Abdias 1 - Chol: I T’an Dios

I peq'uesʌntel Edom

¹ Jiñʌch tsa' bʌ i q'uele Abdías ti espíritu. Lac Yum Dios tsi' cha'le t'an ti' contra Edom. Jiñʌch tsa' bʌ la cubi tilem bʌ ti lac Yum. Tsi' choco tilel i winic ti' tojlel winicob x'ixicob ti jujump'ejl lum. Tsi' yʌlʌ jini subt'an: Ch'ojyenla. Conla ti guerra ti' contra Edom, che'en.

² Lac Yum woli' subeñob jini año' bʌ ti Edom: Awilan, mi caj c peq'uesañetla ti' wut winicob x'ixicob ti yan tac bʌ lum. Mi caj la' junyajlel ts'a'lentel.

³ I chanlel la' pusic'al mi' lotiñetla, come mi la' chumtʌl ya' ba'an lech'el bʌ xajlel ti' chañelal wits tac. Mi la' lon al ti la' pusic'al: “¿Majqui mi mejlel i choconla jubel ti lum?” che'etla.

⁴ Tsa' wejliyetla letsel che' bajche' xiye'. Mi tsa' la' mele la' c'u' c'ʌlʌl ba'an ec', mi caj c choquetla jubel ya'i, che'en lac Yum.

⁵ ¡Wen p'ump'uñetla! Mi tsa' tiliyob xujch'ob cha'an mi' ch'ʌmob majlel la' chubʌ'an ti ac'ʌlel, cojach mi' xujch'iñob majlel chuqui tac yomob. Mi tsa' tiliyob winicob ba' añetla cha'an mi' tuc'ob ts'usub, ¿mach ba muq'uic i cʌyob i ch'oquel?

⁶ Pero q'uelela bajche' tsi' chilbeyob i chubʌ'an Esaú. Tsi' wersa sʌclʌbeyob i chubʌ'an tsa' bʌ i mucu.

⁷ Pejtel la' pi'ʌlob ti guerra tsi' lotiyetla. Tsi' chocoyetla loq'uel ti la' lumal. La' waj coltayajob tsi' contrajiyetla. Jini amigojob mu' bʌ la' q'uel ti ñuc tsi' yʌc'ʌyob yac cha'an mi' chuquetla. Ma'anic majch tsa' mejli i coltan i bʌ.

⁸ Ti jim bʌ ora mi caj c socben i ña'tʌbal jini año' bʌ ti Edom. Che' jini mi caj i laj sujtelob ti tonto ya' ti' wits Esaú, che'en lac Yum.

⁹ Mi' cajelob ti cabʌl bʌq'uen jini ch'ejl bʌ soldadojob ti Temán. Mi caj i junyajlel jisʌntelob pejtelel winicob ti' wits Esaú.

¹⁰ Mi caj la' cha'len quisin cha'an jontol tsa' la' tic'la la' wijts'in Jacob. Mi caj la' junyajlel jisʌntel.

¹¹ Tsa' la' cʌyʌ israelob ti' c'ʌb i contrajob ti' yorajlel i wocol. Che' tilemobix jini ñajt bʌ ch'oyolob tsa' bʌ i chilbeyob majlel i chubʌ'an, to'o wa'al jach tsa' cʌleyetla. Tsa' la' mele la' bʌ che' bajche' i contrajob tsa' bʌ ochiyob ti colem bʌ puerta tac. Tsi' cha'leyob yajcaya ti alas cha'an mi' t'oxob Jerusalén.

¹² Mach yomic mi la' wajlen la' pi'ʌlob che' mi' tajob wocol. Jontoletla come tijicña tsa' la' wubi che' bʌ tsa' laj jili i chubʌ'an la' pi'ʌlob ti Judá. Tsa' la' chañ'esa la' bʌ ti' yorajlel i wocol.

¹³ Jontoletla, tsa' ochiyetla ba' chumulob c cha'año' bʌ cha'an ma' q'uelbeñob i wocol. Tsa' la' wajle c cha'año' bʌ che' añob i ch'ijiyemlel i pusic'al ti' yorajlel i wocol. Tsa' la' xujch'ibeyob i chubʌ'an che' woli' jisʌntelob.

¹⁴ Tsa' la' chijta jini xputs'elob ya' ti xʌc' bij tac cha'an mi la' tsʌnsañob. Tsa' la' cha' otsayob ti' wenta i contrajob che' bʌ tsa' mejli i puts'tañob ti' yorajlel i wocol.

I ñuq'uesʌntel Israel

¹⁵ Mach jalix mi caj i tilel i q'uiñilel la' Yum ti' tojlel winicob x'ixicob ti pejtelel lum. Che' bajche' tsa' la' mele, mi caj la' melbentel. Mi caj la' q'uextʌbentel la' melbal.

¹⁶ Come che' bajche' tsa' la' mele ya' ti ch'ujul bʌ wits c cha'an ba' ora tsa cʌc'ʌ ti wocol c winicob tic mich'ajel, che' ja'el mi caj i melbentelob pejtel tejclumob ti pejtelel lum. Mi caj i japob ti taza but'ul bʌ tic mich'ajel yilal. Tʌclawob mi caj i majlelob. Mi caj i jilelob.

¹⁷ Pero mach che'ic ti Sion wits. Ya'i mi caj i yajñelob jini xputs'elob cha'an mi' coltʌntelob. Ch'ujul mi caj j q'uel ili wits. I p'olbal Jacob mi caj i cha' chumtʌlob ti' lumal. Mi caj i cha' tajob i chubʌ'an.

¹⁸ I p'olbal Jacob lajalob bajche' c'ajc yilal. Lajalob i p'olbal José bajche' c'ajc mu' bʌ ti lejmel. Pero i p'olbal Esaú lajalob bajche' chobʌlel. Mi caj i pulelob ti c'ajc. Ma'anic mi caj i cʌytʌl mi juntiquilic i p'olbal Esaú, come che'ʌch tsi' yʌlʌ lac Yum.

¹⁹ Jini ch'oyolo' bʌ ti sur mi caj i ch'ʌmob jini lum ya' ti' wits Esaú. Jini año' bʌ ti joctʌl mi caj i ch'ʌmbeñob i lum filisteojob yic'ot i lum Efraín yic'ot i lum Samaria. I p'olbal Benjamín mi caj i ch'ʌmben i lum Galaad.

²⁰ Jini israelob tsa' bʌ wersa pʌjyiyob majlel mi caj i sujtelob i ch'ʌmben i lum cananeojob c'ʌlʌl ti Sarepta. Jini ch'oyolo' bʌ ti Jerusalén tsa' bʌ wersa pʌjyiyob majlel ti Sefarad mi caj i ch'ʌmob jini tejclum tac am bʌ ti sur.

²¹ Xcoltayajob mi caj i letselob majlel ti wits i c'aba' Sion. Mi caj i yumʌntelob ya' ti' wits Esaú. Joñon mi caj cochel tic yumʌntel. Che' tsi' yʌlʌ lac Yum.