Daniel 6 - Chol: I T’an Dios

Daniel ti' ch'eñal bajlum

¹ Jini rey Darío tsi' wa'choco wʌcc'al gobernadorob cha'an mi' cha'leñob yumʌl ti jujump'ejl tejclum ti' yumʌntel.

² Tsi' yʌc'ʌyob ti' wenta uxtiquil xq'uel e'telob cha'an mi' melob i ye'tel bajche' yom, cha'an ma'anic mi' tejchel wocol ti' tojlel jini rey. Juntiquil xq'uel e'tel jiñʌch Daniel.

³ Ñumen ñuc tsa' q'uejli ti' tojlel pejtel jini gobernadorob yic'ot jini cha'tiquil i pi'ʌlob ti e'tel, come wen yujil e'tel. Jini cha'an jini rey woli' ña'tan i wa'chocon Daniel ti' yum pejtelel jini gobernadorob año' bʌ ti jujump'ejl tejclum.

⁴ Pero jini gobernadorob yic'ot jini xq'uel e'telob tsa' caji' comol ña'tañob bajche' mi mejlel i tajbeñob i mul Daniel ti' yumʌntel. Pero ma'anic tsa' mejli i tajbeñob i mul, come ma'anic i mul, xuc'ul i melbal. Uts'at ja'el tsi' cha'le yumʌntel ti' tojlel pejtel winicob.

⁵ Jini cha'an tsa' cha' caji i yʌlob jini winicob: Mach mejlic lac tajben i mul Daniel, come uts'at bajche' woli' mel. Jini jach leco bajche' mi' ñop i Dios, che'ob.

⁶ Jini cha'an jini xq'uel e'telob yic'ot jini gobernadorob tsa' majliyob ba'an jini rey cha'an yomob i jop'ben i mul Daniel. Tsi' yʌlʌyob: Rey Darío, yom cuxulet ti pejtelel ora.

⁷ Pejtelon lojon am bʌ que'tel lojon ti a yumʌntel tsaj como ña'ta lojon yom melol jump'ejl mandar: “Lujump'ejl i cha'c'al (30) q'uin la' i cʌyob i pejcañob i dios pejtel winicob. Mi an chuqui yomob, la' i c'ajtibeñet. Mi an majch mi' ñusan ili mandar, la' chojquic ochel ti' ch'eñal bajlum”.

⁸ Yomix ma' mel jini mandar. Yom ma' wotsan a firma cha'an mach mejlic ti q'uextʌyel, come mach mejlic ti jejmel i mandar medojob yic'ot persiajob che' melbilix, che'ob.

⁹ Jini cha'an jini rey Darío tsi' yotsa i firma ti jini mandar.

¹⁰ Che' bʌ tsi' yubi Daniel melbilix jini mandar, tsa' majli ti' yotot. Tsa' ochi ti mal ba' mi' wʌyel cha'an mi' pejcan Dios che' bajche' i tilel. Jamʌl i ventanajlel am bʌ ti' tojel Jerusalén. I tilel mi' ñoctʌl ya'i uxyajl ti jujump'ejl q'uin cha'an mi' pejcan Dios. Tsi' ñocchoco i bʌ ti oración cha'an mi' ch'ujutesan. Tsi' sube wocolix i yʌlʌ Dios.

¹¹ Che' jini tsa' tiliyob jini winicob yomo' bʌ i jop'ben i mul Daniel. Tsi' tajayob che' woli' ch'ujutesan Dios. Woli' pejcan Dios ti oración.

¹² Jini cha'an tsa' majliyob ti ora ba'an jini rey. Tsi' c'ajtesʌbeyob jini mandar tsa' bʌ poj ujti i mel. Tsi' subeyob: ¿Mach ba anic tsa' wotsa a firma ti jini mandar? “Lujump'ejl i cha'c'al q'uin la' i cʌyob i pejcañob i dios pejtel winicob. Mi an chuqui yomob, la' i c'ajtibeñet. Mi an majch mi' ñusan ili mandar, la' chojquic ochel ti' ch'eñal bajlum”. ¿Mach ba che'ic melbil? che'ob. Jini rey tsi' jac'ʌ: Che' cuyi. La' mejlic che' bajche' ts'ijbubil, come xuc'ul mi' yajñel i mandar jini medojob yic'ot persiajob. Mach mejlic ti jejmel, che'en.

¹³ Jini winicob tsi' jac'ʌyob: Pero an i mul Daniel, i pi'ʌl bʌ jini xñujp'elob tsa' bʌ pʌjyiyob tilel ti Judá. Ma'anic mi' p'iset ti wenta. Che' ja'el ma'anic woli' jac' jini mandar tsa' bʌ a mele. Tsaj q'uele lojon. Woli' chʌn mel che' bajche' i tilel ti' tojlel i Dios. Uxyajl ti q'uin mi' pejcan i Dios ti oración, che'ob.

