Deuteronomio 29 - Chol: I T’an Dios

I cʌntesʌntel israelob ya' ti Moab

¹ Jiñʌch i t'an lac Yum tsa' bʌ i sube Moisés cha'an mi' cha' tsictesʌbeñob jini israelob ya' ti' lumal Moab. Jiñʌch xuc'ul bʌ i t'an tsa' bʌ i ñaxan subeyob ya' ti wits i c'aba' Horeb.

² Moisés tsi' pʌyʌ tilel pejtelel jini israelob. Tsi' subeyob: Tsa'ix la' q'uele pejtelel chuqui tsi' mele lac Yum ti' tojel la' wut ya' ti Egipto ti' tojlel Faraón yic'ot pejtelel año' bʌ i ye'tel ti pejtelel i yumʌntel.

³ Tsa'ix la' q'uele pejtelel jini ñuc tac bʌ i yejtal i p'ʌtʌlel, yic'ot jini bʌbʌq'uen tac bʌ.

⁴ Pero c'ʌlʌl ti ili ora lac Yum maxto anic tsi' yʌq'ueyetla la' ña'tʌbal cha'an mi la' ch'ʌmben isujm. Maxto anic mi' c'otel la' wut. Maxto anic mi la' wen ñich'tan.

⁵ Cha'c'alix jab tsac pʌyʌyetla ñumel ti colem bʌ i tiquiñal pañimil. La' pislel maxto anic tsa' ñox'a. La' zapato maxto anic tsa' tsijli ti la' woc.

⁶ Ma'anic c'uxbil la' cha'an waj, ma'anic japbil la' cha'an i ya'lel ts'usub yic'ot jini paj'esʌbil bʌ i ya'lel ts'usub come yom Dios mi la' ña'tan jiñʌch la' Yum jiñʌch la' Dios.

⁷ Che' bʌ tsa' juliyetla ila ti lum, tsa' loq'uiyob i tajetla Sehón jini rey chumul bʌ ti Hesbón, yic'ot Og jini rey chumul bʌ ti Basán. Tsa' tiliyob ti guerra ti la' contra, pero tsa' lac laj jisayob.

⁸ Tsa' lac ch'ʌmbeyob i lum. Tsa' la cʌc'ʌ ti' wenta Rubén, yic'ot Gad. Tsa' la cʌq'ue ojlil i p'olbal Manasés ja'el.

⁹ Jini cha'an ts'ʌcʌl yom mi la' jac' pejtelel ili t'an, cha'an uts'at mi' yujtel pejtelel chuqui mi la' mel.

¹⁰ Wʌle ti ili ora wa'aletla ti la' pejtlel ti' tojlel lac Yum Dios, yic'ot pejtelel jini xñoxob, yic'ot año' bʌ i ye'tel, yic'ot pejtel winicob ti Israel,

¹¹ yic'ot pejtel la' walobilob, yic'ot la' wijñamob, yic'ot jini ñajt bʌ ch'oyolob am bʌ ti la' tojlel, jini mu' bʌ i xot'beñetla la' si', yic'ot jini mu' bʌ i c'otel i luchbeñetla la' wa'al.

¹² Wa'aletla wʌle cha'an mi la' ch'ʌm ti la' wenta jini xuc'ul bʌ t'an woli bʌ i wa'chocon ti la' tojlel lac Yum Dios.

¹³ Yomix i wa'chocoñetla ti' tejclum cha'an mi la' Diosin che' bajche' tsi' wʌn subeyetla, che' bajche' tsi' subeyob la' ñojte'elob, Abraham yic'ot Isaac yic'ot Jacob.

¹⁴ Mach la' wic'otic jach wolic mel ili xuc'ul bʌ t'an, che'en,

¹⁵ pero yic'ot pejtelel ili maxto bʌ anic la quic'ot, yic'ot ja'el jini wʌ' bʌ añob la quic'ot ti' tojlel lac Yum Dios.

¹⁶ Come la' wujil bajche' tsa' lac ñusa q'uin ti Egipto. C'ajal la' cha'an bajche' yilal jini tejclum tac baqui tsa' ñumiyonla che' bʌ tsa' lac xʌñʌ tilel.

