2 Samuel 2 - Chol: I T’an Dios

David tsa' wa'choconti ti rey cha'an Judá

¹ Che' bʌ ujtemix pejtel iliyi, David tsi' pejca lac Yum: ¿Yom ba mic letsel majlel ti jump'ejl i tejclum Judá? che'en. Lac Yum tsi' sube: Cucu ti letsel, che'en. David tsi' cha' c'ajti: ¿Baqui yom mic majlel? che'en. Lac Yum tsi' sube: Yom ma' majlel ti Hebrón, che'en.

² Jini cha'an David tsa' majli yic'ot jini cha'tiquil i yijñam, Ahinoam jini jezreel, yic'ot Abigail i yijñam bʌ Nabal ch'oyol bʌ ti Carmel.

³ David tsi' pʌyʌ majlel ja'el i winicob tsa' bʌ ajniyob yic'ot. Tsa' majliyob yic'ot i yijñamob ja'el. Ya' tsa' ajniyob ti tejclum i c'aba' Hebrón.

⁴ Tsa' tiliyob winicob chumulo' bʌ ti Judá. Tsi' wa'chocoyob David ti rey ti' tojlel pejtel año' bʌ ti Judá. Tsi' tsictesʌbeyob David bajche' tsi' p'untayob Saúl jini ch'oyolo' bʌ ti Jabes ti Galaad come tsajni i mucob Saúl.

⁵ Che' jini David tsi' chocbeyob majlel cortesía jini año' bʌ ti' Jabes ti Galaad: C'ax uts'atetla ti' tojlel lac Yum, come tsa' la' pʌsbe Saúl ñuc bʌ la' c'uxbiya che' bʌ tsa' la' mucu.

⁶ Jini cha'an wʌle la' i cuxbiñetla lac Yum ti' xuc'tʌlel i pusic'al. Joñon ja'el mi caj c melbeñetla chuqui uts'at cha'an ili ñuc bʌ e'tel tsa' bʌ la' mele.

⁷ Jini cha'an wʌle yom p'ʌtʌletla, yom ch'ejletla, come tsa'ix chʌmi Saúl jini la' yum. Jini año' bʌ ti Judá tsa'ix i wa'chocoyoñob cha'an mi cochel ti rey ti' tojlelob, che'en.

I yalobil Saúl tsi' cajata i yumʌntel Saúl

⁸ Pero Abner i yalobil Ner, ñuc bʌ yumʌl ti' tojlel i soldadojob Saúl, tsi' pʌyʌ Isboset i yalobil Saúl. Tsi' pʌyʌ majlel c'ʌlʌl ti Mahanaim.

⁹ Ya'i tsi' wa'choco ti rey ti' tojlel año' bʌ ti Galaad, yic'ot Gesuri, yic'ot Jezreel, yic'ot Efraín, yic'ot Benjamín, yic'ot pejtelel jini israelob.

¹⁰ Anix cha'c'al i jabilel Isboset i yalobil Saúl che' bʌ tsa' caji i cha'len yumʌl ti' tojlel israelob. Cha'p'ejl jab tsi' cha'le yumʌl. Pero pejtelel jini año' bʌ ti Judá tsi' tsajcayob David.

¹¹ Ojlil i waxʌcp'ejl jab David tsi' cha'le yumʌl ya' ti Hebrón ti tojlel jini año' bʌ ti Judá.

¹² Abner i yalobil Ner tsa' loq'ui ti Mahanaim yic'ot pejtelel jini soldadojob i cha'an Isboset (i yalobil Saúl). Tsa' c'otiyob ti Gabaón.

¹³ Joab (i yalobil bʌ Sarvia) yic'ot jini soldadojob i cha'an David tsa' loq'uiyob ti Hebrón. Tsa' c'oti i tajob i bʌ ya' ti' tojel jini ts'ajquibil bʌ ja' ti Gabaón. I winicob David tsa' wa'leyob ti junwejl. I contrajob tsa' wa'leyob ti yambʌ junwejl.

¹⁴ Abner tsi' sube Joab: Mi uts'at ma' wubin, subeñob tilel jini ch'iton winicob cha'an mi' cha'leñob leto quic'ot lojon, che'en. Joab tsi' jac'ʌ: Yom cu. La' majlicob, che'en.

¹⁵ Che' jini tsa' yajcʌntiyob lajchʌntiquil i winicob Isboset, benjamiñob, yic'ot lajchʌntiquil i winicob David.

¹⁶ Ti jujuntiquil tsi' chucu i contra ti' tsutsel i jol. Tsi' sʌl jec'be i ch'il'at ti espada. Che'i tsa' chʌmiyob ti pejtelelob. Jini cha'an tsa' otsʌnti i c'aba' jini lum ti Gabaón ba' tsa' yajliyob, Helcat Hazurim. Jiñʌch i yajñib espada jay bʌ i yej.

