Deuteronomio 13 - Chol: I T’an Dios

¹ Che' mi' tilel ti la' tojlel x'alt'an yic'ot jini mu' bʌ i ñajlen chuqui mi' yujtel, mi tsi' subeyetla chuqui mi caj i yujtel,

² anquese mi' ts'ʌctiyel jini tsa' bʌ i yʌlʌ yic'ot i yejtal i p'ʌtʌlel, mux caj la' ña'tan mach isujmic mi tsa' caji i subeñetla: “Conla ba'an jini dios tac mach bʌ laj cʌñʌyic cha'an mi lac ch'ujutesan”, mi che'en,

³ mach mi la' ñich'tʌben i t'an jini x'alt'an yic'ot jini mu' bʌ i ñajlen chuqui mi' yujtel, come lac Yum Dios woli' yilan la' pusic'al cha'an mi' q'uel mi isujm woli la' c'uxbin lac Yum Dios ti pejtelel la' pusic'al yic'ot ti pejtelel la' ch'ujlel.

⁴ Yom mi la' chʌn cha'len xʌmbal ti' bijlel lac Yum Dios. Cojach jini yom mi la' bʌc'ñan. Yom mi la' jac'ben i mandar. Jini jach yom mi la' yuman. Yom mi la' tsajcan ti pejtelel ora.

⁵ Jini x'alt'an yic'ot jini mu' bʌ i ñajlen chuqui mi' yujtel muq'uix caj i chʌmel, come tsi' subeyetla cha'an mi la' cha'len jontolil ti' tojlel lac Yum Dios tsa' bʌ i loc'sayetla ti Egipto. Dios tsi' loc'sayetla ba'an jini majtan e'tel. Jini payxo bʌ x'alt'an tsi' ñopo i choquetla loq'uel ti' bijlel lac Yum baqui tsi' cʌntesayetla lac Yum. Puts'tanla ili jontolil. Chocola loq'uel ti la' tojlel.

⁶ Mi tsi' subeyetla la' pi'ʌl, mi i yalobil la' majan ña', mi a walobil, mi a wijñam, mi a cʌñʌ bʌ, mi tsi' mucu subeyet: “Conla cha'an mi lac ch'ujutesan yan tac bʌ dios”, mi che'ob, mach mi la' jac'beñob. Mi pʌybiletla ba'an i diosob winicob ti lʌc'ʌl o ti ñajtʌl, mi maxto bʌ cʌmbilic la' cha'an, mach bʌ anic tsi' cʌñʌyob la' ñojte'elob ja'el, mach mi la' jac'beñob i t'an.

⁷ Mach mi la' ñopben i diosob yan tac bʌ tejclum ti la' joytʌlel, baqui jach añob, mi wʌ'i mi ti ñajt bʌ pañimil.

⁸ Mach yomic mi la' majlel yic'ot jini mu' bʌ i pʌyetla. Mach mi la' ñich'tʌben i t'an. Mach mi la' coltan. Mach yomic mi la' to'ol mucben i mul.

⁹ Pero yom mi la' tsʌnsan. Majqui jach tsa' ilʌbenti i pusic'al, la' i jul ñaxan. Ti wi'il yom mi la' jul ti la' pejtelel.

¹⁰ Yom mi la' jul ti xajlel jinto mi' chʌmel, come tsi' lon ña'ta i loc'sañetla ti' tojlel lac Yum Dios tsa' bʌ i pʌyʌyetla loq'uel ti' lumal Egipto ba'an majtan e'tel.

¹¹ Mi caj i yubiñob pejtelel israelob. Che' jini mi' cajelob ti bʌq'uen. Ma'anix mi caj i chʌn melob che' bajche' jini.

^12-14 Che' mi' tilelob xjontolilob ti la' tejclum tac ba' woli' pʌyetla lac Yum, mi tsi' pʌyʌyob loq'uel jini xchumtʌlob ti' bijlel lac Yum cha'an mi' ch'ujutesañob jini dios tac mach bʌ cʌmbilic la' cha'an, che' ubibilix la' cha'an, yom mi la' wen c'ajtin ti c'unte' bʌ t'an mi isujm jini t'an. Mi isujm tsa'ix i teche jini jontolil ti jump'ejl tejclum,

¹⁵ wersa yom mi la' tsʌnsan pejtel chumulo' bʌ ti jini tejclum. Yom mi la' laj jisañob ti pejtelob yic'ot pejtel chuqui an i cha'añob, yic'ot i yʌlac'.

¹⁶ Che' jini yom mi la' much'quin pejtelel i chubʌ'añob ya' ti calle cha'an mi la' pul che' bajche' pulbil bʌ i majtan lac Yum. Che' jini much'ul mi caj i cʌytʌl jini tejclum ti pejtelel ora. Ma'anic mi caj i chʌn wa'chocontel jini tejclum.

¹⁷ Mach yomic mi la' wis tʌl jini chocbilix bʌ. Che' jini mi caj i lajmel i mich'ajel Dios lac Yum cha'an mi' p'untañetla. Che' jini muq'uix i p'ojlesañetla che' bajche' tsi' wʌn subeyob la' ñojte'elob.

¹⁸ Mi xuc'ul mi la' jac'ben pejtelel i mandar woli bʌ c subeñetla cha'an mi la' mel chuqui toj ti' wut lac Yum, mi caj i p'untañetla.