Eclesiastes 10 - Chol: I T’an Dios

Lac chobejtʌbal cha'an lac sajtemal

¹ Ch'o'ch'oc jini jaj pero mi' yʌc' ti tuw'an jini wen xojocña bʌ perfume che' chʌmenix. Che' ja'el che' ya' wistʌl lac sajtemal mi lac wajlentel cha'an lac pi'ʌlob anquese cabʌl lac pusic'al.

² Lac pusic'al mi' cʌntesañonla bajche' yom mi lac mel. I pusic'al jini am bʌ i ña'tibal mi' cʌntesan majlel ti wen bʌ bij. I pusic'al jini tonto bʌ mi' cʌntesan majlel ti jontolil. Che' tonto jini winic

³ tsiquil i tontojlel baqui jach mi' majlel. Mi' yʌc' i bʌ ti cʌjñel.

⁴ Che' mi' mich'an a yum mach a cʌyben i ye'tel. Yom ñʌch'ʌl a pusic'al ti' tojlel. Tic'ʌl mi che' jini mux caj i cha' uts'an i pusic'al.

⁵ Tsaj q'uele yambʌ wocol ti yebal panchan. Jiñʌch junchajp wocol ti' caj reyob yic'ot yumʌlob yujilo' bʌ tic'laya.

⁶ Jini tontojo' bʌ mi' yochelob ti ñuc bʌ i ye'tel. Mi' chilbeñob i ye'tel jini wen chumulo' bʌ cabʌl bʌ i ñuclel.

⁷ C'ʌchʌlob mi' majlelob x'e'telob che' ti' yoc jach mi' pʌjyelob majlel i yalobilob rey.

⁸ Jini mu' bʌ i pic lum cha'an mi' tempʌyel ja' mi' caj ti yajlel ti mal. Jini mu' bʌ i jem pajc' mi' caj ti c'uxtʌl cha'an lucum.

⁹ Jini mu' bʌ i waxc'un majlel xajlel mi caj i ñejt'el ti xajlel. Jini mu' bʌ i jat si' mi' caj ti lojwel.

¹⁰ Che' ma'anic i yej a machit, jal mi' tujq'uel chuqui ma' tsep. Che' jay i yej mach wocolic e'tel. Jini am bʌ i pusic'al lajalʌch bajche' am bʌ i machit jay bʌ i yej. Uts'at mi' caj ti loq'uel i ye'tel.

¹¹ Yom yʌxʌl a wo ame tilic cabʌl wocol ti a tojlel. Mi tsa' cʌyʌ a cʌñʌtan a wotot mi' caj ti ochel xujch'. Che' bʌ tsa'ix puts'i majlel, lolom jachix ma' ñup'ben i ti' a wotot yic'ot candado.

¹² Uts'at ti jac'ol i t'an jini am bʌ i ña'tibal, pero i t'an jini tonto mu' jach i yʌc' ti cʌjñel i yum.

¹³ Tonto i t'an jini tonto bʌ che' ti' tejchibal, pero sojquem che' ti' jilibal.

¹⁴ Jini tonto bʌ laj yujil. Belel ora woli ti t'an. Pero ma'anic majch yujil chuqui mi' caj ti ujtel. ¿Majqui mi mejlel i subeñonla chuqui mi' caj ti ujtel che' majlemonixla?

¹⁵ Jini tonto mi' to'ol lujb'an ti e'tel. Quepel jach mi' cʌy. Mi' sajtel ti' bijlel tejclum.

¹⁶ Wocol jax mi' yubiñob winicob che' mi' yochel ti rey jini mach bʌ anic i pusic'al. P'ump'un i lumal jini año' bʌ i ye'tel mu' bʌ i ñusañob q'uin ti yʌc'ajel.

¹⁷ Tijicñayetla che' mi' cajel ti yumʌl i yalobil jini rey chajpʌbilix bʌ. Tijicñayetla che' yʌxʌlob i yo jini año' bʌ i ye'tel. Mu' jach i cha'leñob q'uiñijel che' i yorajlelix, mach che'ic bajche' xyʌc'ajelob.

¹⁸ Ti' caj lac ts'u'lel tal och ja' ti la cotot. I cucujlel mi' cajel ti oc'mʌl.

¹⁹ Che' mi lac cha'len q'uin, mux laj cajel ti tse'ñal quic'ot lac pi'ʌlob. Jini vino mi' q'uixñesan lac pusic'al. Ma'anic chuqui anto yom lac cha'an che' an lac taq'uin.

²⁰ Mach a lon p'aj jini am bʌ i ye'tel ti a pusic'al. Mach a mucul p'aj jini wen chumul bʌ mi ya'ic ba' wʌyʌlet, come mi tsi' yubi te'lemut, mi' caj ti wejlel majlel cha'an mi' yʌc' ti cʌjñel chuqui tsa' wʌlʌ.