2 Samuel 7 - Chol: I T’an Dios

Jini xuc'ul bʌ t'an tsa' bʌ i mele Dios yic'ot David

¹ Tsa' c'axi ti chumtʌl jini rey David ti ñuc bʌ i yotot. Lac Yum tsi' c'unte' lajmesa guerra ti' tojlel i contrajob ti jujunwejl.

² Jini rey tsi' sube jini x'alt'an Natán: Q'uele bajche' añon wʌle come wʌ' chumulon ti colem otot melbil bʌ ti ch'ujte', pero jini Arca i cha'an lac Yum an jach ti juntsajl melbil bʌ ti pisil, che'en.

³ Natán tsi' sube jini rey: Mele pejtel chuqui a wom, come lac Yum woli' coltañet, che'en.

⁴ Awilan ti jini jach bʌ ac'ʌlel tsa' tili i t'an lac Yum ba'an Natán. Tsi' sube:

⁵ Cucu suben c winic David: “Jiñʌch i t'an a Yum: ¿Mu' ba caj a melbeñon cotot cha'an c chumlib?

⁶ Come ti isujm ma'anic ba' ora tsa' wis ajniyon ti otot c'ʌlʌl che' bʌ tsac loc'sa jini israelob ti Egipto. Ya jach ti pisil bʌ otot tsac cha'le xʌmbal quic'ot c cha'año' bʌ.

⁷ Che' bʌ tsac pi'leyob majlel baqui jach tsac sube jini israelob, ¿tsa' ba j c'ajtibeyob cotot jini año' bʌ i ye'tel ti' tojlel israelob? Ma'anic tsac sube mi juntiquilic cha'an mi' melbeñon cotot ti ch'ujte'”.

⁸ Jini cha'an suben c winic David: “Che'ʌch woli' yʌl i Yum Panchan yic'ot Pañimil: Joñon tsac loc'sayet ti a we'tel ya' ba' tsa' cʌnta tiñʌme'. Tsa cotsayet ti' yum israelob cha'an ma' cʌntan c tejclum.

⁹ Tsa'ix ajniyon quic'otet baqui jach tsa' ñumiyet. Tsa'ix c jisa pejtelel winicob tsa' bʌ tiliyob ti a contra. Mi caj cʌc' ti cʌjñel a c'aba' ti' tojlel ñuc bʌ winicob ti pañimil.

¹⁰ Mux caj cʌq'ueñob i lum c winicob ba' mi' cajelob ti chumtʌl. Ya'i mi caj i yajñelob ti pejtelel q'uin. Ma'anic majqui mi caj i chʌn loc'sañob. Jini xjontolilob mach mejlix i chʌn tic'lañob che' bajche' ti ñaxan

¹¹ che' bʌ tsac wa'choco juezob ti' tojlel c tejclum israel c'ʌlʌl wʌle. Mi caj cʌq'uet ti chumtʌl ti ñʌch'ʌl ti' tojlel a contrajob. Lac Yum wolix i subeñet mi caj i xuc'chocoñet yic'ot a p'olbal ti a we'tel ti' tojlel israelob.

¹² Che' ts'ʌctʌyemix a jabilel, che' ma' majlel a c'aj a wo ba'an a tatob, che' jini mi caj c tech juntiquil a walobil cha'an mi' mel jini e'tel ti a q'uexol. Muq'uix caj cʌq'uen i yumʌntel.

¹³ Jini a walobil mi caj i wa'chocobeñon cotot tij c'aba'. Joñon mi caj cʌq'uen i yumʌntel ti pejtelel ora.

¹⁴ Mi caj i tatiñon. Mi caj i yochel ti calobil. Mi tsa' caji i ñusʌbeñon c t'an, mi caj cʌq'uen i tsico' pusic'al yic'ot asiyal che' bajche' mi' melob winicob ti pañimil che' mi' toj'esañob i yalobilob.

¹⁵ Pero ma'anic mi caj j cʌy j c'uxbin a walobil che' bajche' tsaj cʌyʌ j c'uxbin Saúl che' bʌ tsac loc'sa ti' ye'tel.

