Deuteronomio 31 - Chol: I T’an Dios

Tsa' wa'choconti Josué ti' q'uexol Moisés

¹ Moisés tsa' cha' caji' pejcañob israelob.

² Tsi' subeyob: Anix wʌcc'al (120) c jabilel. Mach mejlix c chʌn toj'esañetla majlel, come lac Yum tsa'ix i subeyon cha'an ma'anic mi caj j c'axel ti Jordán ja'.

³ Pero lac Yum Dios mi caj i toj'esañetla majlel. Mi caj i jisan pejtel jini tejclum ti' tojlel la' wut. Mi caj la' chilbeñob i lum. Jini tsiji' bʌ la' capitán jiñʌch Josué che' bajche' tsi' yʌc'ʌ mandar lac Yum.

⁴ Lac Yum mi caj i jisan i yumob jini lum che' bajche' tsi' jisa Sehón yic'ot Og, i reyob jini amorreojob, yic'ot i lumal.

⁵ Lac Yum mi caj i yʌc'ob ti la' wenta jini chumulo' bʌ ya'i. Yom mi la' jisañob che' bajche' tsac subeyetla.

⁶ P'ʌtesan la' bʌ. Yom mi la' ch'ejl'an. Mach yomic mi la' bʌc'ñañob, come lac Yum Dios temel mi caj i majlel la' wic'ot. Ma'anic mi caj i cʌyetla. Ma'anic mi caj i choquetla. Che' tsi' yʌlʌ Moisés.

⁷ Moisés tsi' pʌyʌ tilel Josué. Tsi' sube ti' tojlel pejtelel israelob: P'ʌtesan a bʌ. Yom ma' wen ch'ejl'esan a bʌ, come mi caj a pʌy majlel ili winicob ya' ti lum che' bajche' lac Yum tsi' wʌn subeyob a ñojte'elob. Mi caj i yʌq'ueñetla. Yom ma' q'uel cha'an mi' ch'ʌmob jini lum.

⁸ Lac Yum mi caj i majlel ñaxan ti a tojlel. Mi caj i yajñel a wic'ot. Ma'anic mi caj i cʌyet. Jini cha'an mach ma' cha'len bʌq'uen, che'en.

Yom mi' pejcʌntel jini mandar

⁹ Che' jini Moisés tsi' ts'ijba ili mandar che' bʌ tsa'ix i subeyob jini winicob. Tsi' yʌq'ueyob jini motomajob i p'olbalob Leví tsa' bʌ i q'uecheyob jini Arca ba' lotol jini xuc'ul bʌ i t'an lac Yum. Tsi' yʌq'ueyob ja'el jini xñoxob i cha'año' bʌ Israel.

^10-11 Tsi' yʌc'ʌ ti' wenta ja'el cha'an mi' pejcañob jini mandar ti c'am bʌ t'an ti' tojlel winicob che' mi' joloñel wuwucp'ejl jab. Jiñʌch i yorajlel che' mi' loq'uelob ti libre jini cʌchʌlo' bʌ yic'ot che' mi' ñusʌntel bet tac che' ti jini q'uin i cha'an Tabernáculo. Che' ti ili ora pejtelel israelob mi caj i tempañob i bʌ ti' tojlel lac Yum ya' ti Ch'ujul bʌ Ajñibʌl.

¹² Yom ma' tempan jini winicob x'ixicob yic'ot jini ñajt bʌ ch'oyolob cha'an mi' yubibeñob i t'an lac Yum Dios cha'an mi' ñopob, cha'an mi' bʌc'ñañob lac Yum, cha'an mi' jac'beñob pejtelel i mandar.

¹³ La' i yubiñob i yalobilob maxto bʌ cʌntesʌbilobic cha'an mi' ñopob ja'el. Che' jini mi caj i bʌc'ñañob lac Yum Dios ti pejtelel q'uin che' cuxulet to la ya' ti junwejl Jordán ja' ti jini lum baqui mi la' majlel ti chumtʌl. Che' tsi' yʌlʌ Moisés.

I subal lac Yum ti' tojlel Moisés

¹⁴ Lac Yum tsi' sube Moisés: Wʌle lʌc'ʌlix i yorajlel cha'an ma' chʌmel. Pʌyʌ majlel Josué ya' ti Tabernáculo baqui mi caj cʌq'uen i ye'tel, che'en. Che' jini Moisés tsa' majli yic'ot Josué. Tsi' pijtayob lac Yum.

