Daniel 3 - Chol: I T’an Dios

Tsa' coltʌnti loq'uel ti c'ajc

¹ Jini rey Nabucodonosor tsi' yʌc'ʌ ti wa'chocontel i yejtal winic melbil bʌ ti oro lujump'ejl i cha'c'al (30) metro i chanlel, uxp'ejl metro i bonticlel. Tsi' yʌc'ʌ ti wa'chocontel ya' ti joctʌl i c'aba' Dura, ya' ti Babilonia.

² Tsi' choco ti pʌyol pejtel presidentejob ti jujump'ejl alʌ tejclum tac, gobernadorob, i yumob soldadojob, juezob, tesorerojob, consejerojob, licenciadojob, yic'ot año' bʌ i ye'tel ti jujump'ejl tejclum, cha'an mi' melbeñob i q'uiñilel i yejtal winic tsa' bʌ i wa'choco.

³ Pejtel ili yumʌlob tsi' laj tempayob i bʌ ti' tojel i yejtal winic cha'an mi' melbeñob i q'uiñilel.

⁴ Jini suboñel tsi' yʌlʌ ti c'am bʌ t'an: Ñich'tanla, winicob ch'oyolet bʌ la ti jujump'ejl tejclum, la' wujil bʌ t'an ti chajp ti chajp.

⁵ Che' mi la' wubin i t'an jini trompeta, jini flauta, jini citara, jini arpa, jini salterio, jini zampoña, yic'ot yan tac bʌ música, ti jim bʌ ora yom mi la' ñoctʌl ti pejteletla cha'an mi la' ch'ujutesan i yejtal winic melbil bʌ ti oro wa'chocobil bʌ cha'an jini rey Nabucodonosor.

⁶ Jini mach bʌ anic mi' ñoctʌl cha'an mi' ch'ujutesan jini wa'chocobil bʌ i yejtal winic, ti ora jach mi caj i chojquel ochel ti' yajñib c'ajc woli bʌ ti lejmel, che'en.

⁷ Che' tsa'ʌch subentiyob winicob loq'uemo' bʌ ti pejtelel lum yujilo' bʌ t'an ti chajp ti chajp, tsa' caji ti jajts'el jini música tac ti chajp ti chajp. Tsi' laj ñocchocoyob i bʌ cha'an mi' ch'ujutesañob jini wa'chocobil bʌ i yejtal winic.

⁸ Pero jini caldeojob año' bʌ i ye'tel tsa' majli i subeñob rey i mul jini judíojob mach bʌ anic tsi' ñocchocoyob i bʌ.

^9-10 Tsi' subeyob: Wen ñuquet c rey. Tsa' wʌc'ʌ mandar cha'an mi' ñocchocoñob i bʌ pejtel winicob che' mi' yubiñob jini música, cha'an mi' ch'ujutesañob i yejtal winic melbil bʌ ti oro.

¹¹ Jini mach bʌ anic mi' ñoctʌl cha'an mi' ch'ujutesan mi caj i chojquel ochel ti' yajñib c'ajc woli bʌ ti lejmel, che'et.

¹² Pero jini Sadrac, Mesac, yic'ot Abednego, judíojob año' bʌ i ye'tel ti a tojlel ti uxp'ejl tejclum ti Babilonia, ma'anic mi' p'isob ti wenta a t'an. Ma'anic mi' ch'ujutesañob a diosob, mi i yejtal winic tsa' bʌ a mele ti oro.

¹³ Tsʌytsʌyña jax i pusic'al jini rey Nabucodonosor cha'an mich'. Tsi' choco ti pʌyol Sadrac, Mesac yic'ot Abednego. Tsa' pʌjyiyob tilel ti ora.

¹⁴ Jini rey tsi' subeyob: Sadrac, Mesac yic'ot Abednego, ¿isujm ba ma'anic mi la' ch'ujutesan c diosob, yic'ot i yejtal winic tsa' bʌ c mele ti oro?

¹⁵ Ma'anic chuqui mi caj c tumbeñetla wʌle mi chajpʌbiletixla cha'an mi la' ñoctʌl. Che' mi' cha' jajts'el jini música tac, yom mi la' ch'ujutesan i yejtal winic tsa' bʌ c wa'choco. Pero mi ma'anic mi la' ch'ujutesan, mi caj la' chojquel ochel ti' yajñib c'ajc woli bʌ ti lejmel. Che' jini, ¿majqui jini dios mu' bʌ mejlel i coltañetla? che'en Nabucodonosor.

¹⁶ Ti yuxticlelob tsi' jac'beyob jini rey: Ma'anic mi caj j coltan lojon c bʌ ti a tojlel.

