Cantares 4 - Chol: I T’an Dios

I ñoxi'al mi' sub i ñuclel i yijñam

¹ (Jini rey Salomón:) A t'ojol jax quijñam mu' bʌ j c'uxbin, a t'ojol jax. Lajal a wut mʌcʌl bʌ ti pisil bajche' x'ujcuts. Liquil i tsutsel a jol mi' wejluyel che' bajche' alʌc'ʌl mu' bʌ ti tijp'el tac ti wits.

² Sʌsʌc i bʌquel a wej che' bajche' i tsutsel alʌc'ʌl mu' bʌ caj ti tsejpel, tsa' bʌ ujti ti ts'ʌnsʌntel.

³ Lajal bajche' chʌchʌc puy i pʌchʌlel a wej. Uts'atax a wej. I pi'ʌlob i bʌ a choj che' bajche' cha'wejl manzana tsa' bʌ t'oxle ti ojlil. Lajal i tsutsel a jol che' bajche' seda. Mi' mos a wut.

⁴ Lajal a bic' bajche' jini chan bʌ q'ueloñib tsa' bʌ i wa'choco David. I t'ojol jax bajche' chan bʌ ts'ajc ch'ʌlbil bʌ ti' mʌctijib soldadojob.

⁵ Lajal a chu' bajche' cha'cojt alʌme' loj bʌ, woliyo' bʌ ti buc'bal ba'an sʌsʌc nichim.

⁶ Mic majlel ti wits ba'an mirra, ti jini alʌ wits ba' mic ch'ujutesan c Dios jinto che' mi' sʌc'an pañimil, jinto che' mi' ñumel axñal.

⁷ Uts'atet c'uxbibilet bʌ c cha'an. Ma'anic mi ts'ita'ic a p'ajomal. Wen tijicñayon quic'otet.

⁸ La' quic'ot, quijñam. Cʌyʌ Líbano. Temel yom mi lac majlel laj q'uel pañimil ya' ti pam wits tac i c'aba' Amana yic'ot Senir yic'ot Hermón ba'an i ch'eñal bajlum.

⁹ Tsa'ix a but'esa c pusic'al ti c'uxbiya, quijñam c pi'ʌlet bʌ. Tsa'ix a but'esa c pusic'al ti c'uxbiya, cha'an tsa' poj pʌsbeyon a wut, cha'an tsa' wʌq'ueyon junxojt' bʌ a wuj.

¹⁰ Tsajatax yubil a c'uxbiya, quijñam c pi'ʌlet bʌ. Ñumen sumuc bajche' vino. Ñumen xojocña a perfume bajche' pejtel jini xojocña bʌ letsem bʌ i tojol.

¹¹ Che' ma' cha'len t'an, tsaj yubil che' bajche' i ta'il chab. Che'ʌch yilal a t'an bajche' chab yic'ot lech. Xojocña a pislel che' bajche' jini ch'ujte' ti Líbano.

¹² Lajalet quijñam c pi'ʌlet bʌ bajche' pʌc'ʌbʌl joyol bʌ ti ts'ajc, che' bajche' loq'uib ja' wen ñup'ul bʌ.

¹³ C'uxbibilet che' bajche' pʌc'ʌbʌl yujil bʌ wut, wen letsem tac bʌ i tojol, yic'ot pʌc'ʌbʌl ba' mi' colel tac jini te' mu' bʌ i yʌc' perfume: nardo,

¹⁴ azafrán, sic'ʌb, canela, yic'ot pejtel yan tac bʌ te' am bʌ i c'ʌjñibal cha'an i melol pom, mirra yic'ot i yetsel áloes.

¹⁵ Lajalet bajche' i ch'ujyib ja' am bʌ ti pʌc'ʌbʌl, che' bajche' pozo ba'an cuxul bʌ ja' tilem bʌ ti Líbano. (Jini xch'oc:)

¹⁶ La' tilic ic' ch'oyol bʌ ti norte. La' tilic ic' ch'oyol bʌ ti sur. La' tic pʌc'ʌb cha'an mi' yʌc' ti ñumel i yujts'il c'ʌlʌl ba'an jini c'uxbibil bʌ c cha'an. La' tilic jini c'uxbibil bʌ c cha'an ti' pʌc'ʌb cha'an mi' c'uxbin jini yajcʌbil bʌ i wut wen sumuc bʌ.