Deuteronomio 12 - Chol: I T’an Dios

An jach jump'ejl Ch'ujul bʌ Ajñibʌl

¹ Ñopola mandar yom bʌ mi la' chʌn jac' ti pejtelel ora ti jini lum woli bʌ i yʌq'ueñetla lac Yum, i Dios lac ñojte'elob. Ya' yom mi la' chumtʌl ti pejtelel ora che' cuxulet to la.

² Mi caj la' laj jisan pejtelel jini ajñibʌl tac baqui woli' ch'ujutesañob i dioste' ti' chañelal wits, yic'ot ti bujtʌl tac, yic'ot ti' yʌxñʌlel colem te'.

³ Yom mi la' jemben i pulʌntib tac, yic'ot jini wa'al bʌ xajlel tac mu' bʌ i ch'ujutesañob. Yom mi la' pul jini ch'ujul bʌ te' i cha'añob. Yom mi' la' jisʌben pejtelel i yejtal tac i diosob cha'an ma'anix mi' chʌn ña'tʌntel i c'aba' wʌ' ti lum.

⁴ Mach che'ic mi caj la' ch'ujutesan lac Yum.

⁵ Dios mi caj i yajcan i yajñib ba' mi caj i pʌs i ñuclel. Ya' yom mi la' majlel la' ch'ujutesan ya' ba' mi caj i chumtʌl lac Yum.

⁶ Ya' yom mi la' pʌyben tilel i majtan mu' bʌ caj i laj pulel, yic'ot i majtan mu' bʌ caj i tsʌnsʌntel, yic'ot la' diezmo, yic'ot la' wofrenda, yic'ot ja'el jini t'an mu' bʌ caj la' wʌc', yic'ot jini majtañʌl tilem bʌ ti la' pusic'al, yic'ot i yʌx al la' wacax, yic'ot i yʌx al la' tiñʌme'.

⁷ Ya' mi caj la' c'ux ti' tojlel lac Yum Dios. Che' jini mi caj la' taj tijicña bʌ la' pusic'al ti pejtelel la' we'tel, jatetla yic'ot la' pi'ʌlob, come aq'uebiletix la' bendición ti lac Yum Dios.

⁸ Mach che'ic mi caj la' mel bajche' woli la' mel ilayi, come jujuntiquil mi' mel che' bajche' yom i pusic'al.

⁹ C'ʌlʌl wʌle maxto ochemeticla ya' ba' mi caj la' c'aj la' wo ti jini lum mu' bʌ i yʌq'ueñetla lac Yum.

¹⁰ Pero muq'uix cajel la' c'axel ti Jordán ja'. Mi caj la' chumtʌl ya' ba' mi' t'oxbeñetla lum lac Yum Dios. Jini mi caj i yuts'esañob la' contrajob ti la' joytʌlel. Mi caj la' cha'len chumtʌl ti ñʌch'ʌl.

¹¹ Yom ts'ʌcʌl mi la' ch'ʌm majlel chuqui mic subeñetla ya' ti' yajñib lac Yum Dios yajcʌbil bʌ i cha'an. Ya' yom mi la' ch'ujutesan. Ya' yom mi la' wʌq'uen jini pulbil tac bʌ majtañʌl, yic'ot tsʌnsʌbil bʌ majtañʌl, yic'ot la' diezmo, yic'ot la' wofrenda tac, yic'ot ja'el pejtel mu' bʌ la' wʌq'uen lac Yum.

¹² Mux caj la' wubin tijicña bʌ ti' tojlel lac Yum Dios, jatetla yic'ot pejtel la' walobilob, ch'iton bʌ yic'ot xch'oc bʌ, yic'ot ja'el la' winicob, yic'ot la' criadajob, yic'ot ja'el jini levíjob, chumulo' bʌ ti tejclum tac, come ma'anic i lum ti la' tojlel.

¹³ Tsajalet cha'an ma'anic mi' la' wʌq'uen i majtan Dios baqui jach yom la' pusic'al.

¹⁴ Pero ya' jach yom mi la' wʌc' ti' yajñib lac Yum yajcʌbil bʌ i cha'an ti' tojlel junmojt israelob. Ya' yom mi la' wʌq'uen jini pulbil tac bʌ majtañʌl. Ya' yom mi la' mel pejtelel chuqui mic subeñetla.

¹⁵ Pero ya' ti la' wotot che' la' wom we'elʌl, mi mejlel la' tsʌnsan che' bajche' jaycojt la' wom tsa'ix bʌ i yʌq'ueyetla lac Yum Dios. Majqui jach yom i c'ux, mi sʌc o mi mach sʌquic, la' i c'ux.

¹⁶ Cojach mach yomic mi la' c'uxben i ch'ich'el. Yom mi' la' bec' che' bajche' mi' la' bec' jini ja'.

