2 Samuel 16 - Chol: I T’an Dios

¹ Che' bʌ tsa' ts'ita' letsi ti wits David, tsa' caji i q'uel ya'ix tilel Siba i yaj e'tel Mefiboset. Woli' ch'ʌm tilel cha'cojt burro cuchbil bʌ i cha'an lujunc'al pan yic'ot jo'c'al ti pajl tiquin bʌ ts'usub, yic'ot jo'c'al ti pajl ts'usub mach bʌ tiquinic, yic'ot jump'ejl lata i ya'lel ts'usub.

² Jini rey tsi' c'ajtibe: ¿Chuqui i ye'tel iliyi? che'en. Siba tsi' jac'ʌ: A majtañʌch ili burro tac cha'an mi' c'ʌchtañob majlel a pi'ʌlob. Ch'ʌmʌ jini pan ja'el yic'ot i wut te' cha'an mi' c'uxob jini x'e'telob a cha'an. Jini i ya'lel ts'usub la' i japob ti bij jini mu' bʌ i lujb'añob, che'en.

³ Jini rey tsi' c'ajtibe: ¿Baqui an i yalobil a yum? che'en. Siba tsi' jac'ʌ: Ya' tsa' cʌle ti Jerusalén. Come woli' yʌl wersa mi caj i sutq'uibeñob jini israelob i yumʌntel i tatuch, che'en.

⁴ Jini rey tsi' cha' sube Siba: Awilan a cha'añʌch pejtelel chuqui an i cha'an Mefiboset, che'en. Siba tsi' ñocchoco i bʌ. Tsi' yʌlʌ: Wocolix a wʌlʌ, c rey. Yom ma' q'uelon ti uts'at, che'en.

⁵ Che' bʌ woli' c'otel David ti Bahurim, tsa' tili Simei (i yalobil Gera). Jiñʌch i pi'ʌl Saúl. Woli' p'aje' tilel David.

⁶ Tsa' caji i jul ti xajlel David yic'ot x'e'telob i cha'an ti pejtelelob.

⁷ Simei wen c'am woli' cha'len p'ajoñel ti' contra David. Woli' yʌl: Loq'uen ti ora xjontolil, stsʌnsajet.

⁸ Lac Yum wolix i yʌq'ueñet a toj pejtelel a mul cha'an tsa' chilbe i ye'tel Saúl. An ti a wenta bajche' tsa' chʌmi Saúl yic'ot i pi'ʌlob. Jini cha'an lac Yum tsa'ix i yʌq'ue a yumʌntel ti' wenta a walobil Absalón. Wʌle ujux awilal cha'an a jontolil yic'ot cha'an a tsʌnsa, che'en Simei.

⁹ Abisai (i yalobil Sarvia) tsi' sube jini rey: ¿Chucoch leco mi' tilel i p'ajet ili tuwen ts'i'? Subeñon majlel cha'an mic set' t'ojben i bic', che'en.

¹⁰ Jini rey tsi' jac'ʌ: Mach che'ic yom. Isujm leco woli' p'ajon. Tic'ʌl mi lac Yum tsi' sube cha'an mi' p'ajon. ¿Bajche' mi mejlel c tic' che' jini? che'en David.

¹¹ Jini mero calobil yomix i tsʌnsañon. Mi che'ʌch mi' mel calobil, ¿mach ba yomic mi' p'ajon j contra? Come lac Yum tsi' sube jini benjamín cha'an mi' p'ajon.

¹² Tic'ʌl mi muq'uix i p'untañon lac Yum cha'an wolic ts'a'lentel, che'en David.

¹³ Ya' ti' t'ejl bij baqui tsa' ñumi an bujtʌl. Che' woliyob ti xʌmbal majlel David yic'ot i winicob, jini Simei woli' p'aj majlel ya ti' ts'ejtʌlel jini wits. Tsi' julu ja'el ti xajlel yic'ot ti lum tac.

¹⁴ Che' bʌ c'otemobix ti Jordán ja', jini rey yic'ot i pi'ʌlob ti xʌmbal tsa' caji i c'ajob i yo, come wen lujbeñobix.

¹⁵ Absalón yic'ot Ahitofel yic'ot pejtelel jini winicob tsa' ochiyob ti Jerusalén.

¹⁶ Husai jini amigo i cha'an David tsa' c'oti i taj Absalón. Tsi' yʌlʌ: La' sujbic i ñuclel c rey, che'en.

¹⁷ Absalón tsi' c'ajtibe Husai: ¿Jim ba i xuc'tilel a pusic'al yic'ot a yum? ¿Chucoch ma'anic tsa' pi'le majlel? che'en.

¹⁸ Husai tsi' jac'be: Mi caj cajñel quic'otet come reyetix yajcʌbil bʌ i cha'an lac Yum ti' tojlel pejtelel israelob. Mi caj c tsʌclañet.

¹⁹ ¿Mach ba yomic mic yumañet? ¿Mach ba i yalobiletic David? Che' bajche' tsac wen melbe i ye'tel a tat, che' ja'el mi caj c melbeñet a we'tel, che'en.

²⁰ Che' jini Absalón tsi' sube Ahitofel: Yom ma' tsictesʌbeñon chuqui tac yom mi lac mel, che'en.

²¹ Ahitofel tsi' sube: Yom ma' majlel ba'an i yixicob a tat, come ya' tsi' cʌyʌyob ti cʌn otot. Che' mi' yubiñob pejtelel año' bʌ ti tejclum, mi caj i ña'tañob tsa'ix a ts'a'le a tat. Mach mejlix a cha' uts'esan a bʌ yic'ot. Che' jini mi cajel i ñumen p'ʌt'añob pejtelel a winicob, che'en.

²² Tsa' caji i wa'chocobeñob pisil bʌ i yotot Absalón ya' ti q'uiyil bʌ i jol i yotot i tat. Absalón tsa' caji ti ajñel yic'ot i yixicob i tat ti' wutob pejtelel israelob.

²³ Ti jimbʌ ora Absalón tsi' c'ajtibe consejo Ahitofel, come cabʌlʌch i ña'tʌbal che' bajche' tilem ti Dios. Che' bajche' tsi' colta David ti yambʌ ora tsa' caji' coltʌben i yalobil.