Cantares 5 - Chol: I T’an Dios

¹ (Jini rey Salomón:) Tsa'ix juliyon tic pʌc'ʌb, quijñam c pi'ʌlet bʌ. Wolix c tuc' mirra yic'ot yambʌ xojocña bʌ c cha'an. Wolij c'ux chab. Wolic jap vino yic'ot lech. (Jini xch'ocob ti Jerusalén:) Che'ʌch yom, c'uxula, japʌla ti pejtelel a pusic'al, come temeletla mu' bʌ la' c'uxbin la' bʌ. Yom tijicñayetla. (Jini xch'oc:)

I ch'ijiyemlel cha'an tsi' poj cʌyʌyob i bʌ

² Che' wʌyʌlon ti ac'ʌlel, tsa' caji ti ch'ojyel c pusic'al ti ñajal. Tsa cubibe i t'an jini c'uxbibil bʌ c cha'an. Wa'al ti' ti' c wʌyib, woli' c'ajtin ochel ba' añon. Jambeñon abi c'uxbibilet bʌ c cha'an, quijñam, x'ujcuts a t'ojol jax bʌ, come tsac ñusa ac'ʌlel ti jumpat. Ach'onix cha'an ye'eb, che'en.

³ Pero tsac sube: Jocholix c bujc. ¿Yom ba mic cha' lʌp? Pocolix coc. ¿Yom ba mic bib'esan? cho'on.

⁴ Jini c'uxbibil bʌ c cha'an tsi' ñopo i jamben i ti' otot. Tsac p'unta tic pusic'al. Comix j q'uel.

⁵ Tsa' bʌc' ch'ojyiyon cha'an mic jamben. Tsa' p'ajti ti lum jini perfume am bʌ tij c'ʌb yic'ot xojocña bʌ mirra che' bʌ tsac loc'sa cadena tac ti' ti'.

⁶ Tsac jambe, pero ma'anix tsiquil jini c'uxbibil bʌ c cha'an. Tsa' toj sajti c pusic'al. Tsac sʌcla, pero ma'anic tsac taja. Tsac pʌyʌ, pero ma'anic tsi' jac'ʌ.

⁷ Jini xq'ueloñelob tsi' tajayoñob. Tsi' jats'ʌyoñob. Tsi' lowoyoñob. Jini xq'uel tejclum am bʌ ti ts'ajc tsi' chilbeyon i pislel c wut.

⁸ A wocolic x'ixicob ti Jerusalén, mi tsa' la' q'uele jini c'uxbibil bʌ c cha'an, subenla ch'ijiyemon cha'an comix j q'uel. (Jini xch'ocob chumulo' bʌ ti Jerusalén:)

I yijñam mi' sub i ñuclel i ñoxi'al

⁹ X'ixic a t'ojol jax bʌ, ¿majqui jini c'uxbibil bʌ a cha'an? ¿Mach ba lajalic bajche' yaño' bʌ? ¿Chucoch ma' lon tilel a subeñon lojon? (Jini xch'oc:)

¹⁰ Tsi' q'uixi q'uin jini c'uxbibil bʌ c cha'an. Wen uts'at ti q'uelol. Ñumen uts'at bajche' lujump'ejl mil winicob.

¹¹ Lajal bajche' oro i jol. I'ic' i tsutsel i jol.

¹² Lajal i wut bajche' x'ujcuts ti' t'ejl aban ba' ñʌch'ʌl i ya'al.

¹³ Lajal i ni' i wut bajche' xojocña bʌ pimel mu' bʌ i colel ti pʌc'ʌb. Lajal i pʌchʌlel i yej che' bajche' lirio am bʌ i perfume. Lajal i yiq'uilel i yej che' bajche' mirra.

¹⁴ P'ʌtʌl i c'ʌb bajche' oy melbil bʌ ti oro. I t'ojol jax bajche' topacio. Che'ʌch i sʌclel i bʌc'tal bajche' i bʌquel i yej elefante ch'ʌlbil ti ujʌl tac letsem bʌ i tojol.

¹⁵ Chan i yoc bajche' oy melbil bʌ ti i t'ojol jax bʌ mármol chucul bʌ ti oro. Chan bajche' jini ch'ujte' ti Líbano. Ma'anic yambʌ winic lajal bajche' jini.

¹⁶ Ña'tanla, x'ixicob, chumulet bʌ la ti Jerusalén, uts'atax i yej, tsaj i t'an, uts'atax i pusic'al. Che'ʌch yilal jini c'uxbibil bʌ c cha'an, che'en.