2 Samuel 22 - Chol: I T’an Dios

I c'ay David

¹ Jiñʌch i c'ay David tsa' bʌ i c'ʌyibe lac Yum che' ti jini q'uin che' bʌ lac Yum tsi' colta loq'uel ti' p'ʌtʌlel pejtelel i contrajob yic'ot ti' p'ʌtʌlel Saúl:

² Lajalʌch lac Yum bajche' ch'entun ba' mi lac puts'el. Jiñʌch cotot ts'ajquibil bʌ yilal. Jiñʌch caj coltaya.

³ Lajal Dios bajche' wen xuc'ul bʌ xajlel baqui mic majlel ti puts'el. Jiñʌch c mʌctʌjib, jini p'ʌtʌl bʌ mu' bʌ i coltañon. Lajalʌch lac Yum bajche' chan bʌ ts'ajc ba' mi cochel. Jiñʌch xcoltaya c cha'an mu' bʌ i coltañon loq'uel ti' p'ʌtʌlel jini jontolo' bʌ.

⁴ Mic pejcan lac Yum cha'an uts'at. Coltʌbilonix ti' tojlel j contrajob.

⁵ Che' colel c chʌmel tsa' ochiyon ti ja' yilal. Yom i jisañon jini c'ax bʌbʌq'uen bʌ che' bajche' colem ja'.

⁶ Che' colel c chʌmel tsa' cʌn chujquiyon yilal. Jini yom bʌ i chucon ti' p'ʌtʌlel tsi' tajayon.

⁷ Che' añon ti wocol tsac pejca c Yum. Tsac cha'le oñel ti' tojlel Dios. Tsi' yubibeyon c t'an ya' ti' Templo. Tsa' c'oti coñel ya' ba'an Dios.

⁸ Tsi' nijca i bʌ jini lum, tsa' tili i yujquel lum. Ba' buchul jini panchan tsa' bujchi. Tsi' nijca i bʌ cha'an i mich'ajel Dios.

⁹ Wusiña i ni' Dios yilal cha'an i mich'ajel, Che' bajche' c'ajc woli bʌ ti lejmel tsa' loq'ui ti yej yilal. Tsi' tsuc'u xutunte'.

¹⁰ Lac Yum tsi' ju'sa tilel tocal, tsi' pʌsʌ i p'ʌtʌlel. Wen i'ic' ya' ti' yebal i yoc.

¹¹ Tsa' wejli tilel yic'ot querubín, Tsa' wejli tilel ti ic'.

¹² Joyol lac Yum ba' wen pim tocal. Wen i'ic' jax, wen pim jini tocal cuchul bʌ i cha'an ja'al.

¹³ Jini i c'ʌc'al i wut lac Yum mi' tsuc' c'ajc ti' tojel.

¹⁴ Lac Yum tsi' yʌc'ʌ i t'an chajc ti panchan, Jini c'ax ñuc bʌ tsi' yʌc'ʌ i t'an.

¹⁵ Tsi' choco tac tilel chajc, Tsi' yajñesa i contrajob David.

¹⁶ Che' jini tsa' tsictiyi i bijlel tac ja', tsa' tsictiyi i buchlib tac wits. Che' bʌ tsi' cha'le tic'oñel lac Yum, wusiña jax i ni' yilal.

¹⁷ Tsa' loq'ui lac Yum ti panchan, Tsi' chucuyon, tsi' loc'oyon ti colem ja'.

¹⁸ Tsi' chucuyon loq'uel ti' p'ʌtʌlel j contra, Ti' tojlelob mu' bʌ i ts'a'leñoñob. Ñumen i p'ʌtʌlel j contrajob bajche' c p'ʌtʌlel.

¹⁹ Tsa' tiliyob i contrajiñon ti' yorajlel c wocol, Pero tsi' xuc'chocoyon lac Yum.

²⁰ Tsi' yʌc'ʌyon ti colel cha'an mi cajñel ti xuc'ul. Tsi' pʌyʌyon loq'uel ti wocol, Come c'ux mi' yubiñon.

²¹ Lac Yum tsi' yʌq'ueyon c chobejtʌbal cha'an tojon. Cha'an toj c melbal, jini cha'an tsi' yʌq'ueyon c chobejtʌbal.

²² Come tsa'ix c tsajcʌbe majlel i bijlel lac Yum. Ma'anic tsac cha'le mulil, ma'anic tsaj cʌyʌ Dios.

²³ Tsa'ix cʌc'ʌ tic pusic'al pejtelel i meloñel. Ma'anic tsac chocbe ts'ijbubil bʌ i mandar.

²⁴ Tsa' ajniyon ti toj ti' tojlel lac Yum. Tsaj cʌnta c bʌ cha'an ma'anic mic cha'len mulil.

²⁵ Jini cha'an lac Yum tsi' yʌq'ueyon c chobejtʌbal cha'an tojon, Cha'an toj c melbal ti' wut Dios.

²⁶ Ma' pʌsben a wutslel jini winic uts'at bʌ i pusic'al, Ma' pʌsben i xuc'tilel a pusic'al jini xuc'ul bʌ i pusic'al.