¹⁶ Mi caj cʌq'ueñob i ye'tel a polbal cha'an mi' cha'leñob yumʌntel tic tojlel ti pejtelel ora. Che'ʌch mi caj c melbeñet cha'an xuc'ul ma' wajñel ti a buchlib yic'ot a p'olbal ti pejtelel ora”. Che'ʌch yom ma' suben David, che'en lac Yum.

¹⁷ Natán tsi' sube David pejtelel chuqui tac tsi' yubi yic'ot chuqui tac tsi' q'uele.

¹⁸ Tsa' ochi David ti' tojlel lac Yum. Tsi' yʌlʌ: C Yum Dios, wen uts'atax jini mu' bʌ caj a melbeñon quic'ot calobilob. Anquese ma'anic c bajñel ñuclel lojon, tsa' pʌsbeyon i yutslel a pusic'al c'ʌlʌl wʌle.

¹⁹ Come tsa' yajcayon che' maxto anic j c'ʌjñibal. Tsa' wa'chocoyon ti rey. Pero wʌle ñumen cabʌl mi caj a pʌsbeñon i yutslel a pusic'al ti' tojlel c p'olbalob ti pejtelel ora. C Yum Dios, mach che'ic mi' melob winicob bajche' jini.

²⁰ ¿Chuqui to yom mic subeñet? A winicon, c Yum Dios.

²¹ Cujil wolix a mel pejtel jini ñuc tac bʌ cha'an mi' ts'ʌctiyel a t'an, cha'an che'ʌch yom a pusic'al. Tsa'ix a wʌn subeyon.

²² Come wen ñuquet, c Yum Dios. Ma'anic yambʌ Dios che' bajche' jatet. Jatet jach Dioset.

²³ Ma'anic yambʌ tejclum c'uxbibil bʌ bajche' Israel wʌ' ti pañimil. Come tsa' loc'sa ti wocol cha'an mi' ñochtañet. Tsa' pʌyʌyob cha'an ma' wʌc' ti ñuc i c'aba'. Tsa' pʌsbeyob i yejtal tac a p'ʌtʌlel cha'an mi' bʌc'ñañetob. Tsa'ix a mʌñʌyob loq'uel ti' lumal Egipto. Tsa'ix a choco jubel yan tac bʌ tejclum yic'ot i diosob.

²⁴ Isujm jatet c Yum tsa' wa'choco jini israelob a cha'año' bʌ cha'an mi' yochelob ti a tejclum ti pejtelel ora. Jatet c Yum tsa' wotsa a bʌ ti' Dios.

²⁵ Jini cha'an wʌle, c Yum Dios, ts'ʌctesan a t'an ti' tojlel c p'olbal ti pejtelel ora che' bajche' tsa' wʌlʌ.

²⁶ La' q'uejlic ti ñuc a c'aba' ti pejtelel ora. La' i subob winicob: “Jini Yumʌl am bʌ pejtelel i p'ʌtʌlel jiñʌch i Dios israelob”, che'ob che' wa'chocobilob c p'olbalob tic buchlib ti a tojlel.

²⁷ Come i Yumet Panchan yic'ot Pañimil, i Dioset Israel. Tsa' subeyon mi caj a coltañon quic'ot c p'olbalob cha'an mic cha'len lojon yumʌntel. Jini cha'an ñuquix c pusic'al wolic pejcañet ti oración.

²⁸ C Yum Dios, isujm Dioset ti pejtelel ora. Isujm pejtelel a t'an. Tsa'ix a wʌn subeyon chuqui mi caj a melbeñon ti uts'at.

²⁹ Jini cha'an a wocolic aq'ueñob i yutslel a pusic'al jini año' bʌ ti cotot cha'an mic chʌn ajñel lojon ti a tojlel ti pejtelel ora. Come tsa'ix a wʌc'ʌ a t'an, c Yum Dios. Tsa'ix a pʌsbeyon lojon i yutslel a pusic'al. Jini cha'an tijicñayon lojon ti pejtelel ora, che'en David.