Deuteronomio 3 - Chol: I T’an Dios

Tsa' jisʌnti Og yic'ot Basán

¹ Tsa' letsiyonla majlel ti' bijlel Basán. Tsa' tili i contrajiñonla jini rey Og loq'uem bʌ ti Basán yic'ot pejtelel i winicob. Tsi' tajayonla ti Edrei.

² Lac Yum tsi' subeyon: Mach a cha'len bʌq'uen, come tsa'ix cʌc'ʌ ti a wenta yic'ot i tejclumob, yic'ot pejtelel i lum. Yom ma' melben che' bajche' tsa' melbe Sehón i reyob amorreojob tsa' bʌ chumleyob ti Hesbón, che'en.

³ Che' jini lac Yum tsi' yʌc'ʌ ti laj c'ʌb Og jini rey chumul bʌ ti Basán, yic'ot pejtelel i tejclum. Tsa' lac laj jisayob. Ma'anic majqui tsa' cʌle mi juntiquilic.

⁴ Tsa' lac ch'ʌmbe i tejclum tac. Ma'anic tsa' cʌle mi jump'ejlic tejclum mach bʌ anic tsa' lac ch'ʌmʌ. An uxc'al (60) jini tejclum tac ti Argob ba' tsi' cha'le yumʌl jini rey Og chumul bʌ ti Basán.

⁵ Wen melbil ti pejtelelob, wen ts'ajquibil. Tsa' lac ch'ʌmʌ ja'el xchumtʌl tac.

⁶ Che' jini tsa' lac laj jisa Basán che' bajche' tsa' lac jisa jini rey Sehón chumul bʌ ti Hesbón. Tsa' lac jisa winicob, x'ixicob, yic'ot alp'eñelob ti pejtelelob.

⁷ Tsa' lac ch'ʌmʌ i yʌlac'ob yic'ot pejtelel jini chubʌ'añʌl tsa' bʌ cʌle ti tejclum tac.

⁸ Ti jim bʌ ora tsa' lac chilbeyob i lum jini cha'tiquil reyob amorreojob pejtel jini lum am bʌ ti' tojel Jordán ba' mi' pasel q'uin. Ya' jaxʌl ti' jajp ja' i c'aba' Arnón yic'ot ti wits i c'aba' Hermón.

⁹ (Jini sidoñob mi' pejcañob ti Sirión jini wits Hermón. Jini amorreojob mi' pejcañob ti Senir.)

¹⁰ Ch'ʌmʌlix lac cha'an pejtelel jini tejclum tac am bʌ ti joctʌl yic'ot pejtelel jini lum Galaad, yic'ot i lumal Basán, c'ʌlʌl ti Salca yic'ot Edrei (jini tejclum tac am bʌ ti' wenta jini rey Og chumul bʌ ti Basán).

¹¹ Che' bʌ tsa' chʌmi jini rey Og chumul bʌ ti Basán, ma'anix tsa' cʌle chan bʌ winicob refimob. Melbil i wʌyib Og ti tsucu taq'uin, lotol to ti Rabá ti' wenta jini amoñob. An chʌmp'ejl metro i tamlel yic'ot cha'p'ejl metro i xujc.

Tsa' t'oxle jini lum tsa' bʌ i ch'ʌmʌyob

¹² Tsa cʌq'ueyob jini rubeñob, yic'ot jini gadob ili lum tsa' bʌ lac ch'ʌmʌ c'ʌlʌl ti Aroer am bʌ ti' tojel ñoja' i c'aba' Arnón, yic'ot ojlil jini wits tac am bʌ ti Galaad, yic'ot pejtelel i tejclum tac.

¹³ I colojbal lum am bʌ ti Galaad yic'ot pejtelel i lumal Basán ba' tsi' cha'le yumʌl Og tsa cʌq'ueyob lamital i p'olbal Manasés. Ti wajali tsa' ajli ti' lumal refimob pejtelel jini lum Argob i c'aba' Basán.

¹⁴ Jair i yalobil Manasés tsi' laj ch'ʌmʌ jini lum ti Argob c'ʌlʌl ba' jaxʌl i lumob Gesur yic'ot Maaca. Tsi' yotsʌbeyob i c'aba' Basán Havotjair.

