Deuteronomio 33 - Chol: I T’an Dios

Moisés mi' yʌq'ueñob bendición jini israelob

¹ Moisés i winic Dios tsi' subu ili bendición ti' tojlel israelob che' mach jalix mi' caj ti chʌmel:

² Lac Yum tsa' tili ba' añonla ya' ti Sinaí wits. Tsi' pʌsʌ i bʌ ti Seir wits, Tsa' tsictiyi i ñuclel ya' ti Parán wits, Joyol ti bajc'ʌl ch'ujul bʌ ángelob Año' bʌ ti' ñoj che' bajche' lemlemña bʌ c'ajc.

³ C'ux mi' yubin winicob x'ixicob i cha'año' bʌ. Mi' coltan jini mu' bʌ i tsajcañob majlel. Buchulob ti a woc mi' ñopob a t'an,

⁴ Jini mandar tac tsa' bʌ cʌq'ueyob Cha'an mi' jac'ob i yalobilob Jacob.

⁵ Lac Yum tsi' cha'le yumʌntel ti Israel Che' bʌ tsi' tempayob i bʌ año' bʌ i ye'tel ti Israel, loq'uemo' bʌ ti jujunmojt i pi'ʌlob.

⁶ La' ajnic Rubén ti pejtelel ora, La' p'ojlic i p'olbal.

⁷ Moisés tsi' yʌlʌ cha'an Judá: C Yum, ubiben i yoración Judá, La' ajnic yic'ot i pi'ʌlob ti israel ti jump'ejl i pusic'al. La' q'uejlic ti ñuc. Yom ma' coltan ti' tojlel i contrajob.

⁸ Moisés tsi' yʌlʌ cha'an Leví: Aq'uen Leví jini cha'p'ejl alʌ xajlel i yejtal bʌ i ña'tʌntel yic'ot i sujmlel Dios. Tsa' wilʌbe i pusic'al Leví ya' ti Masah yic'ot ya' ti Meriba.

⁹ Tsi' yʌlʌ: Mach j cʌñʌyic c tat c ña', che'en. Tsi' ts'a'le i pi'ʌlob ja'el yic'ot i yalobilob cha'an xuc'ul tsa' ajni ti a t'an, c Yum. Mi' c'uxbin jini xuc'ul bʌ a t'an.

¹⁰ Mi' cʌntesan i p'olbal Jacob bajche' yom melol yic'ot bajche' yom jac'ol a t'an. Mi' yʌq'ueñet a majtan ti pulʌntib cha'an xojocña ma' wubiben i yujts'il jini pulbil bʌ majtañʌl.

¹¹ C Yum, aq'ueñob i wenlel yic'ot i p'ʌtʌlel jini levíjob. Ch'ʌmʌ ti wenta jini e'tel mu' bʌ i melbeñetob. Yom ma' jisʌbeñob i contrajob cha'an mi' sʌc jilelob.

¹² Moisés tsi' yʌlʌ cha'an Benjamín: C'uxbibilet i cha'an lac Yum, Xuc'ul ma' wajñel yic'ot. Lac Yum mi' joy cʌntanet ti jujump'ejl q'uin. Mi' yʌq'uet ti chumtʌl ti' pusic'al.

¹³ Moisés tsi' yʌlʌ cha'an José: La' i yajcʌbeñet lac Yum ñuc bʌ bendición tilem bʌ ti panchan yic'ot ti lum. Mi' yʌc' jini ye'eb yic'ot bulux ja'

¹⁴ Cha'an mi' yʌc' sumuc jax bʌ i wut a pʌc'ʌb Ti' ticwʌlel q'uin yic'ot ti' c'ʌc'al uw.

¹⁵ La' i yʌq'ueñet uts'at bʌ pʌc'ʌbʌl jini wits an tac bʌ ti oñiyi c'ʌlʌl ti pejtelel ora.

¹⁶ La' i yʌq'ueñet pejtel chuqui tac uts'at mu' bʌ i colel ti pañimil. Lac Yum tsa' bʌ i yʌc'ʌ i bʌ ti cʌjñel ti alʌ te' tsa' bʌ puli, mi caj i pʌsbeñet i yutslel i pusic'al. Come yumʌl José ti' tojlel i pi'ʌlob.