¹⁷ Mach yomic mi' la' c'ux ti la' wotot i wut la' pʌc'ʌb tsa'ix bʌ la' wʌc'ʌ cha'an la' diezmo, mi la' ts'usub, mi la' waceite, mi jinic i yʌx'al la' wacax, mi la' tiñʌme', mi jinic tsa'ix bʌ la' wʌlʌ cha'an mi caj la' wʌq'uen lac Yum. Mach yomic la' bajñel c'ʌn jini majtañʌl mi ofrenda tilem bʌ ti la' pusic'al.

¹⁸ C'uxula ya' ti' wut lac Yum Dios, ya' ti' yajñib yajcʌbil bʌ i cha'an. Ya' yom mi' la' majlel, yic'ot la' walobilob, yic'ot la' winic, yic'ot la' criada, yic'ot jini leví chumul bʌ ti la' lum. Che' jini mi caj la' taj i tijicñʌyel la' pusic'al ti lac Yum ti pejtelel chuqui mi la' mel.

¹⁹ Yom tsajiletla cha'an mi' la' cʌntan jini levíjob che' cuxulet to la.

²⁰ Lac Yum mi caj i ñuq'uesan la' lum che' bajche' tsi' wʌn subeyetla. Che' jini che' la' wom la' c'ux we'elʌl mi mejlel la' c'ux.

²¹ Mi ñajt chumuletla, mi wocol mi la' majlel la' ch'ujutesan i c'aba' lac Yum ti' yajñib yajcʌbil bʌ i cha'an, che' jini mi mejlel la' tsʌnsan jini wacax yic'ot la' tiñʌme' tsa' bʌ i yʌq'ueyetla lac Yum, pero che'ʌch yom mi la' mel che' bajche' tsac subeyetla. Che' jini mi mejlel la' c'ux ti la' wotot pejtelel chuqui la' wom.

²² Mi mejlel la' c'uxe' che' bajche' mi la' c'ux chijmay. Jini sʌc bʌ yic'ot jini mach bʌ sʌquic mi mejlel i c'uxob.

²³ Pero yom tsajiletla cha'an ma'anic mi' la' c'uxben i ch'ich'el, come i ch'ich'el i cuxtʌlelʌch. Jini cha'an mach yomic mi' la' c'uxben i cuxtʌlel yic'ot i bʌc'tal.

²⁴ Mach yomic mi' la' c'ux i ch'ich'el. Yom mi la' bec' ti lum che' bajche' ja'.

²⁵ Mi che'ʌch mi la' mel, mi caj i yujtel ti uts'at pejtel chuqui mi la' mel. Che' yom ja'el ti' tojlel la' walobilob ti pejtelel ora. Che' jini mi caj la' mel chuqui uts'at ti' wut lac Yum.

²⁶ Pero yom mi la' ch'ʌmben majlel lac Yum jini ch'ujul bʌ majtañʌl yic'ot jini ofrenda tac tsa' bʌ la' wʌlʌ mu' bʌ caj la' wʌq'uen lac Yum. Yom mi la' ch'ʌm majlel ti' yajñib lac Yum yajcʌbil bʌ i cha'an.

²⁷ Che' jini yom mi la' wʌq'uen jini pulbil tac bʌ majtañʌl, i bʌc'tal yic'ot i ch'ich'el, ya' ti' pam jini pulʌntib i cha'an lac Yum Dios. Yom mi la' bec'ben i ch'ich'el ti' pam jini pulʌntib i cha'an lac yum Dios. Pero mi mejlel la' c'uxben i bʌc'tal jini majtañʌl.

²⁸ Yom mi' la' wen jac' pejtelel jini mandar woli bʌ c subeñetla cha'an uts'at mi la' ñusan q'uin jatetla yic'ot pejtel la' walobilob ti pejtelel ora. Come jiñʌch uts'at bʌ yic'ot toj bʌ ti' wut lac Yum.

Tsa' wʌn subentiyob cha'an ma'anic mi' ch'ujutesañob dios tac

²⁹ Che' baqui ora lac Yum Dios mi caj i jisan pejtel jini winicob ya' baqui mi la' majlel ti chumtʌl,

³⁰ tsajin la' bʌ ame sojquiquetla lajal bajche'ob. Mach yomic mi la' ñopbeñob i diosob ame mi' la ch'ujutesañob. Mach yomic mi la' mel che' bajche' tsi' meleyob.

³¹ Come ts'a'lebil ti' wut lac Yum pejtel chuqui mi' melob ti' c'aba' i diosob. Mi' pulob i yalobilob, ch'itoñob yic'ot xch'oc bʌ i yalobilob cha'an i majtan i dios tacob.

³² Yom tsajiletla. Jac'ʌla pejtel woli bʌ c subeñetla. Mach yomic mi la' xʌb otsan a t'an. Mach yomic mi la' t'ox jisan.