^15-16 Tsa cʌq'ue i yalobilob Maquir i colojbal jini lum am bʌ ti Galaad. Tsa cʌq'ueyob jini rubeñob yic'ot jini gadob i xujt'il lum am bʌ ti Galaad c'ʌlʌl ti ja' i c'aba' Arnón am bʌ ti joctʌl ba' mi' ñumel jini ja' i c'aba' Jaboc. Tsi' ñup'ayob i bʌ yic'ot i lumob jini amoñob.

¹⁷ Tsa cʌq'ueyob ja'el jini Arabá, yic'ot jini Jordán ja', yic'ot jini lum am bʌ ti' t'ejl. Tsa' tejchi i cayajonlel ti Cineret. Tsa' ñumi ba'an wits i c'aba Pisga yic'ot ya' ba'an Ñoja' Am Bʌ i Yʌts'mil. An yambʌ i c'aba', jiñʌch colem Ñajb am bʌ ti Arabá.

¹⁸ Tsac subeyetla: Lac Yum Dios tsi' yʌq'ueyetla ili lum ba' yom mi la' chumtʌl. Pero yom ch'ʌlbiletla ti la' we'tijib cha'an mi la' ñumel yic'ot la' pi'ʌlob israelob mu' bʌ i majlelob ti guerra.

¹⁹ Cojach la' wijñam, yic'ot la' walobilob, yic'ot pejtelel la' wʌlac' tac (come cujil wen cabʌl la' wacax), mi caj la' cʌy ila ti la' lum tsa' bʌ cʌq'ueyetla.

²⁰ Che' bʌ tsa'ix i yʌq'ueyob lac Yum i lum la' pi'ʌlob ba' mi' c'ajob i yo ti junwejl ja' che' bajche' tsi' yʌq'ueyetla la' lum wʌ' ti' tojel Jordán ja', che' jini mi mejlel la' cha' sujtel tilel ti la' wotot”. Che' tsac subeyetla.

²¹ Che' jini tsac sube Josué: “Tsa'ix a q'uele pejtelel jini tsa' bʌ i mele lac Yum Dios ti' tojlel jini cha'tiquil reyob. Che'ʌch ja'el mi caj i coltañetla lac Yum ti' tojlel jini yumʌlob ba' mi caj a c'otel.

²² Mach yomic ma' bʌc'ñañob, come lac Yum Dios mi' majlel a wic'ot ti guerra, cho'on.

Ma'anic tsa' mejli ti ochel Moisés ti Canaán

^23-24 Ti jim bʌ ora tsac pejca lac Yum ti oración: C Yum Dios tsa'ix caji a pʌsbeñon a ñuclel yic'ot a p'ʌlʌlel, come ¿bac'an yambʌ diosob ti panchan yic'ot ti pañimil lajal bʌ i ye'tel yic'ot i p'ʌtʌlel?

²⁵ Jini cha'an ti wocol t'an mij c'ajtibeñet: La' c'axicon ti junwejl Jordán ja' cha'an mi cochel ti jini wen bʌ lum. Wen i t'ojol tac jax wits yic'ot jini te'el am bʌ ti Líbano, cho'on.

²⁶ Pero lac Yum tsi' mich'leyon ti la' caj. Jini cha'an ma'anic tsi' yʌc'ʌyon ti c'axel. Tsa' jach i subeyon: Jasʌlix, mach a chʌn pejcañon cha'an ili lum.

²⁷ Letsen ti wits i c'aba' Pisga. Ya' yom ma' letsan a wut ti' tojel i bʌjlibal q'uin, yic'ot ti norte, yic'ot ti sur, yic'ot ti' pasibal q'uin. Yom ma' pam q'uele', come mach mejliquet ti c'axel ti Jordán ja'.

²⁸ Wa'chocon Josué ti a we'tel. Xic'ben cha'an mi' ch'ejl'an, come jini mi caj i pʌy ochel israelob. Mi caj i yʌq'ueñob ili lum woli bʌ a q'uel, che'en lac Yum.

²⁹ Jini cha'an tsa' to cʌleyonla ti joctʌl lʌc'ʌl ti Betpeor.