Daniel 4 - Chol: I T’an Dios

Tsa' sojqui i jol Nabucodonosor

¹ Jiñʌch i t'an jini rey Nabucodonosor tsa' bʌ i subeyob pejtel winicob ti jujump'ejl lum ti pejtelel pañimil, yujilo' bʌ t'an ti chajp ti chajp: La' ñʌch'lec la' pusic'al.

² Com c subeñetla chuqui tsi' melbeyonla jini Ñuc bʌ Dios am bʌ ti Chan cha'an mi la' ña'tan cabʌl i p'ʌtʌlel.

³ Wen ñuc i melbal. Mi' yajñel i yumʌntel ti pejtelel ora. Mi' pʌsbeñob i p'ʌtʌlel winicob yic'ot i yalobilob ti lajm ti lajm.

^4-5 Joñon Nabucodonosor, che' ñʌch'ʌlon ti cotot, che' wen chumulon, tsa' cajiyon ti tsic pusic'al cha'an chuqui tac tsac ñajle che' ñololon tic wʌyib.

⁶ Jini cha'an tsac choco ti pʌyol pejtelel año' bʌ cabʌl i ña'tʌbal chumulo' bʌ ti Babilonia cha'an mi' tsictesañob i sujmlel c ñajal.

⁷ Tsa' tiliyob jini año' bʌ cabʌl i ña'tʌbal, yic'ot xch'ʌcojelob, yic'ot xq'uel ec'ob, yic'ot xtic'layajob. Tsac tsictesʌbeyob c ñajal, pero ma'anic tsa' mejli i subeñoñob i sujmlel.

⁸ Ti wi'il tsa' tili jini Daniel tsa' bʌ cotsʌbe i c'aba' Beltsasar cha'an mi' q'uejlel ti ñuc c dios. But'ul Daniel ti' yEspíritu jini Ch'ujul bʌ Dios. Tsac tsictesʌbe c ñajal.

⁹ Tsac sube: “Beltsasar ñuc bʌ yumʌlet ti' tojlel jini cabʌl bʌ i ña'tʌbal. Awujil chuqui mi caj i yujtel ti wi'il bʌ q'uin. Cujil cʌntesʌbilet cha'an i Ch'ujlel jini Ch'ujul bʌ Dios. Ma' cʌmben i sujmlel jini mucul tac bʌ. Ñich'tan chuqui tsaj q'uele tic ñajal. Tsictesʌbeñon i sujmlel.

^10-11 Jiñʌch iliyi tsa' bʌ c ñajle che' ñololon tic wʌyib: Tsaj q'uele wa'al ti joctʌl juntejc colem te' wen chan bʌ. Tsa' coli majlel ili te'. Tsa' ñuc'a. Tsa' c'ʌlʌl c'oti i c'ʌb i yopol ti panchan. Tsa' mejli ti q'uejlel ti pejtelel pañimil.

¹² Wen i t'ojol jax i yopol, wen cabʌl i wut. Jasʌl i wut cha'an mi' c'uxob ti pejtelel pañimil. Ya' tsa' ajni pejtel bʌte'el ti' yʌxñilel i yebal. Jini xwejlel mut tsi' meleyob i c'u' ti' c'ʌb te'. Ya' tsi' we'sayob i bʌ pejtel cuxulo' bʌ.

¹³ Tsaj q'uele tic ñajal, woli' jubel ti panchan juntiquil i yángel Dios.

¹⁴ C'am woli ti t'an: Seq'uela jini te'. Tsepbenla i c'ʌb, loc'sʌbenla i yopol. P'ujp'unla majlel i wut. La' puts'icob pejtel bʌte'el am bʌ ti' yʌxñilel, yic'ot xwejlel mut am bʌ i c'u' ti' c'ʌb.

¹⁵ Pero la' cʌlec i xujc'unte'lel yic'ot i wi'. Cʌchʌla ti cadena melbil bʌ ti tsucu taq'uin yic'ot bronce. Cʌyʌla ya' ti' yojlil jamil. La' ach'ac ti ye'eb. La' i c'ux jam temel yic'ot bʌte'el.

