2 Samuel 21 - Chol: I T’an Dios

Wocol ti' caj gabaoñob

¹ Che' woli ti yumʌntel David, tsa' caji wi'ñal uxp'ejl jab ya' ti' lumal. David cabʌl tsi' cajtibe lac Yum chuqui i sujmlel. Awilan, lac Yum tsi' sube cha'an ti' caj i mul Saúl, come jini tsi' bec'beyob i ch'ich'el jini gabaoñob.

² Jini rey tsi' choco ti pʌyol jini gabaoñob cha'an mi' pejcañob. Awilan mach israelobic jini gabaoñob. Jiñobʌch amorreojob. Jini israelob tsi' cʌn wa'chocoyob i t'an ti yambʌ ora yic'otob, pero Saúl tsi' ñopo i jisañob. Tsi' ña'ta i ñuq'uesan i lumal Israel yic'ot Judá.

³ David tsi' subeyob jini gabaoñob: ¿Bajche' mi mejlel ti tojtʌl i mul Saúl cha'an mi la' c'ajtiben Dios i yutslel i t'an ti' tojlel pejtel Israel? che'en.

⁴ Jini gabaoñob tsi' jac'ʌyob: Ma'anic mij c'ajtin lojon oro mi plata cha'an i q'uexol jini wocol tsa' bʌ i melbeyon lojon Saúl. Mach comic lojon mi' chʌmel mi juntiquilic israel, che'ob. David tsi' jac'ʌ: ¿Chuqui la' wom mic melbeñet? Muq'uix c mel, che'en.

^5-6 Jini gabaoñob tsi' jac'beyob: Saúl tsi' ñopo i jisañon lojon quic'ot c pi'ʌlob lojon. Jini cha'an yom mi la' wʌq'ueñon lojon wuctiquil i yalobilob cha'an mic jich'e lojon ti' tojlel lac Yum ya' ti Gabaa i tejclum Saúl, che'ob. Jini rey tsi' jac'beyob: Muq'uix cʌq'ueñetla, che'en.

⁷ David ma'anic tsi' choco majlel Mefiboset (i yalobil Jonatán i yalobil bʌ Saúl), cha'an jini t'an tsa' bʌ i yʌq'ue Jonatán ti' tojlel lac Yum.

⁸ Pero tsi' pʌybeyob cha'tiquil i yalobilob Saúl tsa' bʌ i cʌnta Rizpa (i yalobil Aja), i c'aba'ob Armoni yic'ot Mefiboset. Tsi' pʌybeyob ja'el jo'tiquil i yalobilob Mical, i yixic'al Saúl. Jini jo'tiquil i yalobilobʌch Adriel (i yalobil bʌ Barzilai chumul bʌ ti Meholat).

⁹ Jini rey tsi' choco majlel jini wuctiquil i yalobilob Saúl ba' añob jini gabaoñob. Tsi' jich'iyob ya' ti bujtʌl ti' tojlel lac Yum. Che'ʌch tsa' chʌmiyob jini wuctiquilob che' ti ñaxan bʌ q'uin che' mi' tuc'ob cebada.

¹⁰ Rizpa (i yalobil Aja) tsi' lich'i jump'ejl coxtal ya' ti' pam xajlel cha'an mi' wʌytan che' bʌ tsa' tejchi i tuc' cebada. Ya' tsa' cʌle jinto tsa' yajli ñaxan bʌ ja'al. Ma'anic tsi' wis ac'ʌ ti t'uchtʌl mi' juncojtic te'lemut ya' ti ch'ujlelʌl tac. Ma'anic tsi' yʌc'ʌ ti ochel bʌte'el ti ac'ʌlel.

¹¹ An majqui tsi' sube David chuqui woli' mel Rizpa.

^12-14 David tsi' yʌc'ʌ i t'an cha'an mi' mujquel i bʌquel jini winicob ya' ti' t'ejl i mucoñib Cis jini i tat Saúl. Tsi' c'ajtibeyob jini winicob ti Jabes Galaad i bʌquel Saúl yic'ot Jonatán. Come tsa'ix i chiliyob jini ch'ujlelʌl tac ya' ba' joc'chocobilob ti Betsan che' bʌ tsi' tsʌnsayob jini filisteojob ya' ti Gilboa. Jini winicob ti Jabes Galaad tsi' ch'ʌmbeyob sujtel i bʌquel Saúl, yic'ot i bʌquel Jonatán, yic'ot i bʌquel pejtelel tsa' bʌ jijch'iyob. Tsi' mucuyob i bʌquel Saúl yic'ot i bʌquel Jonatán ti' lumal benjamiñob ti Zela ya' baqui tsa' mujqui i tat i c'aba' Cis. Che'ʌch tsi' laj meleyob che' bajche' tsi' subeyob jini rey. Che' jini Dios tsa' caji i jac'ben i yoración cha'an mi' cha' ac' i wut jini lum.

Tsi' jisayob jini filisteojob

¹⁵ Jini filisteojob tsa' cha' cajiyob ti guerra yic'ot israelob. Jini cha'an David tsa' majli ti guerra yic'ot i soldadojob, pero ti jim bʌ ora David tsa' lujb'a.

¹⁶ Juntiquil colem bʌ filisteo i c'aba' Isbibenob chucbil bʌ i lanza am bʌ i yalel jo'p'ejl kilo bronce, ts'ita' colel i tsʌnsan David.

¹⁷ Pero ti jim bʌ ora Abisai (i yalobil Sarvia) tsa' c'oti i coltan David. Tsi' tsʌnsa jini filisteo. Jini cha'an jini winicob tsa' caji i subeñob David: Mach yomix ma' chʌn loq'uel ti guerra ti pejtelel ora ame a wʌc' ti jisʌntel i ñuclel israelob, che'ob.

¹⁸ Mach jalic tsa' cha' ujti guerra ti' contra jini filisteojob ya' ti Gob. Sibecai jini husat tsi' tsʌnsa Saf, juntiquil wen colem bʌ winic.

¹⁹ Che' bʌ tsa' cha' ujti guerra ya' ti Gob ti' contra jini israelob, jini Elhanán (i yalobil Jaare Oregim ch'oyol bʌ ti Belén) tsi' tsʌnsa Goliat jini geteo, chucbil bʌ i cha'an wen colem bʌ lanza. Che'ʌch bontʌl i c'ʌb lanza bajche' te' mu' bʌ i c'ʌñob ti jalbal.

^20-21 Che' bʌ tsa' cha' ujti yambʌ guerra ya' ti Gat, ya'an juntiquil winic wen chan bʌ, am bʌ wʌcts'ijt i yal i c'ʌb ti jujunts'ijt i c'ʌb, yic'ot wʌcts'ijt i yal i yoc ti jujunwejl. Ili winic tsi' techbe i mich'ajel israelob. Pero Jonatán (i yalobil i yeran David, i c'aba' Simea) tsi' tsʌnsa jini colem winic.

²² Ili chʌncticlelob ya' lu' ch'oyolob ba'an colem winicob ya' ti Gat. Pejtel ili winicob tsa' yajliyob ti' c'ʌb i winicob David.