Deuteronomio 15 - Chol: I T’an Dios

Jini jabilel che' mi' ñusʌntel bet tac

¹ Ti wuwucp'ejl jab wersa mi caj la' ñusʌben la' bʌ la' bet.

² Che' bajche' jini mi caj la' mel. Jini tsa' bʌ i yʌc'ʌ i taq'uin ti majan ti' tojlel i pi'ʌlob mi caj i jisʌben i bet. Mach mejlic i chʌn c'ajtiben i pi'ʌl, come tsa'ix ñusʌbenti i bet, come i yorajlelix i ñusʌntel che' bajche' tsi' yʌlʌ lac Yum.

³ Mi mejlel la' chʌn c'ajtiben i q'uexol la' taq'uin jini am bʌ ti yambʌ lum, pero mi caj la' ñusʌben i bet la' pi'ʌlob.

⁴ Pero ya' ti jini lum mu' bʌ caj i yʌq'ueñet Dios ma'anic mi caj i tajtʌl p'ump'un bʌ che' xuc'uletla yic'ot Dios, come lac Yum mi caj i yʌq'ueñetla cabʌl bendición ya' ba' mi la' majlel ti chumtʌl.

⁵ Jini jach yom chʌn xuc'ul mi la' wubiben i t'an lac Yum Dios. Yom mi la' jac'ben pejtel i mandar woli bʌ c subeñetla.

⁶ Lac Yum Dios mi caj i yʌq'ueñetla bendición che' bajche' tsi' subeyetla. Muq'uix la' wʌq'ueñob ti majan cabʌl tejclumob, pero jatetla mach muq'uic la' c'ajtin ti majan. Cabʌl tejclumob mi caj i yochelob ti la' wenta. Yumʌletla ti' tojlelob. Ma'anic mi caj la' yumañob.

⁷ Mi p'ump'un juntiquil la' pi'ʌl ya' ti la' lumal mu' bʌ caj i yʌq'ueñetla lac Yum Dios, mach yomic chʌc la' pusic'al. Mach yomic mi la' bi'len che' mi' c'ajtibeñetla i coltʌntel. Aq'uen la' chubʌ'an jini p'ump'un bʌ.

⁸ Yom mi la' wʌq'uen ti majan che' bajche' jayp'is mi' c'ajtibeñet.

⁹ Tsajin la' bʌ ame tilic jontol bʌ pensar ti la' pusic'al ame la' wʌl: “Wolix i joloñel wʌcp'ejl jab. Talix i yorajlel che' mi' ñusʌbentelob i bet”. Mach che'eticla. Mi to'ol jach mi' majlel jini p'ump'un bʌ la' pi'ʌl cha'an ma'anic tsa' la' wʌq'ue chuqui yom, woli la' ts'a'len. Awilan bʌbʌq'uen mi' pejcan lac Yum cha'an mi' cajtin meloñel. Che' jini mi caj la' toj la' mul.

¹⁰ Yom mi la' wʌq'uen ti pejtelel la' pusic'al. Mach yomic cha'chajp la' pusic'al che' mi la' wʌq'uen. Che' jini muq'uix i yutsi coltañetla lac Yum ti pejtelel la' we'tel.

¹¹ Come an p'ump'uño' bʌ la' wic'ot ti pejtelel ora. Jini cha'an wolic subeñetla cha'an mi la' coltan la' pi'ʌlob.

I coltʌntel winicob año' bʌ ti' yum

¹² Mi tsa' ochi ti a wenta juntiquil a pi'ʌl, mi winic mi x'ixic woli bʌ i chojñel cha'an i bet, libre yom ma' choc sujtel ti' yotot che' mi' joloñel wʌcp'ejl jab e'tel. La' loq'uic ti libre ti wucp'ejlel jab.

^13-14 Che' mi' loq'uel ti a wenta mach a to'o choc sujtel che' meq'uel i c'ʌb. Pero yom ma' wʌq'uen tiñʌme' loq'uem bʌ ti a wʌlac', yic'ot trigo loq'uem bʌ ti a cha'an bʌ, yic'ot i ya'lel ts'usub lotbil bʌ a cha'an. Lac Yum tsi' yʌq'ueyet pejtel jini. Jini cha'an yom ma' wʌq'uen ja'el.

¹⁵ Yom mi la' ña'tan bajche' añetla ti yambʌ ora che' añetla ti la' yum ti Egipto, pero lac yum Dios tsi' loc'sayetla. Jini cha'an wersa yom ma' jac' ili mandar.

¹⁶ Mi mach yomic loq'uel a winic, mi tsi' subeyet: “Mach comic j cʌyet, come c'ux mi cubiñet yic'ot año' bʌ ti a wotot. Uts'at bajche' añon ti a wotot”, mi che'en,

¹⁷ yom ma' ch'ʌm acuxan cha'an ma' ch'uben i chiquin. Che' jini a winicʌch. Mi' chʌn ajñel a wic'ot ti pejtelel ora. Che'ʌch yom ma' melben ja'el a criada mi mach yomic loq'uel ti a wenta.

¹⁸ Mach yomic cha'chajp a pusic'al che' ma' wʌc' ti libre cha'an mi' sujtel ti' yotot, come pejtel x'e'tel yom i tojol cha'an i ye'tel, pero jini tsi' to'ol melbeyet a we'tel cha'an tsa' mʌñʌ. Lac Yum muq'uix i wen coltañet ti pejtelel a we'tel.

I majtan lac Yum

¹⁹ Yom mi la' wʌq'uen lac Yum Dios pejtelel i tat bʌ i yʌx'al la' wacax yic'ot la' tiñʌme'. Mach yomic mi la' c'ʌn ti e'tel i yʌx'al la' wʌlac'. Mach yomic mi la' tsepben i tsutsel i yʌx'al la' tiñʌme' mi la' chivo.

²⁰ Pero muq'uix la' c'ux we'elʌl jujump'ejl jab, jatet yic'ot jini a pi'ʌlob. Ya' yom mi la' c'ux ti' wut lac Yum Dios ti jini ajñibʌl yajcʌbil bʌ i cha'an.

²¹ Mi mach c'oq'uic jini alʌc'ʌl mi xpots', mi mach wenic i yoc, mi yambʌ mach bʌ uts'at, mach yomic mi la' wʌq'uen lac Yum Dios.

²² Pero ya' jach yom mi la' c'ux baqui chumuletla. Mi bibi'etla o mi sʌquetla, mi mejlel la' c'ux ya' ba' chumuletla che' bajche' mi la' cux gacela yic'ot tat me'.

²³ Mach yomic mi la' c'uxben i ch'ich'el. Beq'ue ti lum che' bajche' mi la' bec' ja'.