Amos 7 - Chol: I T’an Dios

Uxchajp wocol tsi' q'uele ti espíritu

¹ Lac Yum Dios tsi' yʌq'ueyon j q'uel iliyi: Awilan, woli' chajpan mote' sajc' che' woli' cajel ti pasel jini mol. Jiñʌch wi'il bʌ i pʌc'bal che' ujtemix c'ajbal tsa' bʌ aq'uenti rey i wenta tojoñel.

² Jini mote' sajc' tsi' lu' c'uxu jini woli bʌ ti colel ti lum. Tsa cʌlʌ: C Yum Dios, awocolic ñusʌben i mul Israel. ¿Bajche' mi mejlel i cuch wocol i p'olbal Jacob? come mach cabʌlobic, cho'on tsac sube.

³ Jini cha'an tsa' cha' uts'a i pusic'al lac Yum. Lac Yum tsi' yʌlʌ: Ma'anix mic chʌn melben, che'en.

⁴ Lac Yum Dios tsi' yʌq'ueyon j q'uel yambʌ wocol. Awilan, lac Yum Dios woli' choc tilel c'ajc cha'an mi' tsʌc'mesan tam bʌ ja'. Woli' pul majlel jini lum.

⁵ Tsac sube: C Yum Dios, awocolic jasʌlix, yʌpʌ jini c'ajc. ¿Bajche' mi mejlel i cuch wocol i p'olbal Jacob? come mach cabʌlobic, cho'on.

⁶ Tsa' cha' uts'a i pusic'al lac Yum. Tsi' yʌlʌ lac Yum Dios: Ma'anix mic chʌn choc tilel, che'en.

⁷ Ti wi'il tsi' yʌq'ueyon j q'uel iliyi: Awilan, wa'al lac Yum ba'an ts'ajc. An plomo ti' c'ʌb.

⁸ Lac Yum tsi' subeyon: Amós, ¿chuqui wola' q'uel? che'en. Tsac sube: Plomo, cho'on. Lac Yum tsi' yʌlʌ: Awilan, woli cʌc' plomo ti' tojlel c cha'año' bʌ ti Israel. Ma'anix mi caj c chʌn ñusʌbeñob i mul israelob.

⁹ Mi caj c jembeñob i yotlel tac dioste' yic'ot i pulʌntib. Mi caj c tsʌnsan ti espada i p'olbal Jeroboam, che'en.

¹⁰ Amasías jini motomaj chumul bʌ ti Betel tsi' choco majlel jini t'an ba'an Jeroboam i rey Israel. Tsi' yʌlʌ: Amós woli' tem i t'an ti a contra ti' tojlel israelob. Mach cujchic lac cha'an i t'an.

¹¹ Come tsi' yʌlʌ Amós: “Jeroboam mi caj i chʌmel ti espada. Wersa mi caj i loq'uelob israelob ti' lumal cha'an mi' majlelob ti yambʌ lum”, che'en Amós. Che' tsi' yʌlʌ Amasías.

¹² Amasías tsi' sube Amós: Xñajalet, cucuñun ti puts'el ya' ti' lumal Judá. C'uxu a waj ya'i. Yom ma' cha'len subt'an ya'i.

¹³ Mach yomix ma' cha'len subt'an wʌ' ti Betel, come wʌ'an ch'ujul bʌ i yotot i dios jini rey. Wʌ'an i yotot rey ba' mi' cha'len i ye'tel, che'en Amasías.

¹⁴ Amós tsi' jac'be Amasías: Ma'anic tsac bajñel ña'ta ochel ti x'alt'an. Mach i yalobilonic x'alt'an ja'el. Xcʌnta tiñʌme'on. Mic porajin jini higuera te'.

¹⁵ Lac Yum tsi' pʌyʌyon che' bʌ wolij cʌntan tiñʌme'. Tsi' subeyon: “Cucu ba'an c tejclumob ti Israel. Subeñob c t'an”, che'en lac Yum.

¹⁶ Jini cha'an ubiben i t'an lac Yum: Jatet ma' wʌl: “Mach ma' cha'len subt'an ti Israel. Mach ma' cha'len subt'an ti' contra i yalobilob Isaac”, che'et.

¹⁷ Jini cha'an lac Yum woli' yʌl: Mi caj i sujtel a wijñam ti xmoja ti tejclum. Jini ch'iton bʌ yic'ot xch'oc bʌ a walobilob mi caj i tsʌnsʌntelob ti espada. Mi caj i t'oxtʌl a lumal. Jatet mi caj a chʌmel ti yambʌ lum ba' mach i cʌñʌyobic Dios. Isujm mi caj i wersa loq'uelob israelob ti' lumal cha'an mi' majlelob ti yambʌ lum, che'en lac Yum.