2 Samuel 18 - Chol: I T’an Dios

Tsa' chʌmi Absalón

¹ David tsi' tsolo i soldadojob. Tsi' wa'choco jini mu' bʌ i q'uelob soldadojob. Tsi' t'oxoyob tac ti jujump'ejl mil yic'ot ti jo'jo'c'al.

² Tsi' t'oxoyob ti uxmojt. Tsa' caji i chocob majlel ti guerra. Jini junmojt tsa' majli yic'ot Joab. I cha'mojtlel tsa' majli yic'ot Abisai i yʌscun Joab (i yalobil Sarvia). I yuxmojtlel tsa' majli yic'ot Itai jini geteo. Tsi' yʌlʌ jini rey: Muq'uix c majlel ja'el ti guerra la' wic'ot, che'en.

³ Pero jini winicob tsi' subeyob: Mach yomic ma' majlel, come mi tsa' puts'iyon lojon ma'anic mi caj i p'ison lojon ti wenta jini laj contrajob. Anquese mic chʌmel lojon ti ojlil, ma'anic chuqui mi' cha'len. Pero jatet wen ñuc a c'ʌjñibal che' bajche' lujump'ejl mil winicob. Jini cha'an yom ma' cʌytʌl ti tejclum cha'an ma' chocbeñon lojon tilel j coltʌntel lojon ya' baqui mic majlel lojon, che'ob.

⁴ Jini cha'an jini rey tsi' yʌlʌ: Uts'at bajche' mi la' wʌl. Muq'uix c jac'beñetla, che'en. Che' jini tsa' wa'le jini rey ya' ti' ti' jini tejclum. Tsa' loq'uiyob jini soldadojob ti mojt ti mojt, ti jo'jo'c'al, yic'ot ti jujump'ejl mil tac.

⁵ Jini rey tsi' sube Joab, yic'ot Abisai, yic'ot Itai: Yom tsajiletla ame anic majqui mi' yʌc' ti wocol ch'iton bʌ calobil Absalón, che'en. Pejtelel jini soldadojob tsi' yubiyob che' bʌ tsi' subeyob jini rey cha'an ma'anic mi' tsʌnsañob Absalón.

⁶ Tsa' tejchi guerra ti te'el tac i c'aba' Efraín.

⁷ Pejtelel i winicob David tsa' wen mʌjli i cha'añob. Cabʌl israelob tsa' jiliyob ti jini guerra. Ti pejtelel tsa' chʌmiyob che' bajche' junc'al mil winicob.

⁸ Tsa' ñumi jini guerra c'ʌlʌl ti ñajtʌl. Cabʌl jini winicob tsa' jiliyob ya' ti te'el. Mach cabʌlobic tsa' jiliyob ti espada.

⁹ I winicob David tsa' bʌc' c'oti i q'uelob Absalón. C'ʌchʌcña woli' tilel Absalón ti mula. Tsa' caji ti puts'el Absalón, pero che' bʌ tsa' ñumi jini mula ti yebal juntejc te' ba' cabʌl jax i c'ʌb, tsa' joc' cʌle i tsutsel i jol ti' xʌc' jini te'. Tsa' ts'uy cʌle che' ñumenix jini mula.

¹⁰ Juntiquil soldado tsa' bʌ i q'uele Absalón ya' ba' joc'ol tsa' majli i suben Joab: Ya' tsa' joc' cʌle Absalón ti' xʌc' jini te', che'en.

¹¹ Joab tsi' sube: Mi tsa' q'uele, ¿chucoch ma'anic tsa' bʌc' tsʌnsa? che'en. Tsa'ic a tsʌnsa tsa cʌq'ueyet lujump'is plata yic'ot jump'ejl cajch'iñʌc', che'en.

¹² Jini winic tsi' jac'be Joab: Tsa'ic a lon aq'ueyon mil sʌcʌc taq'uin, ma'anic tsac tsʌnsʌbe i yalobil rey, come tsa cubi lojon i mandar jini rey che' bʌ tsi' subeyet jic'ot Abisai, yic'ot Itai: “A wocolic pʌsbenla i yutslel la' pusic'al jini ch'iton bʌ calobil Absalón”, che'en David.

¹³ Tsa'ic c tsʌnsa, muq'uix c wersa tsictiyel come mach mejlic lac wis lotin lac rey. Tsa'ic c mele bajche' jini, tsa' wʌc'ʌyon ti wocol jatet. Che' tsi' yʌlʌ jini soldado.

¹⁴ Joab tsi' sube: Wolic lon ñusan q'uin ti t'an, che'en. Ti ora jach tsi' loc'sa uxts'ijt i te'el i jalʌjb. Tsi' ts'ʌp julu ti' pusic'al Absalón che' mero cuxul to ya' ti xʌc' jini te'.

¹⁵ Ti ora jach tsa' tiliyob lujuntiquil i soldadojob Joab cha'an mi' junyajlel tsʌnsañob Absalón.

¹⁶ Joab tsi' wusu jini trompeta cha'an mi' cʌy i tsʌcleñob majlel i contrajob.

¹⁷ Tsi' chocoyob i bʌc'tal Absalón ti joctʌl ya' ti te'el. Tsi' mʌcʌyob ti wen colem tac bʌ xajlel. Pejtelel jini israelob tsa' cajiyob ti puts'el majlel cha'an mi' sujtelob ti' yototob.