¹⁷ Lajalʌch i p'ʌtʌlel bajche' alʌ wacax, i yʌx al bʌ Yic'ot i xulub jini mate' wacax. Mi caj i c'ʌn i p'ʌtʌlel cha'an mi' low jini tejclumob c'ʌlʌl ti' jilibal pañimil. Che' yilalob jini bajc'ʌlelob año' bʌ ti Efraín. Che'ʌch yilalob ti mil ti mil jini año' bʌ ti Manasés.

¹⁸ Moisés tsi' yʌlʌ cha'an Zabulón: Jatet Zabulón, yom ma' wubin i tijicñʌyel a pusic'al che' ma' ñumel ti colem te'el. Jatet Isacar, yom ma' wubin i tijicñʌyel a pusic'al ya' ti pʌchi bʌ a wotot.

¹⁹ Mi caj i pʌyob tilel winicob x'ixicob, Cha'an temel mi' yʌq'ueñob tsʌnsʌbil bʌ i majtan lac Yum. Mi' c'uxob jini sumuc bʌ i bʌl i ñʌc' mu' bʌ i chucob ti colem ja' yic'ot i yʌc'bal jini ji'.

²⁰ Moisés tsi' yʌlʌ cha'an Gad: Uts'atax i yum Gad mu' bʌ i wen coltan. Lajal i p'ʌtʌlel Gad che' bajche' bajlum. Mi' cha'len chijt. Mi' tsilben i bʌc'tal i contra, mi' jisʌben i jol.

²¹ Tsi' yajca uts'at bʌ lum cha'an ya' mi' chumtʌl che' bajche' yom i pusic'al. Lajal bajche' yumʌl mu' bʌ i tilel ti ñaxan cha'an mi' yajcan jini ñumen uts'at bʌ Tsa' majli yic'ot jini año' bʌ i ye'tel ti' tojlel Israel. Tsi' cha'le chuqui toj che' bajche' yom lac Yum. Tsi' wersa subeyob israelob cha'an mi' jac'beñob i t'an lac Yum.

²² Moisés tsi' yʌlʌ cha'an Dan: Lajalʌch Dan bajche' i yal bajlum Mu' bʌ i tijp'el loq'uel ya' ti Basán.

²³ Moisés tsi' yʌlʌ cha'an Neftalí: Jatet, Neftalí, tijicñayet cha'an pejtelel jini bendición tsa' bʌ i yʌq'ueyet lac Yum. A cha'añʌch jini lum am bʌ ti' t'ejl Colem bʌ Ñajb yic'ot jini am bʌ ti sur. Chumlen ya'i.

²⁴ Moisés tsi' yʌlʌ cha'an Aser: Aser jiñʌch c'uxbibil bʌ ti' tojlel i yalobilob Israel. Wen ñuc ti' tojlel i yerañob. Mi' poc i yoc ti olivo aceite.

²⁵ Yom ma' mel i ñejt'ib a wotot ti tsucu taq'uin yic'ot ti bronce. Yom p'ʌtʌlet c'ʌlʌl ma' chʌmel.

²⁶ Ma'anic yambʌ dios che' bajche' i Dios Israel. Mi' t'uchtan jini tocal am bʌ ti panchan cha'an mi' tilel i coltañet. Mi' pʌs i ñuclel ya' ti panchan.

²⁷ Jini Dios am bʌ ti pejtelel ora c'ʌlʌl ti oñiyi jiñʌch p'ʌtʌl bʌ a wotot ba' xuc'ul ma' wajñel. Mi' ch'uyet ti' c'ʌb mach bʌ yujilic lujb'an ti pejtelel ora. Tsi' yajñesa a contrajob ti' tojel a wut che' bʌ tsi' subeyet cha'an ma' jisañob.

²⁸ Jini cha'an wen xuc'ul mi' yajñelob jini israelob ba' ma'anic i tic'lʌntel. Cabʌl jax i yixim yic'ot i ya'lel i ts'usub, ba' mulmulña jini ja'al mu' bʌ i choc tilel i Yum.

²⁹ Wen tijicñayetla, israelob, Coltʌbiletla i cha'an lac Yum. Jiñʌch la' mʌctijib mu' bʌ i cʌntañetla, Jiñʌch la' waj coltaya i wenta bʌ espada mu' bʌ caj i yʌq'ueñet la' yumʌntel. Mi caj i pʌcchocoñob i bʌ la' contrajob ti' tojel la' wut. Mi caj i mʌjlel la' cha'an. Tsa' ujti ti t'an Moisés.