¹⁶ La' sojquic i jol. La' sujtic che' bajche' bʌte'el. La' to ajnic ti jamil wucp'ejl jab.

¹⁷ Jiñʌch i mandar jini Ñuc bʌ xQ'uelojel. Tsi' choco tilel yic'ot jini ch'ujul bʌ ángelob cha'an mi' ña'tʌntel ti pejtelel pañimil an i p'ʌtʌlel lac Yum ti' tojlel yumʌlob ti pañimil. Mi' yʌq'uen i yumʌntel majqui jach yom. Mi' wa'chocon jini pec'o' bʌ winicob ti' tojlel i pi'ʌlob.

¹⁸ Jiñʌch tsa' bʌ c ñajle. Jini cha'an, Beltsasar, yomix wʌle ma' tsictesʌbeñon i sujmlel, come ti pejtelob jini año' bʌ i ña'tʌbal tic yumʌntel ma'anic juntiquil mu' bʌ i ch'ʌmben isujm che' bajche' jatet, come an ti a pusic'al i yEspíritu jini Ch'ujul bʌ Dios”. Che' tsi' yʌlʌ jini rey Nabucodonosor.

¹⁹ Ñʌch'ʌl tsa' cʌle Daniel am bʌ i cha'chajplel i c'aba' Beltsasar. Tsa' caji i wen mel i pusic'al. Pero jini rey tsi' sube: Beltsasar, mach a mel a pusic'al. Subeñon i sujmlel c ñajal, che'en. Daniel tsi' jac'be: ¡Mach cha'leyajix c yum! Uts'at muq'uic i yujtel ti' tojlel a contrajob che' bajche' tsa' ñajle.

²⁰ Jini chan bʌ te' tsa' bʌ a q'uele, tsa' bʌ coli c'ʌlʌl ti panchan jiñʌch jatet. Tsiquil jini te' ti' ti'il pañimil.

²¹ Wen i t'ojol jax i yopol, wen cabʌl i wut. Jasʌl i wut cha'an mi' we'san pejtel cuxulo' bʌ. Tsa' ajni bʌte'el ti' yʌxñilel i yebal. Jini xwejlel mut tsi' mele i c'u' ti' c'ʌb.

²² Jini te' jiñʌch jatet, c rey. Tsa' coliyet. Tsa' p'ʌtesa a bʌ. Tsa' wen coli a ñuclel c'ʌlʌl tsa' c'oti ti panchan. A yumʌntel tsa' tsictiyi ti pejtelel pañimil.

²³ Tsa' q'uele i yángel Dios woli bʌ i jubel tilel ti panchan woli bʌ i yʌl: “Seq'uela jini te'. Laj jisanla. Jini jach i xujc'unte'lel yic'ot i wi' mi caj i cʌytʌl ti lum. Cʌchʌla ti cadena melbil bʌ ti tsucu taq'uin yic'ot bronce. Cʌyʌla ya' ti yojlil jamil. La' i c'ux pimel temel yic'ot bʌte'el wucp'ejl jab”. Che' tsi' yʌlʌ jini ángel.

²⁴ Jini tsa' bʌ a ñajle jiñʌch chuqui mi' caj ti ujtel ti a tojlel. Jini Dios am bʌ ti chan tsi' tsictesʌbeyet.

²⁵ Mi caj a tʌts' a bʌ ti' tojlel winicob. Mi caj a wajñel yic'ot bʌte'el. Mi caj a c'ux jam che' bajche' wacax. Jini tijil mi caj i yʌch'esan a bʌc'tal. Wucp'ejl jab mi caj a wajñel che' bajche' iliyi, jinto ma' wen cʌn jini Dios am bʌ i p'ʌtʌlel ti' tojlel pejtelel yumʌlob ti pañimil. Mi' wa'chocon ti yumʌl majqui jach yom.

²⁶ Tsi' yʌc'ʌ mandar cha'an mi' cʌybentel i xujc'unte'lel ya' ti lum come mux caj a cha' ch'ʌm a yumʌntel che' bʌ tsa'ix a cʌñʌ Dios am bʌ i p'ʌtʌlel.

