Amos 9 - Chol: I T’an Dios

Ma'anic majqui mi mejlel i puts'tan lac Yum

¹ Tsaj q'uele lac Yum wa'al ti' tojlel jini pulʌntib. Tsi' yʌlʌ: Jats'ʌ jini oy tac jinto mi' ñijcʌyel i buchlib otot. Jeme jubel jini oy cha'an mi' jats'beñob i jol pejtel tejclumob. Mi caj c tsʌnsan ti espada jini mu' bʌ i cʌytʌlob. Mach mejlic ti puts'el majlel mi juntiquilic. Ma'anic majqui mi caj i coltan i bʌ.

² Anquese mi' lon picob majlel i bijlel cha'an mi' jubelob ti' yajñib chʌmeño' bʌ, mi caj c tajob. Mi caj c chucob. Anquese mi' lon ña'tañob letsel ti panchan, mi caj c tujc'añob jubel.

³ Anquese mi' lon mujcuñob i bʌ ti' pam Carmelo wits, mi caj c tajob ya'i. Anquese mi' yochelob ti yebal colem ñajb, cha'an mi' mujcuñob i bʌ ba' ma'anic mij q'uelob, mux c wersa tajob. Mi caj cʌq'uen mandar colem lucum cha'an mi' ts'otiñob.

⁴ Mi cʌchʌl mi' pʌjyelob majlel ti' lumal i contrajob, mi caj cʌc' mandar cha'an mi' tsʌnsʌntelob ti espada. Joñon mi caj j q'uelob cha'an mij contrajiñob. Ma'anic mi caj j coltañob, che'en lac Yum.

⁵ Lac Yum jiñʌch i Dios Panchan yic'ot Pañimil. Che' mi' tʌl jini lum, mi' yulmʌl. Pejtelel xchumtʌlob mi' cajelob ti uq'uel. Jini lum mi' caj ti colel letsel che' bajche' colem ja' i c'aba' Nilo ti' yorajlel but'ja'. Mi caj i cha' jubel che' bajche' jini colem ja' am bʌ ti Egipto.

⁶ Jiñʌch lac Yum mu' bʌ i mel i chumlib ya' ti' chañilel panchan. Mi' c'ʌcchocon i yoyel panchan ti lum. Mi' ch'uy letsel ja' am bʌ ti colem ñajb. Mi' cha' choc jubel ti lum. I c'aba'ʌch lac Yum.

⁷ Israelet bʌ la, ¿mach ba lajaletic la tic tojlel bajche' jini etiopejob? Junlajaletla. ¿Mach ba joñonic tsa' bʌ c pʌyʌ loq'uel Israel ti' lumal egiptojob? Joñon tsac pʌyʌ loq'uel jini filisteojob ti Caftor. Tsac pʌyʌ loq'uel arameojob ti Kir.

⁸ Awilan, la' Yum Dioson. Wolij q'uel pejtel la' mul, israelob. Mi caj c boquetla loq'uel ti la' lumal, pero ma'anic mi caj c laj jisañetla, che'en lac Yum.

⁹ Come joñon woli cʌc' mandar. Mi caj c chijcan israelob ya' ti' tojlel colem bʌ tejclum tac che' bajche' mi la' chijcan trigo. Pero ma'anic mi caj i yajlel mi jump'ejlic i bʌc'.

¹⁰ Mi caj i chʌmelob ti espada pejtel jini xmulilob mu' bʌ i lon alob: “Ma'anic mi caj i ñochtañonla jini bʌbʌq'uen bʌ. Ma'anic mi caj i tajonla”, che'ob.

Dios mi caj i cha' tsijibtesan Israel

¹¹ Ti jim bʌ q'uin, mi caj c tech ch'ojyel i p'olbal David yic'ot i tejclum tsa' bʌ jejmi. Mi caj c cha' ñup' jini calal tac bʌ ts'ajc. Mi caj c cha' mel chuqui tac tsa' jejmi. Mi caj c cha' mel ti tsijib che' bajche' ti ñaxan.

¹² Mi caj i yumʌntelob cha'an jini tsa' bʌ cʌleyob ti Edom yic'ot pejtel colem bʌ tejclum tac mu' bʌ i pejcañoñob tij c'aba', che'en lac Yum mu' bʌ caj i laj mel.

¹³ Tal i yorajlel, che'en lac Yum. Che' max to ujtemic jini c'ajbal, mux i cha' pijquel lum ti arado cha'an mi' cha' pʌjq'uel pʌc'ʌbʌl. Jini mu' bʌ i yʌts' ts'usub mi caj i taj jini xpac', come ora mi' caj ti colel. Jini colem bʌ wits yic'ot pejtel jini bujtʌl tac mi caj i yʌc' tsaj bʌ vino.

¹⁴ Mi caj c cha' pʌy tilel jini israelob año' bʌ ti to'o e'tel ti ñajt bʌ pañimil. Mi caj i cha' melob i tejclum tac tsa' bʌ jejmi. Mi caj i cha' chumtʌlob ya'i. Mi caj i pʌc'ob ts'usubil tac, mi caj i cha' japob i ya'lel ts'usub. Mi caj i cʌntañob pʌc'ʌbʌl tac, mi caj i c'uxbeñob i wut.

¹⁵ Mi caj c pʌc' c cha'año' bʌ ti' lumal. Ti pejtelel ora ma'anix mi caj i chʌn bojquelob ti' lum tsa' bʌ cʌq'ueyob, che'en la' Yum Dios.