¹⁷ Wen ñuc c Dios lojon mu' bʌ j c'uxbin lojon. Mi mejlel i coltañon lojon cha'an ma'anic mic chʌmel lojon ti c'ajc. Che'ʌch mi caj i mel. Mi caj i loc'sañon lojon ti a p'ʌtʌlel.

¹⁸ Mi yom i coltañon lojon o mi mach yomic, ma'anic mi caj c ñocchocon lojon c bʌ cha'an mic ch'ujutesan a diosob mi i yejtalic winic melbil bʌ ti oro tsa' bʌ a wa'choco, che'ob.

¹⁹ Tsa' chʌc'a i wut jini rey cha'an tsa' wen mich'a cha'an i t'an ili uxtiquil winicob. Tsi' yʌc'ʌ mandar cha'an mi' xijq'uel jini c'ajc cha'an mi' lejmel wucyajl i ñumel i ticwʌlel.

²⁰ Tsi' choco majlel wen p'ʌtʌlo' bʌ soldadojob cha'an mi' cʌchob Sadrac, Mesac yic'ot Abednego, cha'an mi' chocob ochel ya' ti' yajñib c'ajc woli bʌ ti lejmel.

²¹ Tsi' moch cʌchʌyob ili uxtiquil winicob, xojolob i cha'an i pixol yic'ot i pislel yumʌlob. Tsi' chocoyob ochel ti' yajñib c'ajc woli bʌ ti lejmel.

²² Wen ticʌw jax jini c'ajc, come xic'bilix che' bajche' tsi' yʌc'ʌ mandar jini rey. I c'ʌc'al jini c'ajc tsi' tsʌnsa jini soldadojob tsa' bʌ i chocoyob ochel.

²³ Cʌchbilob tsa' yajliyob Sadrac, Mesac, yic'ot Abednego ti yojlil i yajñib c'ajc woli bʌ ti lejmel.

²⁴ Tsa' toj sajti i pusic'al jini rey. Tsa' bʌc' ch'ojyi. Tsi' c'ajtibe i winicob: ¿Mach ba anic tsa' la cotsa ti c'ajc uxtiquil winicob che' cʌchbilob? che'en. Tsa' cu, che'ob.

²⁵ Pero wolij q'uel chʌntiquil winicob jitbilobix. Woliyob ti xʌmbal ti' yojlil c'ajc. Ma'anic chuqui woli' yubiñob. Che'ʌch yilal i chʌnticlel bʌ bajche' juntiquil dios, che'en.

²⁶ Jini cha'an jini rey Nabucodonosor tsi' lʌc'tesa i bʌ ba'an i ti' i yajñib c'ajc woli bʌ ti lejmel. Tsi' yota jini año' bʌ ti mal c'ajc: Sadrac, Mesac, Abednego, i winiquet bʌ la jini Dios am bʌ ti Chan, loq'uenla ya'i. La' la ilayi, che'en. Ti' yuxticlelob tsa' loq'uiyob ti' yojlil c'ajc.

²⁷ Pejtelel jini yumʌlob loq'uemo' bʌ ti jujump'ejl tejclum tsa' tili i q'uelob. Awilan ma'anic tsa' puliyob ti c'ajc. Ma'anic tsa' wis puliyob mi i tsutselic i jol mi i pislelic. Ma'anic tsa' tsictiyi mi i yujts'ilic buts' ti' tojlelob.

²⁸ Nabucodonosor tsi' yʌlʌ: La' ñuq'uesʌntic i Dios Sadrac, Mesac yic'ot Abednego, come tsi' choco tilel i yángel cha'an mi' coltan i winicob tsa' bʌ i ñopoyob. Ma'anic tsi' jac'ʌyob c mandar. Tsi' ña'tayob uts'at mi' chʌmelob pero mach uts'atic mi' ch'ujutesañob yambʌ dios, jini jach i Dios.

²⁹ Jini cha'an mic subeñob pejtel winicob ti pejtelel lum yujilo' bʌ t'an ti chajp ti chajp: “Majqui jach mi' cha'len p'ajoñel ti' contra i Dios Sadrac, Mesac yic'ot Abednego la' bic'ti tsejpic. La' jembentic i yotot, come ma'anic yambʌ mu' bʌ mejlel i cha'len coltaya che' bajche' iliyi”. Che' tsi' cha'le mandar Nabucodonosor.

³⁰ Jini rey tsi' yʌq'ueyob ñumen ñuc tac bʌ i ye'tel Sadrac, Mesac yic'ot Abednego ya' ti' lumal Babilonia.