¹⁵ Lac Yum tsi' pʌsʌ i bʌ ya' ti pam Tabernáculo ti wa'al bʌ Tocal. Jini wa'al bʌ Tocal tsa' wa'le ya' ti' ti' Tabernáculo.

¹⁶ Lac Yum tsi' sube Moisés: Mi caj a majlel ba'an a ñojte'elob. Mi caj a chʌmel. Jixcu ili winicob x'ixicob, che' mi' c'otelob ti chumtʌl ya' ba'an yaño' bʌ tejclumob, mi caj i tsajcʌbeñob i dioste' tac. Mi caj i cʌyoñob. Mi caj i ñusʌbeñoñob jini xuc'ul bʌ t'an tsa' bʌ c mele quic'otob.

¹⁷ Jini cha'an mi caj c mich'leñob. Mi caj j cʌyob. Mi caj c mʌy c wut cha'an ma'anix mic chʌn q'uelob. Mi caj c jisañob ti cabʌl wocol. Mi caj i yʌlob: “Obol jax lac bʌ come ma'anix Dios la quic'ot”, che'ob.

¹⁸ Mi caj j cʌyob cha'an ti' caj i mulob cha'an tsi' ch'ujutesayob yambʌ diosob.

¹⁹ Wʌle yom ma' ts'ijban ili c'ay. Cʌntesañob cha'an mi' ña'tañob i mul jini israelob che' mi' c'ʌyiñob.

²⁰ Che' bʌ tsa'ix c pʌyʌyob ochel ti jini lum mu' bʌ caj cʌq'ueñob che' bajche' tsac wʌn sube i ñojte'elob, jini wen uts'at bʌ lum ba' mi caj i mʌc'ob chab yic'ot lech, mi caj i ñaj'añob. Mi caj i jujp'elob. Che' jini mi caj i ch'ujutesañob yambʌ i diosob. Mi caj i ts'a'leñoñob. Mi caj i ñusʌbeñoñob jini xuc'ul bʌ c t'an.

²¹ Wen wocol mi caj i yubiñob. Che' jini mi caj i ña'tañob ili c'ay, come ma'anic mi caj i ñajʌyel i cha'an i p'olbalob. Anquese maxto ochemobic ti jini lum, wʌn ña'tʌbilix c cha'an bajche' añob i pensar. Che' tsi' yʌlʌ lac Yum.

²² Ti jini jach bʌ q'uin Moisés tsi' ts'ijba jini c'ay. Tsi' cʌntesa jini israelob.

²³ Lac Yum tsi' yʌq'ue Josué i yalobil Nun ili t'an: Yom ch'ejlet. Yom jump'ejl jach a pusic'al. Come jatet mi caj a pʌy ochel jini israelob ti jini lum mu' bʌ caj cʌq'ueñob che' bajche' tsac subeyob. Mi caj cajñel a wic'ot, che'en lac Yum.

Yom mi' lojtel jini mandar ba'an Arca

²⁴ Moisés tsa' ujti i ts'ijban pejtelel ili mandar ti jun.

²⁵ Che' jini Moisés tsi' subeyob jini levíjob mu' bʌ i q'uechob majlel jini Arca (ba' lotol jini lujump'ejl mandar):

²⁶ Lotola i juñilel ili mandar ya' ti' t'ejl jini Arca ba' lotol jini trato i cha'an lac Yum Dios. Jini mi caj i tsictesʌbeñet la' mul.

²⁷ Come cujil wen tsʌts la' pusic'al, come che' cuxulon to tsa'ix la' tsʌts'esa a pusic'al ti' contra lac Yum. ¿Mach ba ñumenic mi caj la' cha'len che' chʌmeñonix?

²⁸ Yom mi la' pʌy tilel pejtelel jini xñoxob yic'ot jini año' bʌ i ye'tel. Mi caj c sub iliyi ti' tojlelob. Mi caj c pʌy jini año' bʌ ti panchan yic'ot ti pañimil che' bajche' testigojob cha'an mi' tsictesʌbeñob i mul.

²⁹ Come cujil che' bʌ tsa'ix chʌmiyon mi caj la' bib'esan la' bʌ ti' wut lac Yum. Mi caj la' ñusʌben i mandar lac Yum tsa' bʌ cʌq'ueyet. Che' jini mi caj la' wen ubin wocol che' mich'ix lac Yum cha'an la' jontolil. Che' tsi' yʌlʌ Moisés.

I c'ay Moisés

³⁰ Moisés tsi' yʌlʌ ili c'ay ti' tojlel pejtelel israelob che' tempʌbilob: