Daniel 7 - Chol: I T’an Dios

Daniel tsi' ñajle chʌncojt bʌte'el

¹ Ti jump'ejl ac'ʌlel che' ti' tejchibal i yumʌntel Belsasar, an chuqui tsi' q'uele Daniel choyol bʌ ti panchan. Tsa' caji i ts'ijbun pejtel chuqui tsi' q'uele.

² Tsi' yʌlʌ: Tsaj q'uele che' ti ac'ʌlel awilan cabʌl ic' ti colem ñajb woli bʌ i tilel ti chʌnwejlel pañimil. Woli' ñijcan jini ja'.

³ Chʌncojt wen ñuc bʌte'el tsa' loq'ui tilel ti ja'.

⁴ Jini ñaxan bʌ lajalʌch bajche' bajlum, pero an i wich' che' bajche' xiye'. Che' bʌ tsaj q'uele tsa' c'ocbenti loq'uel i wich'. Tsa' wa'le ti cha'ts'ijt i yoc che' bajche' winic. Tsi' aq'uenti i ña'tʌbal che' bajche' winic.

⁵ Tsaj q'uele i cha'cojtlel bʌte'el lajalʌch bajche' oso, ch'uyul i c'ʌb cha'an mi' cha'len tijp'el. An uxts'ijt i bʌquel ch'i'latʌl c'uxul bʌ i cha'an. Tsa' subenti: “Ch'ojyen, wen c'uxu we'elʌl bajche' c'amel a wom”.

⁶ Ti wi'il tsaj q'uele yambʌ bʌte'el, lajal bajche' bajlum. An cha'q'uejl i wich' ti' pat. An chʌmp'ejl i jol. Tsa' aq'uenti cabʌl i p'ʌtʌlel cha'an mi' mʌlben yambʌ bʌte'el tac.

⁷ Ti wi'il tsaj q'uele tilem bʌ ti panchan i chʌncojtlel bʌte'el wen bʌbʌq'uen bʌ, cabʌl i p'ʌtʌlel. Tsucu taq'uin i bʌquel i yej. Tsi' wen cha'le jisaya. Tsi' bic'ti xut'u i colojm. An ja'el lujunts'ijt i xulub. Ñumen jontol bajche' yan tac bʌ bʌte'el.

⁸ Che' bʌ tsaj q'uele i xulub, tsa' caji ti pasel yambʌ i yalʌ xulub. Ti' p'ʌtʌlel jini alʌ xulub tsa' jojts'i loq'uel uxts'ijt xulub jini ñaxan bʌ. An i wut che' bajche' winic. An i yej tsa' bʌ i c'ʌñʌ cha'an mi' chañ'esan i bʌ ti t'an.

I meloñel Dios

⁹ Tsac chʌn q'uele jinto tsa' caji i c'ʌcchocontel i buchlib yumʌlob. Tsa' caji ti buchtʌl jini Am bʌ Cabʌl i Jabilel. Wen sʌsʌc i pislel che' bajche' i ña'al tsʌñal. Wen sʌsʌc i tsutsel i jol che' bajche' i tsutsel tiñʌme'. I buchlib yic'ot i yoc i buchlib puro c'ajc woli bʌ ti lejmel.

¹⁰ Tsa' ts'ʌjyi loq'uel jini c'ajc ti' tojlel. An i yaj e'telob ti mil ti mil yic'ot bajc'ʌl winicob x'ixicob wa'alo' bʌ ti' tojlel. Jini Juez tsa' caji' tech meloñel. Tsa' caji ti jajmel jini jun tac.

¹¹ Che' bʌ tsac chʌn q'uele, tsa' tsʌnsʌnti i chʌncojtlel bʌte'el cha'an ti' caj ñuc bʌ i mul jini alʌ xulub, cha'an tsi' chañ'esa i bʌ ti' t'an. Tsi' yotsayob ti c'ajc cha'an mi' pulel.

¹² Cuxul to jini uxcojt bʌte'el, pero tsa' chilbentiyob i yumʌntel. Tsa' to aq'uentiyob jumuc' cha'an mi' jal'añob ts'ita'.

¹³ Tsaj q'uele tsa' tili juntiquil che' bajche' I Yalobil Winic ti pam tocal. Tsa' pʌjyi tilel lʌc'ʌl ba'an jini Am bʌ Cabʌl i Jabilel.

¹⁴ Jini Winic tsa' aq'uenti i p'ʌtʌlel, yic'ot i ñuclel yic'ot i yumʌntel. Pejtel winicob yujilo' bʌ t'an ti chajp ti chajp tsa' caji i yumañob. An i p'ʌtʌlel ti pejtelel ora. Ma'anic mi' caj ti jilel i yumʌntel.

