Cantares 2 - Chol: I T’an Dios

¹ (Jini c'ajtibil bʌ:) Lajalon bajche' i nich rosa mu' bʌ i colel ti Sarón. Lajalon bajche' lirio, ñet'el bʌ ti ch'ixol. (Jini rey Salomón:)

² Isujm lajalet bajche' lirio wen c'uxbibil bʌ c cha'an. Che' bajche' ch'ix mij q'uel yan tac bʌ xch'oc año' bʌ ti a joytilel. (Jini xch'oc:)

³ Jini c'uxbibil bʌ c cha'an lajalʌch bajche' manzana te'. Ñumen uts'at bajche' yambʌ ch'iton winicob. Tijicñayon che' buchulon ti' yʌxñilel. Wen sumuc i wut te' mi cubin.

⁴ Mi' pʌyon ochel ba' mi lac cha'len we'el ti' tojlel pejtel pʌybilo' bʌ i cha'an. Mi caj i q'uelob bajche' mi' c'uxbiñon.

⁵ Aq'ueñon yʌcʌcña bʌ i bʌl c ñʌc'. La' ñuc'ac c pusic'al cha'an a c'uxbiya. I wentajʌch i bʌl c ñʌc' mi cubin. Che' ñajt an mic mel c pusic'al. Cabʌl mic ña'tan.

⁶ La' ajnic jini ts'ej bʌ i c'ʌb ti' yebal c jol. La' i mec'on ti' ñoj.

⁷ C pi'ʌlob ti Jerusalén, mic subeñetla mach ma' xic'ben jini c'uxbibil bʌ c cha'an. La'to ajnic jinto che' mi' bajñel ña'tan i pʌs i c'uxbiya. Subeñon mi mux caj la' jac'.

^8-9 ¿Chuqui jini woli bʌ cubin? Jiñʌch c'uxbibil bʌ c cha'an. Wʌ'ix tilel. Wolix i tijp'el tilel che' bajche' alʌme' ti wits. Mi' tijp'el c'axel ba' japal. Untsa' ti' pat ts'ajc. Wolix i q'uelon ti alʌ puerta.

¹⁰ Jini c'uxbibilon bʌ c cha'an tsi' subeyon: Ch'ojyen, c'uxbibilet bʌ c cha'an. Conla.

¹¹ Come tsa'ix ñumi i yorajlel tsʌñal, tsa'ix ñumi i yorajlel ja'al.

¹² Wolix i pasel nichim. I yorajlelix mi' cajelob ti c'ay jini te'lemut. Isujm i yorajlelix jajmel.

¹³ Woli ti ch'ocan te'. Woli ti nich ts'usubil. Wen xojocña i yujts'il. Ch'ojyen, c'uxbibilet bʌ c cha'an, a t'ojol jax bʌ. Conla.

¹⁴ C cha'añet, xch'oc. Lajalet bajche' x'ujcuts. Mi' muc i bʌ ti' pat xajlel ya' ba lech'el. Pejcañon. La' cubin a t'an, com q'uel a wut. A t'ojol jax.

¹⁵ Yalo' wax tac woli' jisan lac ts'usubil. Chucbeñonla, come woli ti nich ts'usub, che'en.

¹⁶ C cha'añʌch jini c'uxbibil bʌ. Joñon ja'el i cha'añon. Woli' c'ux i waj ti' tojlel lirio,

¹⁷ jinto che' mi' sʌc'an pañimil, che' ma'anix axñal. La', c'uxbibil bʌ c cha'an, sutq'uin a bʌ. La' ti tijp'el che' bajche' alʌme' ti jini wits mu' bʌ i t'oxonla.