¹⁷ Q'uelelix la' cha'an jini leco jax bʌ i melbalob, jini dioste' tac melbil tac bʌ ti te' yic'ot ti xajlel, yic'ot ti oro, yic'ot ti plata.

¹⁸ Chʌcʌ q'uele la' bʌ ame anic winic mi x'ixic, mi xchumtʌl mu' bʌ i cʌy i tsajcan lac Yum Dios cha'an mi' ch'ujutesan jini dios tac c'uxbibil bʌ i cha'añob. Chʌcʌ q'uele la' bʌ ame tejchic chuqui leco ti la' pusic'al, ame sujtiquet che' bajche' jini te' mu' bʌ i yʌc' i venenojlel.

¹⁹ Che'ʌch mi' yujtel ti' tojlel winic mu' bʌ i ñusan i tic'ol. Mi' lon chañ'esan i bʌ. Che' mi' yujtel i yubin mi yʌl: “Uts'at añon anquese mic mel chuqui jach com ila ti pañimil. Ma'anic muc'on ti bʌq'uen”, lon che'en. Jini mu' bʌ i mel che' bajche' jini woli' yʌc' ti jilel i lum.

²⁰ Lac Yum ma'anic mi caj i ñusʌben i mul. Muq'uix cajel i pʌsben i mich'ajel yic'ot i tsʌytsʌyñʌyel i pusic'al. Mi caj i yʌq'uen pejtel jini wocol yic'ot c'amʌjel ts'ijbubil bʌ ti ili jun. Lac Yum mi caj i junyajlel ac' ti jilel i c'aba' ila ti pañimil.

²¹ Mi caj i choc loq'uel ti' tojlel israelob cha'an mi' yubin wocol che' bajche' ts'ijbubil ila ti xuc'ul bʌ i t'an lac Yum.

²² Jini la' walobilob yic'ot jini ñajt bʌ ch'oyolob mi caj i q'uelob jini leco jax bʌ c'amʌjel ti la' tojlel, yic'ot jini wocol chocbil tilel i cha'an lac Yum.

²³ Mi caj i q'uelob azufre yic'ot ats'am ti la' lum. Ma'anix pʌc'ʌbʌl, come ma'anix chuqui mi caj i chʌn colel, mi pimel, mi te'ic mu' bʌ i yʌc' i wut. Lajal yilal jini lum che' bajche' Sodoma, yic'ot Gomorra, yic'ot Adma, yic'ot Zaboim, che' bʌ tsa' puli cha'an tsi' junyajlel jisa lac Yum ti' mich'ajel.

²⁴ Pejtelel jini año' bʌ ti yan tac bʌ tejclum mi caj i yʌlob: “¿Chucoch che' tsi' mele lac Yum ti' tojlel ili tejclum? ¿Chucoch cʌlʌx i mich'ajel?” che'ob.

²⁵ Mi caj i jac'ob: “Cha'an ti' caj tsi' cʌyʌyob i tsajcan lac Yum Dios, i Diosʌch i ñojte'elob. Tsi' ts'a'leyob jini pacto tsa' bʌ i mele yic'ot i tatob che' bʌ tsa' loq'uiyob ti Egipto.

²⁶ Tsajni i ch'ujutesañob jini dioste' tac. Mi' ñocchocoñob i bʌ ti' tojlel yan tac bʌ dios mach bʌ i cʌñʌyic ti yambʌ ora, jini tic'bil bʌ i cha'an lac Yum Dios.

²⁷ Jini cha'an cʌlʌx i mich'ajel lac Yum ti' contra ili tejclum. Wolix i choc tilel pejtel ili wocol ts'ijbubil bʌ ti ili jun.

²⁸ Jini cha'an lac Yum tsi' wets'eyob loq'uel ti' lum cha'an mich'ix, tsʌytsʌyña i pusic'al. Tsi' chocoyob majlel ti yambʌ lum ya' baqui añob c'ʌlʌl wʌle”, che'ob.

²⁹ Jini mucul tac bʌ an ti' wenta lac Yum Dios. Pero lac cha'añʌch yic'ot i cha'añʌch la calobilob pejtelel jini tsa' bʌ i tsictesʌbeyonla lac Yum ti pejtelel ora, cha'an mi lac jac'ben pejtelel i t'an yic'ot i mandar.