I sujmlel jini ñajal

¹⁵ Joñon Daniel tsa' cajiyon ti bʌq'uen. Tsa' caji c wen mel c pusic'al cha'an pejtel jini tsa' bʌ j q'uele.

¹⁶ Tsac lʌc'tesa c bʌ ba' wa'alob jini woli bʌ i q'uelob. Tsaj c'ajtibe juntiquil cha'an mi' tsictesʌbeñon i sujmlel pejtel iliyi. Tsi' tsictesʌbeyon i sujmlel. Tsi' subeyon:

¹⁷ Ili chʌncojt wen ñuc bʌ bʌte'el tsa' bʌ a q'uele jiñʌch chʌntiquil yumʌlob mu' bʌ caj i cha'leñob yumʌl ti pañimil.

¹⁸ Pero mi caj i yʌq'uentelob i yumʌntel ti pañimil jini winicob x'ixicob mu' bʌ i yumañob jini Dios am bʌ ti panchan. Mach jilic i yumʌntel ti pejtelel ora, che'en.

¹⁹ Tsaj c'ajtibe i sujmlel i chʌncojtlel bʌte'el wen bʌbʌq'uen jax bʌ. Puro tsucu taq'uin i bʌquel i yej, bronce i yejc'ach yujil bʌ jisaya. Tsi' bic'ti xut'u i colojm.

²⁰ Tsaj c'ajtibe ja'el i sujmlel jini lujunts'ijt xulub, yic'ot jini alʌ xulub tsa' bʌ pasi ti wi'il, tsa' bʌ i jisa uxts'ijt xulub. Jiñʌch xulub am bʌ i wut lajal bajche' winic. Tsi' c'ʌñʌ i yej cha'an mi' ñuq'uesan i bʌ. Ñumen ñuc tsi' q'uele i bʌ bajche' yan tac bʌ xulub.

²¹ Tsaj q'uele woli' cha'len guerra ti' contra i cha'año' bʌ Dios. Tsa' mʌjli i cha'an

²² jinto tsa' tili ti meloñel jini Am bʌ Cabʌl i Jabilel. Tsi' tsictesa ti toj i cha'año' bʌ. Tsa' c'oti i yorajlel cha'an mi' yʌq'ueñob i yumʌntel i cha'año' bʌ Dios.

²³ Tsi' subeyon jini Am bʌ Cabʌl i Jabilel: Jini i chʌncojtlel bʌte'el jiñʌch i chʌmp'ejlel yumʌl mu' bʌ i yumʌntel ti pejtelel pañimil. Mach lajalic bajche' yaño' bʌ. Mi caj i cha'len jisaya ti pejtelel pañimil. Mi caj i t'uchtan yaño' bʌ che' bajche' mi' jujch'el trigo ti lum.

²⁴ Jini lujunts'ijt i xulub, jiñʌch lujuntiquil yumʌlob mu' bʌ caj i cha'leñob yumʌl. Ti wi'il mi caj i buchtʌl yambʌ yumʌl mach bʌ lajalic bajche' jini ñaxan bʌ. Mi caj i jisan uxtiquil.

²⁵ Mi caj i p'aj jini Dios am bʌ ti panchan. Mi caj i tic'lan i cha'ano' bʌ Dios. Mi caj i ñop i q'uextan i yorajlel q'uiñijel tac yic'ot pejtel jini ley. Ojlil i chʌmp'ejl jab mi cajel i cha'len yumʌl ti' tojlel i cha'año' bʌ Dios.

²⁶ Pero jini Am bʌ Cabʌl i Jabilel mi caj i tilel ti meloñel. Mi caj i chilben i yumʌntel. Mi caj i junyajlel jisan jini yumʌl.

²⁷ Mi caj i chilbentelob i yumʌntel yic'ot i p'ʌtʌlel yic'ot i ñuclel jini yumʌlob ti pañimil. Mi caj i yʌq'uentelob i cha'año' bʌ Dios am bʌ ti panchan. Mi caj i cha'leñob yumʌl ti pejtelel ora. Pejtelel año' bʌ i ye'tel mi caj i melbeñob i ye'tel i cha'año' bʌ Dios. Mi caj i jac'beñob i t'an.

²⁸ Jiñʌch tsa' bʌ j q'uele. Joñon Danielon. Tsa' caji c wen mel c pusic'al. Tsa' sʌc'a c wut cha'an bʌq'uen. Pero ma'anic tsac sube yambʌ.