¹⁷ Wen bʌbʌq'uen jax ili querra ti jini q'uin. Abner yic'ot jini israelob ma'anic tsa' mʌjliyob i cha'an, come i soldadojob David tsi' jisayob.

¹⁸ Ya' añob uxtiquil i yalobilob Sarvia: Joab yic'ot Abisai yic'ot Asael. Ili Asael wen ajñel yujil xʌmbal che' bajche' chijmay.

¹⁹ Asael tsa' caji i yajñesan Abner. Ma'anic tsi' wis tʌts'ʌ i bʌ, mi ti' ts'ejic mi ti' ñojic.

²⁰ Tsi' sutq'ui i bʌ Abner. Tsi' yʌlʌ: ¿Mach ba jatetic Asael? che'en Abner. Jini tsi' jac'ʌ: Joñon cu, che'en.

²¹ Abner tsi' sube: Yom ma' tʌts' a bʌ ti a ñoj o mi ti a ts'ej. Yom ma' chuc yambʌ winic. Chilben pejtelel chuqui an i cha'an, che'en. Pero Asael ma'anic tsi' jac'ʌ i tʌts' i bʌ.

²² Abner tsi' cha' sube Asael ti cha'yajlel: Yom ma' tʌts' a bʌ tic tojlel. ¿Yom ba mic tsʌnsañet? ¿Bajche' mi caj c cha' pejcan a wʌscun Joab? che'en.

²³ Che' jini Abner tsi' sutq'ui i c'ʌb ti' pat cha'an mi' sʌl jec' Asael che' ma'anic tsi' tʌts'ʌ i bʌ. Tsa' sʌl ñumi ti' ch'i'lat c'ʌlʌ ti junwejl i pat. Ya' tsa' yajli. Ya' tsa' wa'leyob pejtelel jini xñumelob woli bʌ i tilelob. Ya' jach tsa' cʌleyob ba' ñolol i bʌc'tal Asael.

²⁴ Pero Joab yic'ot Abisai tsa' caji i sajcañob Abner. Wolix ti ic'an che' bʌ tsa' c'otiyob ya' ti bujtʌl i c'aba' Amma am bʌ ti' tojel Gía, ti' bijlel Gabaón.

²⁵ Tsi' tempayob i bʌ jini benjamiñob ti' tojlel Abner cha'an mi' melob ti junmojt jach i soldadojob. Ya' tsa' ajniyob ti bujtʌl i c'aba' Amma.

²⁶ Abner tsi' sube Joab: ¿Jala to ba mi caj i chʌn jilelob winicob ti espada? ¿Mach ba a wujilic woli jach lac p'ojlesan wocol? Che' ti' yujtibal cabʌlix lac ch'ijiyemlel. ¿Baqui to ora mi caj a subeñob a soldadojob cha'an mi cʌy i yajñesañob i pi'ʌlob? che'en.

²⁷ Joab tsi' jac'ʌ: Tsa'ic a wʌn subu che' bajche' wʌle ma'anic tsa' tejchi guerra sajmʌl ti sʌc'ajel. Che'ic jini lu' sujtemonix lojon ti cotot. Melel che' bajche' cuxul Dios, che'en.

²⁸ Jini cha'an Joab tsi' wusu jini xulub. Ti pejtelel winicob tsi' cʌyʌyob leto. Ma'anix tsi' chʌn cha'leyob guerra yic'ot israelob.

²⁹ Abner yic'ot pejtelel i pi'ʌlob ti jump'ejl ac'ʌlel tsa' ñumiyob majlel ya' ti Arabá. Tsa' c'axiyob ti Jordán ja'. Tsa' ñumiyob ti pejtelel Bitrón c'ʌlʌl tsa' c'otiyob ti Mahanaim.

³⁰ Joab tsi' much'q'ui pejtel jini winicob che' bʌ tsi' cʌyʌ i yajñesan Abner. Woli jach ti falta Asael yic'ot bolonlujuntiquil (19) i winicob David.

³¹ Pero i winicob David tsa'ix i mʌlbeyob i winicob Benjamín yic'ot i winicob Abner. Tsi' tsʌnsayob waxʌclujunc'al (360) winicob.

³² Tsi' q'uecheyob majlel i bʌc'tal Asael. Tsi' mucuyob ya' ti Belén ba' mucbil i tat. Jump'ejl ac'ʌlel tsi' cha'le xʌmbal Joab yic'ot i winicob. Wolix i sʌc'an pañimil che' bʌ tsa' c'otiyob ti Hebrón.