²⁷ Jini sʌc bʌ mi caj i ña'tan sʌquet, Pero mich' ma' pʌsben a bʌ jini jontol bʌ.

²⁸ Ma' coltan jini tic'lʌbilo' bʌ, Ma' peq'uesan jini chan bʌ mi' lon mel i bʌ.

²⁹ C Yum Dios, ma' wʌq'ueñon j c'ʌc'al che' añon ti ic'ch'ipan bʌ pañimil.

³⁰ Cha'an ti a p'ʌtʌlel mi' mʌjlel c cha'an, anquese cabʌl j contrajob. Cha'an ti jatet c Dios mi mejlel c tijp'el ñumel ti junwejl i ts'ajquil j contrajob.

³¹ Ts'ʌcʌlʌch chuqui mi' mel Dios, Isujmʌch i t'an lac Yum. I mʌctʌjibʌch pejtel mu' bʌ i yʌc'ob i bʌ ti' wenta.

³² ¿Majqui Dios? ¿Mach ba jinic lac Yum? Jincuyi. ¿Am ba yambʌ xuc'ul bʌ bajche' Dios? Ma'anic.

³³ Jiñʌch Dios mu' bʌ i yʌq'ueñon c p'ʌtʌlel. Mi' toj'esan majlel jini xuc'ul bʌ i pusic'al yic'ot lac Yum.

³⁴ Sejb mi' mel coc che' bajche' i yoc me'. Dios mi' cʌntañon ba' bʌbʌq'uen mic yajlel.

³⁵ Mi' cʌntesañon cha'an ch'ejl mic cha'len guerra, Mi' yʌq'ueñon c sʌts' p'ʌtʌl bʌ jalʌjb.

³⁶ Jatet tsa'ix a wʌq'ueyon j coltʌntel i wenta c mʌctʌjib. Ma' ñuq'uesañon ti' yutslel a pusic'al.

³⁷ Tsa' chajpʌbeyon i yajñib coc. Tsa' p'ʌtesa coc.

³⁸ Tsa cajñesa j contrajob, tsac tajayob. Jinto tsac laj jisayob tsa' sujtiyon.

³⁹ Tsac lowoyob, ma'anic tsa' chʌn mejliyob ti tejchel. Tsa' yajliyob ti' t'ejl coc.

⁴⁰ Tsa'ix a wʌq'ueyon c p'ʌtʌlel cha'an guerra. Tsa' jats'ʌ jini tsa' bʌ tejchiyob tij contra.

⁴¹ Jatet tsa' bʌc'tesa j contrajob jinto tsa' puts'iyob majlel. Tsac jisa jini mu' bʌ i ts'a'leñoñob.

⁴² Tsi' lon cha'leyob oñel. Ma'anic majch tsi' coltayob. Tsi' pejcayob lac Yum, pero ma'anic tsi' jac'beyob.

⁴³ Tsac bic'tesa j contrajob che' bajche' ts'ubejn mu' bʌ i wujtan letsel ic'. Tsac t'uchtayob che' bajche' i bibi'lel calle.

⁴⁴ Tsa'ix a coltayon loq'uel ti' tojlel jini winicob woliyo' bʌ ti leto. Tsa'ix a wotsayon ti yumʌl ti' tojlel jujumpejt colem tejclum. Winicob x'ixicob mach bʌ j cʌñʌyobic ti yambʌ ora wolix i melbeñoñob que'tel.

⁴⁵ Che' mi' yubibeñoñob c t'an, mi caj i jac'beñoñob. Jini ñajt bʌ ch'oyolob mi caj i yumañoñob.

⁴⁶ Jini ñajt bʌ ch'oyolob tsi' cha'leyob bʌq'uen. Tsiltsilña tsa' loq'uiyob ba' mʌcʌlob.

⁴⁷ Cuxul lac Yum. Wocolix i yʌlʌ come jiñʌch xuc'ul bʌ Xajlel. La' sujbic i ñuclel Dios mu' bʌ i coltañon.

⁴⁸ Diosʌch mu' bʌ i q'uextʌbeñob i mul j contrajob, Jiñʌch mu' bʌ i jultesʌbeñob i pusic'al winicob x'ixicob cha'an mi' jac'beñoñob.

⁴⁹ Jatet ma' coltañon loq'uel ti' p'ʌtʌlel j contrajob. Melel ma' chan'esañon ti' tojlel jini mu' bʌ i tejchelob tij contra. Tsa' pʌyʌyon loq'uel ti' p'ʌtʌlel jini jontolo' bʌ.

⁵⁰ Jini cha'an, c Yum, mux c sub a ñuclel ya' ti jujumpejt colem tejclum tac. Mi caj j c'ʌyibeñet a c'aba'.

⁵¹ Cha'an ti jatet mi' mʌjlel i cha'an jini tsa' bʌ a wa'choco ti rey. Ma' pʌsben a wutslel jini yajcʌbil bʌ a cha'an, Jiñʌch David yic'ot i p'olbal ti pejtelel ora.