²⁷ Jini cha'an c rey, jac'beñon c t'an. Cʌyʌ a mul. Mele chuqui toj. P'untan jini p'ump'uño' bʌ. Muq'uic a mel bajche' iliyi, tic'ʌl mi caj i ñusʌbeñet a mul cha'an ma' chʌn ajñel ti a tijicñʌyel, che'en Daniel.

²⁸ Pejtelel iliyi tsa' bʌ tsictesʌbenti jini rey Nabucodonosor tsa' ts'ʌctiyi ti' tojlel.

²⁹ Tsa' to ñumi jump'ejl jab. Che' wa'acña jini rey ya' ti' jol i yotot ti Babilonia,

³⁰ tsa' caji i yʌl: ¡Q'uelela wen ñuc Babilonia! Joñon tsac mele ili ñuc bʌ tejclum ba' chumulon tic yumʌntel cha'an mi' cʌjñel c p'ʌtʌlel yic'ot c ñuclel ti pejtelel pañimil, che'en.

³¹ Che' woli to ti t'an jini rey, tsi' yubi t'an tilem bʌ ti panchan tsa' bʌ i yʌlʌ: Ubin iliyi rey Nabucodonosor. A yumʌntel mach chʌn a cha'anix.

³² Mi caj a chojquel loq'uel ti' tojlel winicob. Mi caj a wajñel yic'ot bʌte'el wucp'ejl jab. Mi caj a c'ux jam che' bajche' tat wacax jinto ma' wen cʌn jini Dios am bʌ ti chan am bʌ i p'ʌtʌlel ti pejtelel tejclum tac ti pañimil. Mi' wa'chocon ti yumʌl majqui jach yom, che'en.

³³ Ti jini jach bʌ ora tsa' ts'ʌctiyi jini t'an tsa' bʌ subenti Nabucodonosor. Tsa' chojqui loq'uel ti' tojlel winicob. Tsi' c'uxu jam che' bajche' wacax. Tsa' ach'a i bʌc'tal ti tijil jinto tsa' coli i tsutsel che' bajche' xiye'. Tsa' tam'a i yejc'ach che' bajche' te'lemut.

Tsa' cha' wen'a Nabucodonosor

³⁴ Nabucodonosor tsi' yʌlʌ: Che' ñumenix wucp'ejl jab, joñon Nabucodonosor tsac letsa c wut ti panchan. Tsa' cha' jajmi c pensar. Tsa' caji c ñuq'uesan Dios am bʌ ti Chan. Tsaj q'uele ti ñuc jini cuxul bʌ ti pejtelel ora. Mi' yajñel i yumʌntel ti pejtelel ora. Chʌn xuc'ul i yumʌntel ti' tojlel winicob yic'ot i p'olbalob ti lajm ti lajm.

³⁵ Pejtel winicob ti pañimil ma'anic i c'ʌjñibal ti' tojlel. Mi' mel che' bajche' yom ti' tojlel jini año' bʌ ti panchan yic'ot jini chumulo' bʌ ti pañimil. Ma'anic majch mi mejlel i mʌctʌben i p'ʌtʌlel. Ma'anic majch mi mejlel i suben: “¿Chuqui woli a mel?” Mach mejlic ti tijq'uel.

³⁶ Ti jimbʌ ora tsa' cha' wen'ayon. Tsa' cha' aq'uentiyon c yumʌntel yic'ot c ñuclel. Jini gobernadorob yic'ot ñuc bʌ yumʌlob año' bʌ tic wenta tsi' sʌclayoñob. Tsa' cha' wa'chocontiyon ti rey. Ñumen tsa' aq'uentiyon c ñuclel che' bajche' ti ñaxan.

³⁷ Jini cha'an, joñon Nabucodonosor, mic ch'ujutesan, mic ñuq'uesan, mij q'uel ti ñuc jini Yumʌl am bʌ ti panchan. Pejtelel chuqui mi' mel utsat, toj ja'el. An i p'ʌtʌlel cha'an mi' peq'uesan jini mu' bʌ i chañ'esañob i bʌ. Che' tsi' yʌlʌ Nabucodonosor.