Deuteronomio 8 - Chol: I T’an Dios

Jini wen bʌ lum mu' bʌ caj la' taj

¹ Tsajaletme la. Yom mi la' jac' pejtelel jini mandar mu' bʌ c subeñetla wʌle, come jiñʌch la' cuxtilel cha'an mi la' p'ojlel, cha'an mi la' wochel ti chumtʌl ti jini lum mu' bʌ caj i yʌq'ueñetla lac Yum che' bajche' tsi' wʌn subeyob la' ñojte'elob.

² Yom mi la' ña'tan ja'el i wocolel jini bij ya' ti' tiquiñal pañimil ba' tsi' pʌyʌyetla tilel lac Yum Dios ili cha'c'al jab. Tsi' ju'sʌbeyet la' pusic'al cha'an mi' yilan mi xuc'uletla, cha'an mi la' jac'ben i mandar, o mi mach la' womic la' jac'.

³ Tsi' ju'sʌbeyet la' pusic'al. Tsi' yʌq'ueyetla la' wubin wi'ñal. Tsi' yʌq'ueyetla la' c'ux maná mach bʌ cʌmbilic i cha'an la' ñojte'elob, cha'an mi' yʌq'ueñetla la' ña'tan mach cojic jach ti waj cuxulob winicob, pero ti jujump'ejl t'an mu' bʌ i yʌl Dios. Jiñʌch mu' bʌ i yʌq'uen i cuxtʌlʌl winicob.

⁴ Ma'anic tsa' tsuculʌyi la' pislel. Ma'anic tsa' sijt'i la' woc anquese tsa' jal'ayetla ti xʌmbal ili cha'c'al jab.

⁵ Yom mi la' wen p'is ti wenta che'ʌch tsi' yʌq'ueyetla wocol lac Yum Dios che' bajche' winic mu' bʌ i ju'sʌben i pusic'al i yalobil cha'an c'ux mi' yubin.

⁶ Jini cha'an yom mi la' wen jac'ben i mandar lac Yum Dios, cha'an mi la' chʌn cha'len xʌmbal ti' bijlel, cha'an mi la' bʌc'ñan ti jujump'ejl q'uin.

⁷ Come lac Yum Dios woli' pʌyetla ochel ti wen bʌ lum baqui an colem ja', yic'ot cuxul bʌ ja' mu' bʌ i loq'uel ti joctʌl, yic'ot ti bujtʌl.

⁸ Jini lum mi' yʌc' ti colel trigo, yic'ot cebada, yic'ot ts'usub, yic'ot higuera, yic'ot ch'umac'. Ya'an i wut olivo yic'ot aceite, yic'ot chab.

⁹ Mi caj la' wen chumtʌl. Mach p'isbilic jach chuqui mi caj la' c'ux. Ma'anic chuqui mi caj i wis sʌjlel la' cha'an. Ya'an hierro ti lum, yic'ot cobre ja'el.

¹⁰ Muq'uix caj la' wen ñaj'an yic'ot i bʌl la' ñʌc'. Muq'uix cajel la' wʌq'uen wocolix i yʌlʌ lac Yum Dios cha'an jini wen bʌ lum tsa' bʌ i yʌq'ueyetla.

Tsa' xic'bentiyob cha'an ma'anic mi' ñajʌyel i cha'añob lac Yum

¹¹ Tsajin la' bʌ cha'an ma'anic mi' ñajʌyel la' cha'an lac Yum Dios, cha'an ts'ʌcʌl mi la' jac'ben pejtelel i mandar yic'ot i t'an woli bʌ c subeñetla wʌle.

¹² Ame ñajʌyic la' cha'an lac Yum Dios che' ma'anix chuqui yom la' cha'an che' cabʌl chuqui mi la' c'ux, che' wen i t'ojol jax la' wotot,

¹³ yic'ot che' mi' wen caj ti p'ojlel la' wacax yic'ot la' tiñʌme', yic'ot che' mi' yoñ'an la' plata yic'ot oro yic'ot pejtelel chuqui an la' cha'an.

¹⁴ Che' jini mi caj la' chañ'esan la' bʌ. Mi caj i ñajʌyel ti la' pusic'al lac Yum Dios tsa' bʌ i loc'sayetla ti' lumal Egipto ba' tsa' la' cha'le majtan e'tel.

¹⁵ Lac Yum tsi' toj'esayetla ñumel ti colem bʌ i tiquiñal pañimil wen bʌbʌq'uen bʌ ya' ba' mi' p'ojlelob lucum yic'ot siñan yujilo' bʌ tsʌnsa, ya' ba' ma'anic ja' che' tiquin la' ti'. Lac Yum Dios tsi' yʌq'ueyetla ja' tsa' bʌ i loc'sa ti colem bʌ xajlel.

¹⁶ Tsi' yʌq'ueyetla la' c'ux jini maná mach bʌ anic tsi' q'ueleyob la' ñojte'elob. Tsi' yʌq'ueyetla tsic pusic'al yic'ot i yilʌbentel la' pusic'al cha'an yom i yʌq'ueñetla tijicña bʌ ti wi'il bʌ ora.

¹⁷ Chʌcʌ q'uele la' bʌ cha'an ma'anic mi la' wʌl ti la' pusic'al: “Cha'an ti lac p'ʌtʌlel yic'ot ti lac ñuclel tsa' lac taja pejtelel jini chu'bʌ'añʌl”, ame lon che'iquetla.

¹⁸ Pero ña'tanla jiñʌch lac Yum Dios tsa' bʌ i yʌq'ueyetla la' p'ʌtʌlel ti' tajol pejtelel la' chu'bʌ'an, cha'an mi' ts'ʌctesan i t'an tsa' bʌ i yʌlʌ ti' tojlel la' ñojte'elob. Wolix i ts'ʌctesan wʌle.

¹⁹ Mi tsa' ñajʌyi la' cha'an lac Yum Dios, mi tsa' majli la' ñocchocon la' bʌ cha'an mi la' ch'ujutesan yambʌ, isujm mic subeñetla mi caj la' jisʌntel.

²⁰ Che' bajche' lac Yum tsi' jisa winicob ti mojt ti mojt cha'an mi' yotsañetla ti' lumob, che' ja'el mi caj i jisañetla cha'an mach la' womic la' jac'ben i mandar.