¹⁴ Tsa' caji i wen mel i pusic'al jini rey che' bʌ tsi' yubi iliyi. C'ʌlʌl jinto tsa' bʌjli q'uin tsi' chʌn ña'ta i coltan Daniel.

¹⁵ Pero jini winicob tsi' chʌn xiq'uiyob. Tsi' yʌlʌyob: Rey, ña'tan xuc'ul mi' yajñel i mandar medojob yic'ot persiajob. Melbilix jini mandar. Tsa' wotsa a firma. Mach mejlic ti jejmel, che'ob.

¹⁶ Jini cha'an jini rey tsi' yʌc'ʌ i t'an cha'an mi' yotsañob Daniel ti' ch'eñal bajlum. Jini rey tsi' sube Daniel: La' i coltañet a Dios mu' bʌ a ch'ujutesan, come xuc'ulet ti' tojlel, che'en.

¹⁷ Che' jini tsi' chocoyob ochel ti ch'en. Tsi' ch'ʌmʌyob tilel xajlel cha'an mi' mʌcbeñob i ti'. Jini rey tsi' yotsʌbe i sellojlel jini xajlel. Jini yumʌlob ja'el tsi' yotsʌbeyob i sellojlel. Che' jini ma'anic majch tsa' mejli i coltan Daniel.

¹⁸ Jini rey tsa' sujti ti' yotot. Wʌlʌcña i pusic'al tsa' majli ti ñoltʌl. Tsi' ñusa ac'ʌlel ti ch'ajb yic'ot tsic pusic'al. Ma'anic tsi' c'uxu waj. Mach yomix i tijicñesʌntel i pusic'al. Ma'anic tsa' ochi i wʌyel.

¹⁹ Che' bʌ tsa' sʌc'a, tsa' ch'ojyi jini rey. Tsa' bʌc' majli ya' ti' ch'eñal bajlum.

²⁰ Che' lʌc'ʌlix an ya' ti' ti' ch'en, wen ch'ijiyem i pusic'al tsi' yota Daniel: Daniel, i yaj e'telet bʌ jini Cuxul bʌ Dios, ¿tsa' ba mejli i coltañet a Dios cha'an xuc'ul wola' wajñel ti' tojlel? ¿Tsa' ba mejli i coltañet cha'an ma'anic mi' tsʌnsañet jini bajlum? che'en.

²¹ Daniel tsi' jac'ʌ: C rey, yom cuxulet ti cabʌl jabil.

²² Jini c Dios tsi' choco tilel i yángel cha'an mi' mʌcben i yej jini bajlum tac. Toj tsi' q'ueleyon. Jini cha'an ma'anic chuqui tsi' tumbeyon. Ti a tojlel ja'el, c rey, ma'anic c mul, che'en.

²³ Wen tijicña i pusic'al jini rey. Tsi' yʌc'ʌ mandar cha'an mi' loc'sañob Daniel ti' ch'eñal bajlum. Ma'anic mi ts'ita'ic i lojwel, come wen xuc'ul i pusic'al ti Dios.

²⁴ Jini rey tsi' yʌc'ʌ mandar cha'an mi' pʌjyelob tilel jini winicob tsa' bʌ i jop'beyob i mul Daniel, cha'an mi' chojquelob ochel ti ch'eñal bajlum, ti pejtelelob yic'ot i yijñam yic'ot i yalobilob. Che' maxto c'otemobic ti' yebal jini ch'en, tsa' tijp'iyob jini bajlum cha'an mi' jisañob. Tsi' bic'ti xut'uyob.

^25-26 Jini rey Darío tsi' ts'ijba jun. Tsi' choco majlel ti pejtelel i lumal, ti jujump'ejl tejclum tac ba' yujilob t'an ti chajp ti chajp. Tsi' subeyob: La' p'ojlic i ñʌch'tilel la' pusic'al. Joñon mic sub ti mandar, yom mi la' bʌc'ñan i Dios Daniel ti pejtelel c yumʌntel. Yom mi la' p'is ti wenta, come jiñʌch Cuxul bʌ Dios mu' bʌ i yajñel ti pejtelel ora. Ma'anic mi caj i jilel i yumʌntel. Mi' yajñel i p'ʌtʌlel ti pejtelel ora.

²⁷ Yujil coltaya. Yujil i loc'sañob ti wocol i cha'año' bʌ. Mi' pʌs ñuc tac bʌ i melbal ti panchan yic'ot ti pañimil. Tsi' colta Daniel. Ma'anic tsi' yʌc'ʌ ti jilel ti bajlum, che'en.

²⁸ Che' jini añʌch i ñuclel Daniel ti' yumʌntel Darío yic'ot ti' yumʌntel Ciro ch'oyol bʌ ti Persia.