Deuteronomio 21 - Chol: I T’an Dios

Che' mach cʌmbilic majqui tsi' cha'le cʌntesa

¹ Che' ya' chumuletla ti lum mu' bʌ i yʌq'ueñetla lac Yum Dios, mi tsa' tajle juntiquil xchʌmel ya' ti jamil ti' ojlil bij ti' tojel cha'p'ejl tejclum, mi mach tsiquilic majqui tsi' tsʌnsa,

² che' jini la' loq'uicob ti tejclum tac jini xñoxob yic'ot jini juezob cha'an mi' p'isob i ñajtlel tejclum ba' tsa' loq'uiyob c'ʌlʌl ba'an jini xchʌmel.

³ Che' ña'tibilix baqui bʌ tejclum lʌc'ʌl, yom mi' tilelob jini xñoxob jini lʌc'ʌl bʌ añob. Yom mi' pʌyob tilel juncojt alʌ xch'oc wacax maxto bʌ c'ʌmbilic ti e'tel.

⁴ La' i pʌyob majlel jini wacax ba'an ts'ʌmʌcña bʌ ja' ti joctʌl. Ya' ba' maxto anic ñoj c'ʌmbil jini lum ya' mi caj i c'ʌsbeñob i bic'.

⁵ Ya' yom mi' c'otelob jini motomajob, come yajcʌbilob i cha'an lac Yum Dios cha'an mi' melbeñob i ye'tel, cha'an mi' subeñob wocolix i yʌlʌ lac Yum. Pejtelel chuqui jach mi' yʌlob cha'an meloñel mi caj la' jac'.

⁶ Pejtelel jini xñoxob año' bʌ ti jini tejclum ti lʌc'ʌl ba' tsa' tajle jini xchʌmel mi caj i pocob i c'ʌb ti' pam jini wacax tsa' bʌ tsʌnsʌnti ya' ti joctʌl.

⁷ Mi caj i subob jini t'an: “Ilij c'ʌb lojon ma'anic tsi' beq'ue jini ch'ich'. C wut lojon ma'anic tsi' q'uele.

⁸ C Yum lojon, ñusʌbeñob i mul jini israelob mʌmbilo' bʌ a cha'an. Mach a wʌq'ueñob i toj ili mulil jini israelob. La' ñusʌbentic jini mulil”. Che' yom mi' yʌlob jini xñoxob.

⁹ Che' jini mi caj la' wʌc' ti ñusʌntel jini mulil che' mi la' mel chuqui uts'at ti' wut lac Yum.

Jini yan tac bʌ mandar

¹⁰ Che' mi la' majlel ti guerra ya' ba'an la' contra, lac Yum Dios mi caj i yʌc'ob ti la' p'ʌtʌlel cha'an mi la' chucob,

¹¹ pero mi tsa' q'uele juntiquil xch'oc wen i t'ojol bʌ, mi tsa' caji a mulan,

¹² uts'at ma' pʌy majlel ti a wotot. La' i jujchin i jol. La' i set' i yejc'ach.

¹³ La' i joch i pislel lʌpbil bʌ i cha'an che' bʌ tsa' chucu. La' i choque'. La' i yuc'tan i tat i ña' jump'ejl uw ti a wotot. Ti wi'il mi mejlel ti ñujpuñel a wic'ot.

¹⁴ Mi tsa' caji a ts'a'len, la' loq'uic majlel baqui jach yom. Mach yomic ma' chon ti taq'uin. Mach yomic ma' wotsan cha'an a mozo, come tsa'ix a pi'le.

¹⁵ Mi an juntiquil winic am bʌ cha'tiquil i yijñam, mi c'ux mi' yubin juntiquil che' mi' ts'a'len yambʌ, mi ti' cha'ticlelob anix i yalobilob, pero i cha'añʌch jini ts'a'lebil bʌ jini ñaxan bʌ alʌl,

¹⁶ mach mejlic i ñusan i yalobil jini ts'a'lebil bʌ ba' ora mi' t'oxbeñob i chubʌ'an jini ch'iton bʌ i yalobilob. Mach mejlic i chilben i yʌscunlel jini ñaxan bʌ i yalobil cha'an mi yʌq'uen ti' wenta jini c'uxbibil bʌ, come ñaxan tsi' yila pañimil i yalobil jini ts'a'lebil bʌ.

¹⁷ Wersa mi caj i c'uxbin i yalobil jini ts'a'lebil bʌ, come ñoj ñaxan tsi' yila pañimil. Muq'uix i yʌq'uentel cha'yajl i ñumel che' bajche' jini yaño' bʌ, come jiñʌch jini ascuñʌl bʌ. I tejchibalʌch i p'ʌtʌlel. Jini cha'an ñumen cabʌl mi caj i yʌq'uentel.

¹⁸ Mi an juntiquil am bʌ i yalobil wen mich' bʌ, ch'aplomtic bʌ alob mach bʌ anic mi' jac'ben i t'an i tat i ña', mi lon tic'bilix, mi ma'anic tsi' jac'ʌ i ju'sʌbentel i pusic'al,

¹⁹ che' jini i tat i ña' mi caj i pʌyob majlel ba'an jini xñoxob ya' ti' ti' jini tejclum.

²⁰ La' i subeñob jini xñoxob che' bajche' iliyi: “Ili calobil lojon wen yujil mich' yic'ot jontolil. Ma'anic mi' jac'beñon lojon c t'an, xwo'lel, yujil lembal”, che'ob.

²¹ Che' jini pejtelel jini winicob año' bʌ ti' ti' tejclum mi caj i julob ti xajlel. Mi caj i chʌmel. Che' jini mi' caj ti lajmel chuqui tac leco ti la' tojlel. Mi caj i yubiñob pejtelel israelob, mi' cajelob ti bʌq'uen.

²² Mi an juntiquil tsa' bʌ i mele ñuc bʌ mulil cha'an mi' chʌmel, mi tsa' la' joc'choco ti te' cha'an mi la' tsʌnsan,

²³ mach yomic mi la' cʌyben i bʌc'tal ya' ti te' ti ac'ʌlel, pero yom mi la' wersa mucben i bʌc'tal ti jini jach bʌ q'uin, come chocbil ti Dios juntiquil mu' bʌ i joc'tʌl ti te'. Mach yomic mi la' wʌc' ti bib'an la' lum woli bʌ i yʌq'ueñetla lac Yum ya' ba' mi la' majlel ti chumtʌl.