ ame a wubin wocol yic'ot ch'ijiyem bʌ. Ña'tan ti isujm poj jumuc' jach a ch'itonlel. Mux caj a ñox'an ja'el. Mi' lon ñumel jini tijicña bʌ.