¹⁸ Che' cuxul to Absalón, tsi' wa'choco jump'ejl ts'ajc ya' ti joctʌl i cha'an bʌ rey come tsi' yʌlʌ: Ma'anic calobil cha'an mi' chʌn ña'tʌntel j c'aba', che'en. Jini cha'an tsi' yotsʌbe i c'aba' jini ts'ajc, I ts'ajc Absalón. C'ʌlʌl ti ili ora che'ʌch mi' pejcʌntel.

¹⁹ Ahimaas (i yalobil Sadoc) tsi' yʌlʌ: La' majlicon ti ora cha'an mic tsictesʌben lac rey, come lac Yum tsa'ix i yʌc'ʌ ti jilel laj contrajob, che'en.

²⁰ Joab tsi' yʌlʌ: Mach yomic ma' majlel jatet. Ti yanto bʌ ora mi mejlel a ch'ʌm majlel t'an pero mach wʌleyic, come chʌmenix i yalobil rey, che'en.

²¹ Joab tsi' sube juntiquil winic etíope: Cucux, suben jini rey chuqui tsa' q'uele, che'en. Jini winic tsi' c'uchchoco i bʌ ti' tojlel Joab. Tsa' caji ti majlel ti ajñel ba'an rey.

²² Ahimaas i yalobil Sadoc tsi' cha' sube Joab: La' ujtic chuqui tac yom ujtel tic tojlel, pero wersa com majlel ti' pat jini etíope, che'en. Joab tsi' sube: Calobil, ¿chucoch ma' lon majlel ti ajñel? Cʌxti wenic jini t'an mu' bʌ caj a sub, che'en.

²³ Jini Ahimaas tsi' jac'ʌ: La' ujtic chuqui mi' caj ti ujtel. Wersa mic majlel, che'en. Joab tsi' sube: Cucu che' jini, che'en. Jini cha'an ti ajñel tsa' majli Ahimaas ti bij mu' bʌ i ñumel ti joctʌl ba'an jini Jordán ja'. Tsi' cha' ñusa jini etíope tsa' bʌ ñaxan chojqui majlel.

²⁴ Ti jim bʌ ora buchul David ya' ti' tojel i ti' tejclum. Ya' wa'al jini xcʌntaya ti' jol i yotot am bʌ ti chañelal jini ts'ajc. Che' bʌ tsi' letsa i wut, tsi' can q'uele woli' tilel ti ajñel juntiquil winic.

²⁵ Jini xcʌntaya ora jach tsi' tsictesbe jini rey. Jini rey tsi' yʌlʌ: Mi juntiquil jach jini tal bʌ ti ajñel an chuqui yom i tsictesan, che'en. Woli' lʌc'tesan tilel i bʌ.

²⁶ Ti ora jini xcʌntaya tsi' q'uele woli' tilel ti ajñel yambʌ. Tsi' bʌc' sube jini mu' bʌ i cʌntan i ti' tejclum: Woli' tilel yambʌ winic, che'en. Jini rey tsi' yʌlʌ: An chuqui yom i sub jini winic ja'el, che'en.

²⁷ Jini xcʌntaya tsi' yʌlʌ: Wolij q'uel bajche' mi' cha'len ajñel jini ñaxan bʌ. Lajal yilal bajche' Ahimaas (i yalobil Sadoc), che'en. Jini rey tsi' yʌlʌ: Uts'at jini winic. Woli' ch'ʌmbeñonla tilel wen bʌ t'an, che'en.

²⁸ Ahimaas c'am tsi' pejca jini rey: Laj uts'at ti pejtelel, che'en. Tsi' c'uchchoco i bʌ ti' tojlel jini rey. Tsi' yʌlʌ: La' sujbic i ñuclel lac Yum Dios, come tsa'ix mʌjli lac cha'an ti guerra ti' tojlel jini tsa' bʌ i contrajiyet, c yum, che'en.

²⁹ Jini rey tsi' c'ajtibe: ¿Uts'at ba an Absalón? che'en. Ahimaas tsi' jac'ʌ: Che' bʌ tsi' chocoyon tilel a winic Joab, tsaj q'uele jomolob winicob, pero mach cujilic chuqui tsa' ujti, che'en.

³⁰ Jini rey tsi' yʌlʌ: Wa'i to ilayi, che'en. Tsa' caji ti wa'tʌl ti' ts'ejtʌl jini rey.

³¹ Ti wi'il tsa' c'oti jini etíope. Tsi' yʌlʌ: C rey uts'at bajche' tsa' ujti. Lac Yum tsa'ix i laj jisa pejtelel jini tsa' bʌ i contrajiyetob, che'en.

³² Jini rey tsi' c'ajtibe: ¿Uts'at ba an Absalón? che'en. Jini winic tsi' jac'ʌ: La' tsʌnsʌnticob pejtelel a contrajob che' bajche' tsa' tsʌnsʌnti Absalón, che'en.

³³ Tsa' toj sajti i pusic'al David. Ti ora tsa' letsi majlel ti jini otot am bʌ ti' chañelal ts'ajc. Tsi' cha'le uq'uel. Tsi' yʌlʌ: ¡Bajche' tsa' ujtiyet calobil Absalón, calobil Absalón! che'en. Uts'at tsa'ic chʌmiyon cha'añet cha'an ma'anic ma' chʌmel, calobil. Che' tsa' uq'ui David.